Па мільёне рублёў выдзелена на будаўніцтва новай школы, чатырох спортпляцовак і рэканструкцыю бальніцы. Грашовыя сертыфікаты на развіццё сацыяльнай інфраструктуры ў падарунак да свайго дня нараджэння атрымаў Гомель.
Горад над Сожам адзначае 878 год з моманту заснавання. Старт Дню горада даў канцэрт «З днём нараджэння, любімы Гомель!», якія прайшоў у цэнтральным парку на набярэжнай. Гамяльчан павіншавалі старшыня аблвыканкама Генадзь Салавей і старшыня гарвыканкама — Пётр Кірычэнка.
— Гомель — горад, біццё сэрца якога складаецца з біцця сэрцаў кожнага з нас, — звярнуўся да гараджан і гасцей Гомеля Генадзь Салавей. — Мы разам ствараем атмасферу нашага горада: камфортнага і ўтульнага для жыцця, — адзначыў старшыня Гомельскага аблвыканкама.
Губернатар звярнуў увагу на тое, чаго ўдалося дасягнуць Гомелю за апошні час:
— За апошнія год-два ў Гомелі адкрылася шмат сацыяльных аб’ектаў: тры дзіцячых сада ў Навабеліцкім раёне, басейн, шматфункцыянальны спартыўны комплекс, лыжаролерная траса, крыты футбольны манеж, паліклініка з комплексам цэнтраў калектыўнага карыстання для жыхароў Гомеля і Гомельскага раёна, школа ў новым мікрараёне, куды першага верасня пайшлі больш за тысячу дзяцей. І ўсё гэта робіце вы сваім талентам, сваімі рукамі, — падкрэсліў Генадзь Салавей.
У падарунак да Дня горада губернатар уручыў грашовыя сертыфікаты — па адным мільёне рублёў кожны. Гэтыя сродкі пойдуць на будаўніцтва сярэдняй школы ў 96-м мікрараёне Гомеля, будаўніцтва чатырох спартыўных пляцовак (па адной у кожным раёне горада), рэканструкцыю прыёмнага аддзялення бальніцы хуткай медыцынскай дапамогі.
— Гэта свята аб’ядноўвае ўсіх тых, хто жыве і калісьці жыў у Гомелі і захоўвае яго часцінку у сваім сэрцы, знаходзячыся нават за сотні кіламетраў ад нашага горада. Мы дыхаем гісторыяй Гомеля, яго спадчынай і традыцыямі. Да свайго дня нараджэння горад стаў яшчэ больш прыгожым, — звярнуўся да гараджан старшыня Гомельскага гарвыканкама Пётр Кірычэнка. — Наша задача зараз — перадаць гэта ўсё наступным пакаленням, адстаяць незалежнасць, захаваць Беларусь як астравок бяспекі і стабільнасці ў цэнтры Еўропы.
Між тым падчас святочнага канцэрта былі названыя прадпрыемствы і арганізацыі, якія будуць занесены на гарадскую Дошку гонару па выніках працы за 2019 год.
У сваю чаргу, уздоўж адной з цэнтральных вуліц Гомеля — у скверы імя Грамыкі — разгарнуўся традыцыйны горад майстроў. Яго гасцей чакалі пляцоўка «Горад інклюзія» і фестываль «Вінаград Гомельшчыны», удзел у якім прымалі не толькі мясцовыя вінаградары, але і прадстаўнікі гэтай галіны з усёй Беларусі. Запрашалі да сябе і шматлікія інтэрактыўныя пляцоўкі.
На плошчы Леніна атмасферу маладзёжнага фэсту стварылі ўдзельнікі выставы-кірмашу «Моладзь у прафесіі».
Наталля КАПРЫЛЕНКА
Фота Ганны ПАШЧАНКА
Продаж тавараў праз інтэрнэт у Беларусі актыўна развіваецца.
«Абеліскі параненай зямлі».
АВЕН. На гэтым тыдні фартуна ўсміхаецца вам у многіх справах.
