Вы тут

Найлепшае — выбар журы


Вызначаны пераможцы конкурсу «Нацыянальная літаратурная прэмія — 2019». Сёлета найлепшымі літаратарамі сталі Ігар Пракаповіч, Іван Саверчанка, Уладзімір Сцяпан, Кацярына Хадасевіч-Лісавая, Вольга Нікіценка (Івалга) і Валерый Грышкавец. На прэс-канферэнцыі «“Нацыянальная літаратурная прэмія — 2019” як адлюстраванне сучаснага літаратурнага працэсу», што прайшла ў прэс-цэнтры Дома прэсы, падвялі вынікі літаратурнага спаборніцтва і паразважалі пра важнасць узнагароды.


Падчас прэс-канферэнцыі.

Сёлета на прэмію было прадстаўлена звыш 80 твораў намінантаў. Іх разгледзеў экспертны савет, куды ўваходзяць прадстаўнікі кнігагандлю, сталічнай гарадской і дзіцячай бібліятэкі. Былі праведзены маркетынгавыя даследаванні, каб высветліць, якія творы найбольш карыстаюцца попытам. У выніку да конкурсу былі дапушчаны 64 работы. Затым да працы прыступіла журы, якое вызначыла найлепшыя творы.

Як і звычайна, конкурс праводзіўся ў 7 намінацыях: «Найлепшы твор (зборнік твораў) паэзіі»; «Найлепшы твор прозы»; «Найлепшы твор драматургіі»; «Найлепшы твор публіцыстыкі»; «Найлепшы дэбют» (першая публікацыя ці выданне аўтара ў  жанрах паэзіі, прозы, публіцыстыкі); «Найлепшы твор для дзяцей і юнацтва»; «Найлепшы твор літаратурнай крытыкі і літаратуразнаўства». Так, зборнік аповесцей і апавяданняў «Хвалі» Уладзіміра Сцяпана стаў найлепшым празаічным творам (прадстаўлены і выдадзены выдавецтвам «Мастацкая літаратура»), а выбранае «Застаюся назаўсёды» («Остаюсь навсегда») Валерыя Грышкаўца — пераможца ў намінацыі на найлепшы твор паэзіі (прадстаўлены і выдадзены ў выдавецтве «Беларуская Энцыклапедыя імя П. Броўкі»). Кніга-квэст Кацярыны Хадасевіч-Лісавой «Ключ ад Вялікай Каштоўнасці», прадстаўленая Мінскім абласным аддзяленнем Саюза пісьменнікаў Беларусі і выдадзеная ў Выдавецкім доме «Звязда», стала найлепшым творам для дзяцей. У катэгорыі «Найлепшы твор літаратурнай крытыкі і літаратуразнаўства» журы вылучыла кнігу «Магія слова» Івана Саверчанкі, прадстаўленую і выдадзеную «Мастацкай літаратурай». Найлепшы твор публіцыстыкі напісаў Ігар Пракаповіч — «Пастаўшчына» з серыі «Падарожжа па родным краі» (твор прадстаўлены і выдадзены выдавецтвам «Беларусь»). Зборнік вершаў «Сузор’е птушкі» Вольгі Нікіценкі, прадстаўлены Мінскім гарадскім аддзяленнем Саюза пісьменнікаў Беларусі і выдадзены ў «Мінкапрынт», журы назвала найлепшым дэбютам. Найлепшы твор драматургіі не вызначалі: на конкурс трапіла толькі адна кніга.

Уручэнне прэміі падчас Дня беларускага пісьменства будзе адной з найярчэйшых і знакавых падзей, упэўнена Алена Стэльмах, старшыня журы, першы намеснік старшыні Саюза пісьменнікаў Беларусі. «Таленавітыя аўтары пераадолелі дастаткова складаны шлях у дасягненні гэтай мэты. Вядома ж, калі на конкурс было прадстаўлена шмат цікавых работ, вялікая колькасць аўтараў, то журы не пазайздросціш. Складана вызначыцца з найлепшымі імёнамі. Тым не менш галоўная сутнасць любой прэміі, а тым больш Нацыянальнай літаратурнай, гэта беларуская літаратура, роднае слова, чытанне. Літаратура ўплывае на нашу свядомасць, фармулюе нацыянальную культуру, традыцыі, асобу. Таму трэба добра ўяўляць, што Нацыянальная літаратурная прэмія — не проста ўзнагарода, а тая літаратура, якая значна ўплывае на беларусаў, на наш нацыянальны характар», — зазначыла яна.

Навум Гальпяровіч, намеснік дырэктара канала «Культура» Беларускага радыё, падкрэсліў: нашай літаратуры не хапае глыбокага аналізу, грунтоўнай гаворкі. Трэба больш падрабязна гаварыць пра тое, што пішуць сёння, чым жывуць сучасныя літаратары і літаратура ўвогуле. Па яго словах, творы, прадстаўленыя на Нацыянальную прэмію, сведчаць, што беларуская літаратура жыве і развіваецца.

Конкурс праводзіцца штогод у мэтах падтрымкі развіцця беларускай мастацкай літаратуры і творчасці айчынных пісьменнікаў, стымулявання стварэння новых высокамастацкіх твораў у галіне паэзіі, прозы, драматургіі, публіцыстыкі, літаратурнай крытыкі і літаратуразнаўства для дарослых, дзяцей і юнацтва, папулярызацыі кнігі і чытання ў грамадстве. Нацыянальная літаратурная прэмія зацверджана ў 2015 годзе. Яе заснавальнікі — Міністэрства інфармацыі, Міністэрства культуры, Міністэрства адукацыі і Саюз пісьменнікаў Беларусі.

Яўгенія ШЫЦЬКА

Фота з сайта Дома прэсы

Выбар рэдакцыі

Грамадства

Самы паспяховы сезон! З Аўгустоўскага канала сплылі цеплаходы

Самы паспяховы сезон! З Аўгустоўскага канала сплылі цеплаходы

У некаторыя выходныя цеплаход здзяйсняў па канале дванаццаць рэйсаў.

Палітыка

Крызіс на мяжы. Уся аператыўная інфармацыя на нядзелю (абнаўляецца)

Крызіс на мяжы. Уся аператыўная інфармацыя на нядзелю (абнаўляецца)

Аператыўная інфармацыя з беларуска-польскай мяжы.

Калейдаскоп

Усходні гараскоп на наступны тыдзень

Усходні гараскоп на наступны тыдзень

РАК. Надыходзіць дастаткова актыўны, напоўнены падзеямі тыдзень.

Палітыка

Крызіс на мяжы. Уся аператыўная інфармацыя на суботу (абнаўляецца)

Крызіс на мяжы. Уся аператыўная інфармацыя на суботу (абнаўляецца)

Аператыўная інфармацыя з беларуска-польскай мяжы.