Сумная прыкмета вясны — выпальванні сухой расліннасці. Толькі за апошнія суткі ў краіне адбылося 146 пажараў травы і хмызняку. Ужо па традыцыі «чэмпіёнам» стаў поўдзень краіны. У Брэсцкай вобласці ратаўнікі выязджалі тушыць расліннасць 67 разоў, а ў Гомельскай — 53. А ў Магілёве пажар травы сярод працоўнага дня абарваў чалавечае жыццё.
— У 16 гадзін 12 хвілін ад дзяжурнага ўрача хуткай медыцынскай дапамогі атрымана паведамленне аб тым, што мужчына атрымаў апёкі з прычыны таго, што пад дрэвамі загарэлася сухое лісце, — паведамілі карэспандэнту «Звязды» ў прэс-службе Міністэрства па надзвычайных сітуацыях. — Калі выратавальнікі прыбылі на месца здарэння, расліннасць тлела на плошчы 10 квадратных метраў. Тут жа знаходзіўся пацярпелы. Яго шпіталізавалі ў бальніцу з дыягназам «тэрмічныя апёкі 1-3 ступені 99% цела».
Абставіны здарэння зараз высвятляюць праваахоўнікі. Аднак на момант падрыхтоўкі матэрыялу некаторыя падрабязнасці ўжо былі вядомы.
— Міма праходзілі людзі і ўбачылі агонь і дым, — расказала галоўны інспектар па інфармацыі і сувязі з грамадскасцю ўпраўлення Следчага камітэта па Магілёўскай вобласці Аксана Салянюк. — Падышлі бліжэй і ўбачылі, што абгарае мужчына. З дапамогай падручных сродкаў яго пачалі тушыць, пасля пад'ехала «хуткая» і выратавальнікі. Не апрытомнеўшы, мужчына 1981 года нараджэння праз некаторы час памёр. На месца здарэння выязджала следча-аператыўная група, што забрала адтуль некаторыя прадметы. Пры пацярпелым быў знойдзены істотна абгарэлы пашпарт. Прызначана спецыяльная экспертыза, якая дапаможа пацвердзіць асобу памерлага. Пакуль адпрацоўваюцца ўсе версіі таго, што адбылося. Аб тым, ці знаходзіўся нябожчык у стане алкагольнага ці наркатычнага ап'янення, пакуль невядома.
Валяр'ян ШКЛЕННІК.
«Дзесяцігоддзі школьнае харчаванне нашых дзяцей будавалася на аснове зборніка рэцэптур».
Што за таемнымі дзвярыма?
