59 выхаванцаў Мінскага сувораўскага ваеннага вучылішча атрымалі ў суботу выпускныя пагоны. Тром з іх уручылі атэстаты асобага ўзору з залатым медалём.
– Спачатку было вельмі складана, - кажа Іван Урбановіч, адзін з медалістаў. – Тут вучыцца нашмат цяжэй, чым у звычайнай школе. Час, у тым ліку, і на самападрыхтоўку, жорстка рэгламентаваны. Калі чагосьці не паспеў, то давядзецца пасля наганяць. Сувораўцам стаў дзякуючы бацькам – менавіта яны расказалі пра вучылішча, калі я быў яшчэ ў 6-м класе. Я падумаў і вырашыў, што тут я атрымаю адукацыю лепшую, чым у сябе дома.
Іван Урбановіч будзе паступаць на ваенны факультэт БДУ. Яго б спецыяльнасць будзе звязана з радыяцыйнай, хімічнай і біялагічнай абаронай.
- За час, праведзены тут, я крыху асвоіў ваенную справу – страявыя прыёмы, даведаўся характарыстыкі зброі, навучыўся страляць. А яшчэ вучылішча дало разуменне сапраўднага сяброўства, якое правяраецца не толькі ў паўсядзённым навучанні, але і падчас палявых выездаў на палігоны. Стаць сувораўцам не так і проста. Давядзецца прайсці праз уступныя экзамены – здаць мову, матэматыку, фізкультуру і прайсці псіхалагічны тэст. Калі вы працавітыя – то ўсё атрымаецца.
– Сёння ў нас радасны і сумны, але святочны дзень, - кажа начальнік Мінскага сувораўскага ваеннага вучылішча Аляксандр Навуменка. – У нас 63-і выпуск... Пераважная большасць тых, хто зараз стаіць на плацы, у далейшым выбралі дарогу, звязаную з вышэйшымі навучальнымі ўстановамі Міністэрства абароны. Хлопцы, якія правучыліся тут пяць год, значна адрозніваюцца ад сваіх равеснікаў, якія заканчваюць сярэднія школы, сваёй даросласцю, уменнем ацэньваць абстаноўку навокал, разуменнем і веданнем людзей і сяброўствам. Акрамя высокага ўзроўню агульнаадукацыйнай падрыхтоўкі, яны спасцігаюць азы вайсковай навукі і гатовы да выканання абавязкаў камандзіраў аддзяленняў і намеснікаў камандзіраў узводаў у ваенных навучальных установах.
Павіншаваць выпускнікоў прыйшоў міністр абароны Андрэй Раўкоў, які сам скончыў Сувораўскае вучылішча.
- Незалежна ад таго, які шлях выберуць сённяшнія выпускнікі, сцены вучылішча яны пакідаюць са сфармаванымі поглядамі на жыццё і дакладна акрэсленымі мэтамі, да якіх яны рухаюцца. Прышчэпленая ў вучылішчы дысцыпліна вельмі дапамагае маладым людзям далей па жыцці.
Валяр’ян ШКЛЕННІК
Фота mil.by
Фіналістка праекта «Акадэмія талентаў» на АНТ — пра творчасць і жыццё.
На гэтым тыдні Цяльцы будуць проста незаменныя ўсюды, дзе іх ведаюць.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.
