Вы тут

Таццяна Рунец: Дагавор неабходна чытаць уважліва


Дагавор неабходна чытаць уважліва. ​Падкрэслівае старшыня Пастаяннай камісіі Савета Рэспублікі па эканоміцы, бюджэце і фінансах Таццяна РУНЕЦ, якая правяла на гэтым тыдні прамую тэлефонную лінію.


Геаграфія званкоў да сенатара была, як звычайна, разнастайная: ёй тэлефанавалі з розных куткоў Беларусі, каб атрымаць параду, папрасіць аб дапамозе, падзякаваць ці проста выказаць сваю прапанову.

Бабруйчанка Ніна Уладзіміраўна расказала сваю гісторыю: заключылі дагавор з прыватнікам аб набыцці аднапакаёвай кватэры пад растэрміноўку на некалькі гадоў. У адным экземпляры была прыведзена адна інфармацыя, у другім — іншая. Людзі падпісалі і толькі пазней даведаліся, што ў другім дакуменце ідзе гаворка аб рэканструкцыі былых збудаванняў вайсковай часці і не аб растэрміноўцы па набыцці жылля, а даванні пазыкі. З гэтым забудоўшчыкам у судзе ўжо ёсць прэцэдэнты, і людзі разгубленыя: што рабіць далей?

Таццяна Рунец падкрэслівае: заўсёды трэба чытаць любы дагавор, які вы падпісваеце, асабліва ўважліва тое, што падаецца дробным шрыфтам. Тым больш калі гэта датычыцца такіх сур'ёзных рэчаў, як набыццё жылля.

— Каб мець магчымасць аказаць вам дапамогу, трэба перш-наперш азнаёміцца з умовамі, з якімі вы пісьмова пагадзіліся, — адзначыла сенатар і прапанавала даслаць копіі дакументаў у профільную камісію, каб тэлефонны званок меў практычны вынік.

Не надта разабралася з умовамі крэдытнага дагавора і жыхарка Івацэвіцкага раёна Валянціна Дзмітрыеўна, якая ў свой час пазычыла грошы ў банка. Установа ліквідавалася, і жанчына не разабралася з тым, каму ж цяпер трэба вяртаць узяты крэдыт. Як вынік — пеня, штраф і пастанова суда аб вылічэнні доўгу з невялікай пенсіі.

— Два гады нічога не пыталі, а тут налічылі пеню і вылічваюць больш за сто рублёў штомесяц, — скардзілася пажылая жанчына.

Аб тым, што ў банка павінен быць правапераемнік, маўляў, нічога не ведала і не чула... Якія папярэджанні дасылалі па пошце, не зразумела...

— Трэба вывучаць дакументы, якія ёсць па гэтай справе, — звярнула ўвагу сенатар і даручыла спецыялістам профільнай камісіі скрупулёзна падысці да вырашэння праблемы, агучанай грамадзянкай.

Падчас прамой лініі былі ўзняты і бытавыя праблемы. Жыхарка Барысаўскага раёна Вольга Уладзіміраўна наракала на суседку, што прывяла ў непрыдатнасць агульную дарогу, якую зрабіла часткай свайго агарода. Дабірацца да ўласнага ўчастка, на якім будуе дом, шматдзетная сям'я можа толькі з дапамогай лясной дарогі. Маладая жанчына сцвярджае, што звярталася да мясцовых улад, ёсць адпаведнае прадпісанне, але справа далей не ідзе. Спецыялісты профільнай камісіі зоймуцца вывучэннем гэтага пытання. Адпаведнае даручэнне дадзена і сенатару, у акрузе якога знаходзіцца гэтая тэрыторыя.

А вось Людмілу Мікалаеўну з аграгарадка Жамчужны, што ў Баранавіцкім раёне, непакояць перабоі ў падачы гарачай вады, таму і скардзілася падчас прамой лініі на камунальныя службы: маўляў, хоць бы папярэджвалі людзей аб такіх непрыемных момантах.

Дарэчы, гэта адзінае, што хвалюе жанчыну. Усім астатнім яна задаволена — унутранай палітыкай, бытавымі ўмовамі, пенсіяй.

Іншы заяўнік — Васіль Адольфавіч са Жлобіна — не наракаў, а пытаў: чаму ўвесь час павышаюць цэны на паліва? Яму паабяцалі даць абгрунтаваны адказ на гэтае пытанне з аргументацыяй адказных асоб з нафтахімічнай галіны.

А вось пенсіянер з Кобрына Уладзімір Львовіч убачыў у існуючых нарматыўна-прававых актах спрэчнае пытанне, якое і вырашыў агучыць з прапановамі аб яго вырашэнні з удзелам сенатарскага корпуса. Гэтую заўвагу паабяцалі разгледзець на базе Брэсцкага абласнога Савета дэпутатаў з запрашэннем усіх зацікаўленых бакоў.

Трэба сказаць, што ўсяго на прамую лінію патэлефанавала 15 чалавек. Акрамя агучаных вышэй тэм, былі выказаны прапановы па паляпшэнні экалагічнай сітуацыі і ахове навакольнага асяроддзя.

Парламентарый дала заяўнікам неабходныя тлумачэнні і рэкамендацыі, дзесяць зваротаў было ўзята на кантроль. Пытанні, якія патрабуюць дадатковага вывучэння, накіраваны ў кампетэнтныя дзяржаўныя органы з просьбай разабрацца ў сітуацыі і праінфармаваць аб выніках Пастаянную камісію.

Вольга АНУФРЫЕВА

Выбар рэдакцыі

Культура

Эпоха Гары Мазурава. Гродзенскія мастакі пра сваю першую студыю пры Палацы культуры хімікаў

Эпоха Гары Мазурава. Гродзенскія мастакі пра сваю першую студыю пры Палацы культуры хімікаў

У Гродне ў сярэдзіне вясны прайшла выстава «Настаўнік і вучні», прысвечаная памяці мастака, педагога Гары Мазурава.