Вы тут

Маладзёжны тэатр эстрады пакажа да 8 сакавіка дзве прэм'еры


 

Маладзёжны тэатр эстрады па традыцыі будзе радаваць сваіх гледачоў святочнымі праграмамі напярэдадні 8 Сакавіка. Нас чакае дзве прэм'еры — «Марафон жаданняў» і «Грэчаскі дзявочнік». Першая праграма раскажа, якія жаданні жывуць у думках жанчын, і дазволіць паназіраць, як на гэта ўплываюць тыпажы Бландзінка, Брунетка і Рудая. А вось другая шоў-праграма заснавана на вядомай многім гісторыі «Дзённік Брыджыт Джонс». Мы распыталі выканаўцу галоўнай ролі «Грэчаскага дзявочніка», актрысу Кацярыну Муратаву, пра яе гераіню.


— Дык якая яна, беларуская Брыджыт Джонс?

— Сімпатычная, мілая, абаяльная, таварыская і ўмее глядзець на жыццё з іроніяй. Яна выглядае недарэчна толькі тады, калі імкнецца іграць нейкую ролю, а калі ж застаецца самой сабой, то выглядае вельмі шчыра, чулліва і забаўна. Яна марыць аб прыгожым прынцы, які скажа ёй: «Ты падабаешся мне такой, якая ты ёсць! Я кахаю цябе». І жыццё ператворыцца ў казку...

— А што для вас значыць гэтае ўжо класічнае «быць самой сабой»?

— На маю думку, гэта, перш за ўсё, уменне чуць свой унутраны голас, здольнасць увасабляць у жыццё покліч душы, не звяртаючы ўвагі на ўстаноўкі грамадства. Вельмі складана зразумець, што табе патрэбна на самай справе, калі ты знаходзішся ў зоне дыскамфорту, і нашмат прасцей, калі ўмовы спрыяльныя. Выдатны спосаб паглядзець на сябе сапраўдную — гэта ацаніць свае паводзіны дома. А ўсё, што пачынаецца з першага кроку за парог кватэры, — гэта надзяванне маскі.

— Што такое жаночая дружба, і ці ўсё ж існуе яна?

— Безумоўна, яна існуе. Дружба — гэта дзівосная і ў пэўнай ступені ўнікальная з'ява ў жыцці кожнага з нас. Я нават не магу сказаць напэўна, хто сябруе лепш, мужчыны ці жанчыны. У кожнага з нас свае прыклады такіх адносін.

— Ці варта з сяброўкамі дзяліцца ўсім, у прыватнасці сакрэтамі? І хто найлепшы дарадца для жанчыны?

— Думаю, сакрэтамі варта дзяліцца, бо для гэтага яны і існуюць! Толькі рабіць гэта трэба з самымі дарагімі і блізкімі сэрцу людзьмі. Але пры любых абставінах найлепшы дарадца для жанчыны — гэта яна сама. Толькі яна ведае, што, калі і ад каго ёй патрэбна.

— Якіх ахвяр не вартая ідэальная знешнасць?

— Прыгажосць не заўсёды дапамагае. Мы часам прыпісваем ёй занадта вялікае значэнне, забываючы пра іншае... Чалавек павінен быць шчаслівы! Калі ён шчаслівы — тады прыгожы!

— Як думаеце, ад таго, бландзінка ты, брунетка ці шатэнка, нешта залежыць?

— Не важна, які колер тваіх валасоў, — галоўнае, каб чалавеку было камфортна ў сваім вобразе. Калі жывеш у гармоніі з сабой і навакольным светам, то ўсе дзверы перад табой адкрытыя. Важна любіць сябе і верыць у свае сілы, і не баяцца памыляцца. Толькі так удаецца знайсці жыццёва патрэбную гармонію.

— На чым трымаецца сямейнае шчасце, і як зберагчы пачуцці на ўсё жыццё?

— Шчаслівая сям'я — гэта не лёс і не ўдача, а пастаянная праца двух людзей, якія кахаюць адно аднаго. Без пачуццяў сямейнага шчасця не пабудуеш, і нават спрабаваць не варта. Да кахання трэба дадаць разуменне, увагу, уменне прасіць прабачэння і прабачаць, а таксама крыху самаахвярнасці... Хоць і гэтага яшчэ мала. Але самае галоўнае звяно ў гэтым ланцужку — жанчына. Яна і ёсць тая сіла, якая беражэ сям'ю. У мужчыны, вядома, таксама ёсць свая роля ў адносінах, і ён па-свойму робіць унёсак у стварэнне шчасця ў сям'і. Аднак прымусіць кагосьці мяняцца ці рабіць тое, што нам хочацца, даволі складана. А саму сябе змяніць лягчэй, таму і пачынаць будаваць шчасце трэба з сябе.

— Чаго вы пажадалі б сабе, найлепшай сяброўцы і ўсім тым жанчынам, якія, магчыма, зараз у нечым расчараваліся?

— Тут згадваецца цытата з фільма «Я не магу вярнуцца назад і паўтарыць тыя ж памылкі. Я павінна ісці далей і рабіць новыя». Давайце будзем любіць сябе і свае памылкі, бо гэта і ёсць гармонія!

Алена ДРАПКО

Фота з архіва гераіні

Выбар рэдакцыі

Культура

Эпоха Гары Мазурава. Гродзенскія мастакі пра сваю першую студыю пры Палацы культуры хімікаў

Эпоха Гары Мазурава. Гродзенскія мастакі пра сваю першую студыю пры Палацы культуры хімікаў

У Гродне ў сярэдзіне вясны прайшла выстава «Настаўнік і вучні», прысвечаная памяці мастака, педагога Гары Мазурава.