Беларусь гатова прасоўваць супрацоўніцтва з Венгрыяй па ўсіх напрамках

Аб гэтым заявіў Аляксандр Лукашэнка на сустрэчы з міністрам замежных спраў і знешняга гандлю Венгрыі Петэрам Сіярта.

У пачатку сустрэчы беларускі лідар падзякаваў Венгрыі, яе лідару і свайму суразмоўцы асабіста, бо ён перш за ўсё адказвае за знешнепалітычны курс, за тое добрае, што было зроблена для Беларусі, асабліва за нармалізацыю адносін паміж нашай краінай і Еўрапейскім саюзам. "Мы пра гэта ведаем аж да літары і коскі, мы гэта вельмі цэнім, і гэта адзін з краевугольных камянёў падмурка нашых адносін", — падкрэсліў кіраўнік дзяржавы.

Акрамя таго, Прэзідэнт назваў гандлёва-эканамічныя адносіны паміж дзвюма дзяржавамi асноўным каменем у падмурку супрацоўніцтва. "Можна казаць, што ў нас ёсць тавараабарот, і ён вагаецца дзесьці ў межах 180-200 млн долараў па годзе, але давайце адкрыта скажам, што гэта смешная лічба. Улічваючы нашы патэнцыялы, улічваючы тое, як мы былі каапераваныя ў свой час, гэта толькі пачатак, — адзначыў Аляксандр Лукашэнка. — І я вам хачу сказаць — мы гатовы па ўсіх напрамках прасоўваць наша гандлёва-эканамічнае супрацоўніцтва”.

Беларускі лідар заклікаў выкарыстоўваць у гэтым сяброўства Беларусі ў ЕАЭС, адносіны з Кітаем, у прыватнасці Шаўковы шлях паміж Кітаем і Еўропай.

"Лагістыка выбудавана, мы гатовы тут прадстаўляць вашы інтарэсы. У той жа час мы разлічваем на тое, што вы як член Еўрапейскага саюза, пры тым вельмі самастойны, які мае сваю пазіцыю, будзеце нас падтрымліваць. І спалучэнне гэтых інтарэсаў надасць вялікую гандлёва-эканамічную дынаміку паміж дзвюма краінамі", — дадаў ён.

Прэзідэнт таксама адзначыў, што не бачыць неабходнасці гаварыць асобна пра канкрэтныя праекты, паколькі яны ёсць ва ўсіх сферах — не толькі ў машынабудаванні і фармацэўтыцы. Аляксандр Лукашэнка звярнуў увагу, што асабіста памятае сувязі па фармацэўтычнай лініі яшчэ з савецкіх часоў. Паводле яго слоў, у нашай краіне да гэтага часу вялікі попыт на венгерскі лекі. Але у Беларусі і Венгрыі ёсць магчымасці працаваць па ўсіх кірунках.

"Вы хочаце — і правільна — аднавіць вытворчасць "Ікарусаў", маіх любімых аўтобусаў. Мы гатовыя прапанаваць вам практычна бясплатна гэтую падтрымку, таму што мы прайшлі вельмі сур'ёзны шлях будаўніцтва падобных аўтобусаў на больш высокай аснове ў Беларусі", — сказаў беларускі лідар.

У адказ венгерскі міністр замежных спраў і знешняга гандлю падзякаваў кіраўніку дзяржавы за магчымасць асабістага прыёму, а таксама падзякаваў міністру замежных спраў Беларусі Уладзіміру Макею за працу, накіраваную на развіццё двухбаковых адносінаў дзвюх дзяржаў.

Ён нагадаў, што Венгрыя — краіна ў Цэнтральнай Еўропе, якая памятае гісторыю і ведае, што ёй нашмат лепш, калі паміж Захадам і Усходам існуе супрацоўніцтва. Петэр Сіярта падкрэсліў: гэтая ідэя з'яўляецца нацыянальным інтарэсам венгерскага народа. "Мы хочам аб'яднаць свае намаганні з усімі, хто лічыць супрацоўніцтва паміж Усходам і Захадам важным. І таму працуем над тым, каб Беларусь магла больш цесна супрацоўнічаць з Еўрапейскім саюзам", — сказаў ён.

Па выніках сустрэчы венгерскі міністр пагутарыў з журналістамі. Паводле яго слоў, сёння Беларусь і Венгрыя падпісваюць пагадненне аб узаемнай абароне інвестыцый, што адкрывае новыя магчымасці для супрацоўніцтва дзелавых супольнасцяў. Яшчэ ў рамках беларуска-венгерскай кааперацыі плануецца адкрыццё ў Венгрыі лініі па вытворчасці вагонаў для чыгунак (усяго трэба будзе вырабіць 19 двухпавярховых цягнікоў). Па лініі харчовай прамысловасці плануецца адкрыццё ў Магілёве сумеснага прадпрыемства — гаворка ідзе пра кукурузу.

"Мы таксама вядзем размову пра тое, што абедзве краіны ў хуткім часе збіраюцца выкарыстоўваць атамную энергію ў мірных мэтах. Таму адкрываецца магчымасць для развіцця супрацоўніцтва ў галіне абмену вопытам, інжынірынгу ў рамках стварэння атамных праектаў", — сказаў ён.

Міністр адзначыў, што Венгрыя з'яўляецца прыхільнікам больш цеснага супрацоўніцтва паміж Еўрапейскім саюзам і Беларуссю, у сувязі з чым ён праінфармаваў Прэзідэнта аб тым, што ў Еўропе з'яўляецца ўсё больш прыхільнікаў гэтага падыходу.

Дарэчы, у гэты дзень запланаваны сустрэчы міністра замежных спраў і знешняга гандлю Венгрыі з прэм'ер-міністрам Беларусі Сяргеем Румасам, міністрам замежных спраў Уладзімірам Макеем, міністрам эканомікі Дзмітрыем Крутым, міністрам спорту і турызму Сяргеем Кавальчуком, міністрам сельскай гаспадаркі і харчавання Леанідам Зайцам і міністрам прамысловасці Паўлам Уцюпіным.

Акрамя таго, венгерскі міністр выступіць перад студэнтамі факультэта мiжнародных адносін Беларускага дзяржаўнага універсітэта. Тэма — міграцыя і будучыня Еўрасаюза.

У тэму

Па выніках студзеня - лістапада 2018 года тавараабарот Беларусі і Венгрыі склаў 179,3 млн долараў (108 % да аналагічнага перыяду 2017 года), беларускі экспарт— 72,1 млн долараў (114,6 %), імпарт з Венгрыі — 107,1 млн долараў (103,9 %). Сальда — мінус 35 млн долараў.

Экспарт беларускіх паслуг у 2017 годзе склаў 14 млн долараў (131,8 % да 2016 года), імпарт — 4,4 млн долараў (123,3 %). Сальда станоўчае — 9,6 млн долараў.

У студзені — кастрычніку 2018 аб'ём гандлю паслугамі склаў 16,3 млн долараў (121,7 %), экспарт з Беларусі — 12,8 млн долараў (132,6 %), імпарт з Венгрыі — 3,4 млн долараў (93 %). Аснову абароту паслуг складаюць транспартныя, камп'ютарныя і турыстычныя паслугі.

Сукупны аб'ём назапашаных інвестыцый з Венгрыі на 1 кастрычніка 2018 года склаў 2,5 млн долараў, з іх амаль усе прамыя. У студзені — верасні 2018 інвестыцыі з Венгрыі не паступалі.

Тавараправодная сетка з удзелам беларускага капіталу прадстаўлена кампаніяй 000 "Беларус трактар" (ААТ "МТЗ"), а таксама беларуска-венгерскай кампаніяй "Белмастрой" ("Белбудцэнтр").

У Беларусі дзейнічае 8 прадпрыемстваў з венгерскім капіталам — 6 сумесных і 2 замежных. Функцыянуюць прадстаўніцтва венгерскіх фармацэўтычных кампаній ("Гедэон Рыхтэр", "Эгіс").

З 2013 года запушчаны рэгулярны прамы авіярэйс кампаніі "Белавіа" па маршруце Мінск-Будапешт-Белград-Будапешт-Мінск.

Перспектыўнымі напрамкамі супрацоўніцтва з'яўляюцца сельская гаспадарка, харчовая прамысловасць, крэдытна-фінансавая і банкаўская сфера, будаўніцтва, вытворчая кааперацыя, фармацэўтыка, атамная энергетыка, турызм і інавацыі.

Уладзіслаў ЛУКАШЭВІЧ

Фота БЕЛТА