Сёння бліжэй да поўначы вызначыцца пераможца нацыянальнага адбору на песенны конкурс «Еўрабачанне». Яго падчас фінальнага гала-канцэрту выберуць па формуле 50/50 тэлегледачы і прафесійнае журы.
Нагадаем, сёлета да фінальнага этапу дайшлі 12 удзельнікаў, якія прадставяць свае конкурсныя нумары ў наступным парадку: 1) Napolі; 2) Саша Захарык; 3) Настасся Малашкевіч; 4) Chakras; 5) Настасся Гламозда; 6) Nastasea (Настасся Развадоўская); 7) Ян Яраш; 8) Анжаліка Пушнова; 9) Дар'я Хмяльніцкая; 10) «Аўра»; 11) КейСі; 12) VAL. Кожнага з іх тэлевізійнікі прадставяць гледачам з дапамогай відэавізітовак, дзе выканаўцы раскрыюць сябе праз пэўныя колеры і імправізаваныя танцы.
Убачыць і пачуць прамую трансляцыю выступленняў змогуць гледачы тэлеканалаў «Беларусь 1» і «Беларусь 24», слухачы «Радыус FM», а таксама наведвальнікі афіцыйнага сайта Белтэлерадыёкампаніі.
Ужо 1 сакавіка ў тэлеэфіры пачнуць выходзіць «Дзённікі Еўрабачання», якія раскажуць больш падрабязна і аб прадстаўніку нашай краіны, і наогул пра тое, як праходзіць падрыхтоўка да міжнароднага конкурсу. А 2 сакавіка задаць свае пытанні пераможцу нацыянальнага адбору можна будзе падчас анлайн-канферэнцыі, што пройдзе ў медыяхолдынгу.
Нагадаем: хто б ні стаў беларускім удзельнікам «Еўрабачання-2020», ужо вядома, што прадстаўнік Беларусі выступіць на конкурсе ў першай палове першага паўфіналу, 12 мая, разам з артыстамі Паўночнай Македоніі, Літвы, Швецыі, Славеніі, Аўстраліі, Ірландыі, Расіі, Нарвегіі, Харватыі, Кіпра, Азербайджана,
Мальты, Ізраілю, Украіны, Румыніі і Бельгіі. З нашых суседзяў ужо выбралі сваіх удзельнікаў Украіна (гурт Go_A з песняй «Салавей») і Літва (гурт The Roop), у найбліжэйшыя дні мусіць вызначыцца з канкурсантам і Расія.
Наогул у 65-м міжнародным песенным конкурсе, які пройдзе 12—16 мая ў Ратэрдаме (Нідэрланды), удзельнічаюць сёлета выканаўцы з 41 краіны, прычым Балгарыя і Украіна вярнуліся пасля гадавога перапынку, а Венгрыя і Чарнагорыя адмовіліся ад удзелу з фінансавых прычын. Дэвіз юбілейнага «Еўрабачання» — «Open Up» («Адкрыйся»), а новы лагатып — кола, складзенае са сцягоў краін-удзельніц.
Вікторыя ЦЕЛЯШУК
Фота eurovіsіon.tv
«Дзесяцігоддзі школьнае харчаванне нашых дзяцей будавалася на аснове зборніка рэцэптур».
Што за таемнымі дзвярыма?
