Новы Закон Рэспублікі Беларусь «Аб пахаванні і пахавальнай справе», які быў падпісаны ў студзені, закліканы навесці парадак і яснасць у сферы аказання пахавальных паслуг. Падрабязней пра яго «Звяздзе» расказаў член Пастаяннай камісіі Палаты прадстаўнікоў Нацыянальнага сходу па жыллёвай палітыцы і будаўніцтве Юрый Дарагакупец.
— 8 студзеня Прэзідэнтам падпісаны Закон «Аб пахаванні і пахавальнай справе», праз паўгода ён набывае сілу, — адзначыў дэпутат. — Папярэдні закон быў прыняты ў лістападзе 2001 года. Прайшло дастаткова часу, таму, зразумела, дакумент патрабаваў карэкціроўкі. Спачатку спрабавалі прывесці яго ў адпаведнасць з тымі нарматыўнымі актамі, якія былі прынятыя пасля 2001 года, але на стадыі распрацоўкі законапраекта з'явілася шмат новых прапаноў ад дэпутатаў Палаты прадстаўнікоў і членаў Савета Рэспублікі. Дарэчы, усе прапановы абмяркоўваліся з Мітрапалітам Мінскім і Заслаўскім Паўлам, Патрыяршым Экзархам усяе Беларусі, кіраўнікамі іншых рэлігійных арганізацый і насельніцтвам.
Сёння ў Рэспубліцы Беларусь больш за 13 тысяч могілак. Асноўнае праблемнае пытанне датычыцца іх упарадкавання і прывядзення ў належны стан. У новым законе дакладна абазначаны ўсе нюансы: хто і за што адказвае. У прыватнасці, законам прадугледжана, што арганізацыяй пахавальнай справы будуць займацца гарадскія, раённыя выканаўчыя і распарадчыя органы, спецыялізаваныя арганізацыі. Вызначаны крыніцы фінансавання. Упершыню прапісана, што пахавальная справа фінансуецца за кошт сродкаў рэспубліканскага і мясцовага бюджэтаў, фонду сацыяльнай абароны і іншых крыніц, якія не забаронены заканадаўствам краіны.
Таксама прапісаны новыя патрабаванні да ўтрымання магіл. «Па ўсёй краіне пройдзе інвентарызацыя месцаў пахавання, а потым з'явіцца адзіны рэестр. Пакуль дакладна невядома, колькі ўсяго ў Беларусі магіл: улік вядзецца толькі па тых месцах пахаванняў, якія знаходзяцца на балансе спецыялізаваных арганізацый. Напрыклад, на Вайсковых могілках горада Мінска 3500 пахаванняў, і толькі каля 1,5 тыс. з іх — вядомыя. Што датычыцца закінутых магіл, то, калі на працягу двух гадоў іх ніхто не даглядае, акультурваннем зоймецца балансатрымальнік. Помнікі, якія прыйшлі ў непрыгоднасць, дэмантуюць, а замест іх на магіле ўсталююць ідэнтыфікацыйны знак з указаннем звестак пра пахаванага. Трэба наводзіць парадак, і пачынаць трэба з інвентарызацыі», — тлумачыць парламентарый.
Найбольш актыўныя дыскусіі пры распрацоўцы закона выклікала пытанне пра адказнасць за забеспячэнне парадку на могілках у сельскай мясцовасці. Юрый Дарагакупец кажа, што ўтрымліваць і ўпарадкоўваць месца пахавання будуць на платнай аснове юрыдычныя асобы ці індывідуальныя прадпрымальнікі, вызначаны пасялковым або сельскім выканкамам. У той жа час для навядзення парадку не забараняецца прыцягваць фізічных асоб, але на падставе заключаных з імі дагавораў.
У новым законе вызначаны пералік асоб, якія могуць арганізоўваць пахаванні. Такое рашэнне было прынята ў выніку выяўлення нядобрасумленнага стаўлення да працэсу пахавання. «Цяпер работнікі гэтай сферы будуць абавязаны праходзіць навучанне. Павінны выконвацца культура і элементарныя нормы паводзін. Правілы будуць распрацаваны міністэрствам жыллёва-камунальнай гаспадаркі», — расказвае парламентарый.
Асаблівую ўвагу грамадскасці выклікае артыкул пра гарантыі пахавання, згодна з якім дзяржава гарантуе пахаванне ў парадку, вызначаным гэтым законам і іншымі актамі пахавання і пахавальнай справы. Паводле закона, дапамога на пахаванне будзе выплачвацца ў памеры сярэдняй заработнай платы працаўнікоў у рэспубліцы за пазамінулы месяц адносна месяца наступлення смерці. Прапісаны катэгорыі грамадзян, якія маюць права на грашовую дапамогу і парадак яе выплаты. «Грошы выплачваюцца асобе, якая ўзяла на сябе арганізацыю пахавання. Калі праца выканана няякасна, прадугледжана адміністрацыйная адказнасць і пакрыццё нанесенай шкоды», — адзначае дэпутат.
Юрый Дарагакупец заўважае: «Гэта зусім новая рэдакцыя закона, у папярэднім не былі так выразна і ясна распісаны нюансы пахавальнай справы. Тут жа падрабязна агавораны ўсе патрабаванні да самога працэсу пахавання, прапісаны гарантыі. Закон цалкам адаптаваны да нашага часу і новых патрабаванняў. Але гэта не выключае, што ў будучыні не спатрэбіцца дадатковых змен і дапаўненняў».
Юлія АДАМОВІЧ.
Сумесныя праекты ядзерных тэхналогій.