Хоць сёлета веснавой паводкі і не было, аднак наперадзе новы сезон, калі вялікая вада можа нарабіць бяды. У апошні час неад'емнай часткай беларускага клімату сталі ліўневыя дажджы. Працягваюцца яны, як правіла, нядоўга — максімум пару гадзін. Аднак страшныя яны сваёй інтэнсіўнасцю — вада льецца так хутка, што не паспявае ўсмактацца ў зямлю. Ліўневая каналізацыя
ў некаторых месцах традыцыйна не спраўляецца, і вуліцы пачынаюць ператварацца ў веніцыянскія.
«Разынка» ліўневых дажджоў у іх лакальнасці. Пакуль на некалькіх квадратных кіламетрах баль правіць Нептун, на іншай тэрыторыі і следу гэтага няма. Пераканаўся ў гэтым на асабістым вопыце шмат гадоў таму, калі стыхія прымусіла на паўдарозе да мэты паездкі правесці гадзіну ў спыненым пасярод перагону аўтобусе. Пасля даведаўся, што ў тым раёне горада, куды накіроўваўся, з неба ўпала толькі некалькі кропель. Хаця адлегласць не такая і вялікая — па прамой кіламетраў дзесяць.
Венецыя на беларускі лад
— Блакіраванне людзей у грамадскім транспарце — гэта адзін з фактараў небяспекі і бадай што, адзін з параўнальна бяскрыўдных, — гаворыць прэс-сакратар Мінскага гарадскога ўпраўлення Міністэрства па надзвычайных сітуацыях Віталь Дэмбоўскі. — Аднак перакрыць шлях адступлення вада можа і ў памяшканнях, якія знаходзяцца ніжэй за ўзровень зямлі.
Таксама пры ліўнях назіраюцца істотныя перабоі энергазабеспячэння ці яно ўвогуле знікае з-за пашкоджанняў ліній электраперадач. Моцная вада можа выклікаць апоўзні ці істотна пашкодзіць аўтамабільную дарогу. Жыхарам дамоў, якія знаходзяцца ў нізінных месцах, трэба быць гатовымі да таго, што стыхія рызыкуе затапіць іх гаспадарчыя пабудовы, агароды ці нават дамы.
Таму, калі лівень заспеў вас на вуліцы, не бяжыце ў падземныя пераходы ці іншыя заглыбленыя месцы. Падчас чарговага патопу ў сталіцы ў 2004 годзе ў падвале жылога дома па вуліцы Кірава загінуў бізнесмен. Ён намагаўся ўратаваць дакументы з крамы па продажы веласіпедаў, якая знаходзілася ў падвале, але на шляху назад не здолеў адчыніць дзверы. Узровень вады падняўся настолькі, што іх заклініла. Памятная дагэтуль трагедыя на станцыі метро «Няміга» (якая, дарэчы, знаходзіцца ў месцы, якое залівае падчас кожнага моцнага дажджу), калі ў цісканіне на мокрых прыступках загінулі 53 чалавекі. А ў ліпені 2013 года аўтар гэтых радкоў стаў відавочцам таго, як вялікая вада хлынула наўпрост на перон станцыі метро «Парк Чалюскінцаў» — не справіўся стары ліўневы калектар, пабудаваны шмат дзесяцігоддзяў таму.
Лепш за ўсё проста не выходзіць па магчымасці з кватэры або з працы і перачакаць непагадзь там. Калі ж будынак, у якім вы знаходзіцеся, пачынае відавочна падтопліваць, выключыце электрычнасць і газ, шчыльна зачыніце вокны і дзверы і тэлефануйце ў службу 101.
Як пазбегнуць гідраўдару
Глыбокія лужыны на дарогах, якія ўтвараюцца падчас моцных ліўняў, могуць стаць прычынай сур'ёзнай аўтамабільнай непаладкі, імя якой — гідраўлічны ўдар. Механізм яго ўтварэння і дзеяння вельмі просты. Праз паветраны фільтр у камеру спальвання рухавіка трапляе вада, якая, як вядома са школьнага курса фізікі, не сціскаецца. Як толькі кроплі вады праніклі ў цыліндры, то на такце сціскання поршань пры руху ўгору ўпрэцца ў водны «корак». З хуткасцю лавіны пачынае расці ціск унутры цыліндра. Рухавік жа працягвае цыкл і намагаецца давесці поршань да верхняга становішча. Ён імгненна спыняецца, а каленчаты вал працягвае круціцца, прымае на сябе велізарную нагрузку і часта ламаецца сам. Дарога аўтамабілю ў такім выпадку толькі адна — на станцыю тэхнічнага абслугоўвання. І на сам рамонт давядзецца выдаткаваць кругленькую суму.
Гідраўдар проста атрымаць, але яшчэ прасцей папярэдзіць магчымасць яго ўзнікнення і зберагчы грошы. Сачыце за зводкамі надвор'я, і калі сіноптыкі папярэджваюць аб ліўнях, проста ўстрымайцеся ад паездкі. Калі аўтамабіль стаіць у нізіне, перапаркуйце яго на больш высокім месцы. А калі небяспечнае надвор'е заспела ў дарозе, трэба павольна перастроіцца ў крайні правы рад, заглушыць рухавік і чакаць, пакуль пройдзе дождж. Аўто для паездак па вялікай вадзе не прызначана, тым больш што церпіць ад яе не толькі рухавік, але і электраправодка.
Не эканомце на бяспецы
Ліўневыя дажджы ў цёплы перыяд года часта суправаджаюцца навальніцай. Джганне маланак уяўляе сабой прыгожае відовішча, але разам з тым і смяротна небяспечнае. Самае бяскрыўднае наступства непагадзі, якое бачыў кожны чалавек, — гэта расколаты ствол дрэва.
— Звычайна паветра ток не праводзіць, — тлумачыць Віталь Дэмбоўскі. — Аднак пры навальніцы яно страчвае гэтую ўласцівасць, бо рознасць патэнцыялаў паміж аблокамі і зямлёй яго іанізуе. Па гэтым канале і праходзіць маланка, бо прырода імкнецца зрабіць гэтыя патэнцыялы аднолькавымі. Разрад можа ісці або з воблака на зямлю, або з зямлі на воблака. «Радзіма» маланкі — гэта так званы лідар. Ім можа быць самы высокі пункт на паверхні. Калі ад яго ёсць зазямленне, ён будзе прыцягваць да сябе электрычны разрад зверху. Як мы ведаем са школы, электрычны ток заўжды ідзе па шляху найменшага супраціўлення. І ў той момант, калі рознасць патэнцыялаў становіцца найбольшай і паветра іанізавана максімальна, адбываецца прабой. Аднак разраду прасцей ісці ў зямлю праз нейкі аб'ект, які мае лепшую за іанізаванае паветра электрычную праводнасць. Менавіта таму ахвярамі маланкі становяцца людзі, якія хаваюцца пад адзінокімі дрэвамі ці якіх навальніца заспявае, напрыклад, у полі.
Летась напрыканцы мая ў Столінскім раёне маланка забрала жыццё пастуха. Работнік мясцовага СВК пасвіў кароў блізу вёскі. Калі пачалася непагадзь, мужчына вырашыў перачакаць навальніцу ў вагончыку побач. Аднак разрад маланкі пацэліў якраз у яго. Бацька дзвюх дачок загінуў на месцы...
— На любым аб'екце павінна быць маланкаабарона, — тлумачыць Віталь Дэмбоўскі. — Гэтая няхітрая прылада складаецца з трох частак. Па-першае, гэта прыёмнік, які і будзе прымаць на сябе разрад. Ён павінен быць вышэйшым за аб'ект, які абараняе. Па-другое, гэта сам маланкаадвод, які і будзе накіроўваць разрад у зямлю. І, нарэшце, зазямленне. Калі яго зрабіць абы-як, то энергія разраду не будзе рассейвацца ў зямлі бяспечна і можа папсаваць аб'екты, якія там знаходзяцца. Гэта могуць быць разнастайныя падземныя кабелі, трубапровады. Таму зазямленне трэба рабіць, дакладна ведаючы, што ж знаходзіцца на некалькі метраў ніжэй. А лепш даверце гэтую працу спецыялістам.
Мы сутыкаліся і з тым, што людзі вырашалі сэканоміць на маланкаабароне і лічылі, што ад навальніцы дом абароніць... кусок дроту, які выступае над дахам. Аднак гэты дрот згарыць ад першага ж прыцягнутага разраду і, больш за тое, рызыкуе падпаліць саму хату. Калі ж небяспечнае надвор'е заспела вас там, то зачыніце ўсе вокны і дымаходы. Трымайцеся далей ад праводкі і антэн. І ўвогуле выключыце ўсе электрапрыборы.
А вось на адкрытай мясцовасці ўсё куды складаней. Дзейнічаць трэба ў залежнасці ад таго, дзе менавіта знаходзіцеся. Калі навальніца застала вас на вадаёме, то хутка плывіце да берага. Не стойце блізка каля ліній электраперадач. У лесе лепш схавацца пасярод кустарнікаў ці высокай травы. На адкрытай мясцовасці першае, што прыходзіць у галаву з-за страху, — гэта жаданне ўцячы. Аднак яно ж вельмі рызыкоўнае. Куды бяспечней легчы на зямлю ці прысесці, прыгнуўшы галаву. Не спрабуйце ўцячы ад навальніцы на веласіпедзе ці матацыкле. Збегчы ад хмары вам наўрад ці ўдасца, а вось аб'ект, які хутка перасоўваецца, яшчэ лепш прыцягвае да сябе электрычны разрад. Былі выпадкі, калі маланка забівала веласіпедыстаў. Таму лепш пакінуць двухколавы транспартны сродак і перачакаць дождж не бліжэй за 30 метраў ад яго. А вось чалавек, які сядзіць у аўтамабілі з зачыненымі вокнамі, ад маланкі застрахаваны.
А раптам маланка?
Па розных звестках, за год у свеце навальніца забірае жыцці ад трох да дзесяці тысяч чалавек. Выбар сродкаў самастойнай дапамогі для чалавека, у якога трапіла маланка, зусім невялікі. Ён абмяжоўваецца штучным дыханнем «рот у рот», непрамым масажам сэрца ды абліваннем галавы халоднай вадой. І ў любым выпадку трэба як мага хутчэй набраць нумар «103»...
Валяр'ян ШКЛЕННІК.
Сумесныя праекты ядзерных тэхналогій.
У парадку дня — зацвярджэнне Канцэпцыі нацбяспекі і Ваеннай дактрыны.