Загадчыца маларыцкага Цэнтра народнай творчасці Валянціна Мікалаеўна СТРУНЕЦ расказала, што для вытворчасці ахоўных масак яны выкарыстоўваюць у асноўным рэшткі льняной тканіны, што застаюцца ад вырабу касцюмаў.
— Мы яшчэ ў першую хвалю эпідэміі зрабілі некалькі сродкаў індывідуальнай абароны. Знайшлі выкрайкі, пашылі галоўным чынам для сябе, — расказала Валянціна Мікалаеўна. — У звычайных медыцынскіх масках, як правіла, дыхаць цяжка. Ну і падумалі тады пра лён як незамянімы матэрыял з гаючымі якасцямі. Вось яго і скарысталі.
Танюткае палатно, вытканае мясцовымі майстрыхамі, складае ўнутраны слой маскі, зверху яе абшываюць баваўняным палатном з маларыцкім арнаментам. Атрымліваецца і практычна, і арыгінальна, можна дарыць як сувенір. Маска шматразовага выкарыстання, яна добра мыецца.
— Нават самі не чакалі, што такі попыт будзе, — працягвае загадчыца Цэнтра народнай творчасці. — Вось і сёння зайшоў маларытчанін і замовіў пяць штук у падарунак сябрам з Расіі. Некаторыя купляюць маскі менавіта для навагодніх падарункаў.
Святлана ЯСКЕВІЧ
Фота з сайта Цэнтра
Сумесныя праекты ядзерных тэхналогій.