Вы тут

Як стаць найлепшым танцорам?


Лічыцца, што каб навучыцца прафесійна танцаваць у гэтым стылі, трэба абавязкова ехаць на майстар-класы ў Амерыку. А між іншым, найлепшы выканаўца хіп-хопа жыве... у Мінску. На чэмпіянаце свету, які праходзіў восенню ў Аўстрыі, «золата» ў сольных выступленнях сярод юніёраў заваявала 15-гадовая Сафія ГАГІНА, вучаніца 10 класа сталічнай школы №61. У перапынку паміж урокамі і трэніроўкамі дзяўчына знайшла час, каб расказаць пра сваё захапленне і планы на будучыню.


Займацца танцамі Сафія пачала ў трэцім класе.

— Падставай для гэтага стала мая гіперактыўнасць — звычайная справа для дзевяцігадовага дзіцяці, — расказвае школьніца. — Дагэтуль я каля трох гадоў хадзіла ў тэатральную студыю, так што танцы не былі маім першым творчым пачынаннем. Хіп-хоп не выбірала: што было блізка ад дома, туды мяне бацькі і аддалі.

Стыль дзяўчына асвойвала даволі лёгка. Яна добра адчувала музыку — а на першым этапе больш нічога і не патрабавалася.

За шэсць гадоў, што Сафія займаецца танцамі, яна паспела стаць абсалютнай чэмпіёнкай Беларусі па хіп-хопе, заваяваць «золата» ў дзвюх намінацыях у сёлетнім чэмпіянаце Еўропы па вулічных танцах. Дома на сцяне ў яе вісіць каля 40 медалёў! Але самы дарагі для дзяўчыны — менавіта апошні, атрыманы на сусветным чэмпіянаце.

Як мінскай школьніцы ўдалося дасягнуць такіх вынікаў? Сакрэтнай формулы поспеху ў Сафіі няма. Расказвае, што стараецца максімальна ўдзяляць увагу трэніроўкам. І хаця ў яе раскладзе значацца толькі два абавязковыя заняткі танцамі на тыдзень, яна дадаткова прыходзіць яшчэ разы тры. На канікулах, напрыклад, трэніруецца кожны дзень. Пра прыродны талент дзяўчына сціпла прамаўчала.

У адрозненне ад «бальнікаў», якім прыходзіцца аддаваць вялікія грошы на касцюмы, танцорам хіп-хопа сур'ёзна траціцца на форму не трэба.

— Касцюмаў нават і няма. Танцуеш у тым, у чым зручна, — у шырокім адзенні, якое не абмяжоўвае рухаў, — тлумачыць дзяўчына. — Большасць выдаткаў на танцы звязаны з паездкамі.

Абмяжоўваць сябе ў салодкім, каб быць трысціначкай на сцэне, не патрабуюць. І хаця сама Сафія — вельмі зграбная дзяўчына, яна заўважае, што ў хіп-хопе фігура не мае значэння: «Гэта не гімнастыка. Вага нічога не вырашае».

— На школьных дыскатэках ты, напэўна, заўсёды ў цэнтры ўвагі? — пытаюся ў Сафіі. Аказваецца, не: на тыя дыскатэкі дзяўчына не ходзіць. Няма там чаго рабіць...

Цікаўлюся, як дзяўчына за пастаяннымі трэніроўкамі і паездкамі на конкурсы паспявае вучыцца. Яе сярэдні бал за папярэдні дзявяты клас — 9,5! Але Сафія ацэньвае сябе даволі крытычна. «Адзнакі ў школе — гэта нешта абстрактнае. У вучобе ў мяне насамрэч практычна заўсёды лёгкі «завал». Шмат дамашніх заданняў, нецікавых урокаў... Але я не паспяваю не праз маю занятасць, а праз няўменне правільна размяркоўваць час».

— Чытала, што ты марыш стаць хімікам...

— Тое інтэрв'ю давала не я, а мой тата. Нашы ўяўленні аб маёй будучыні крыху не супадаюць, так што гэта праўда толькі часткова, — усміхаецца Сафія.

Па словах чэмпіёнкі, у яе ёсць некалькі варыянтаў, куды паступаць пасля школы, у тым ліку яна разглядае і спецыяльнасці, звязаныя з хіміяй. Але, як і многія старшакласнікі, дзяўчына пакуль што з прафесіяй не вызначылася.

Наталля ЛУБНЕЎСКАЯ

lubneuskaya@zvіazda.by

Загаловак у газеце: У рытме хіп-хопа

Выбар рэдакцыі

Культура

Пошук вечнага жыцця

Пошук вечнага жыцця

Шмат разоў, збочыўшы з брэсцкай трасы, праязджаючы ад Міра да Карэліч, царкву на могілках каля вёскі Загор'е выхопліваеш літаральна за лічаныя секунды.

Спорт

Ірына Курачкіна заваявала серабро Алімпійскіх гульняў!

Ірына Курачкіна заваявала серабро Алімпійскіх гульняў!

 У фінале спаборніцтваў па жаночай барацьбе яна ўступіла японцы Рысака Каваі. 

Грамадства

Ацэнка дзеянняў урада і давер да апазіцыі — Мусіенка пракаментаваў вынікі сацапытання

Ацэнка дзеянняў урада і давер да апазіцыі — Мусіенка пракаментаваў вынікі сацапытання

Па заказе ЗАТ «Другі нацыянальны тэлеканал» — АНТ з 5 па 21 ліпеня Аналітычны цэнтр ЕсооМ з прыцягненнем фонду «Украінская палітыка» правёў

Палітыка

Літоўцы раскручваюць крывавую хвалю гвалту

Літоўцы раскручваюць крывавую хвалю гвалту

З беларуска-літоўскай граніцы працягваюць паступаць весткі, ад якіх проста кроў стыне ў жылах.