Вы тут

Дзякуючы Ваеннай акадэміі лейтэнанты Алег і Вольга Суны атрымалі афіцэрскія пагоны і стварылі сям'ю


Днямі са сцен галоўнай кузні ваенных кадраў краіны выпусціліся 718 лейтэнантаў. З іх — 15 залатых медалістаў. Выпуск адметны тым, што сёлета Ваенную акадэмію пакінулі як тыя, хто вучыўся пяць гадоў, так і выпускнікі, якія атрымлівалі адукацыю па чатырохгадовай праграме. Аднак наўрад ці гэта важна, хто колькі вучыўся, галоўнае — афіцэрскі строй нашай краіны папоўнілі маладыя і таленавітыя людзі, якія, як і многія іх папярэднікі, з годнасцю стануць на абарону нашай Радзімы.


Многія з іх будуць служыць ва Узброеных Сілах. Сярод іх — Вольга і Алег Суны. І гэта не брат і сястра, а муж і жонка — Ваенная акадэмія стала для іх не толькі другім домам, а і месцам, дзе яны сустрэліся і стварылі сям'ю.

Каб пазнаёміцца з будучымі афіцэрамі бліжэй, карэспандэнты «Звязды» пабывалі ў Ваеннай акадэміі напярэдадні выпуску, акурат у гарачы час іспытаў. Аднак мы не засталі маладых людзей знянацку: Алег і Вольга заўжды добра вучыліся, цяпер сваімі ведамі яны гатовыя дзяліцца на практыцы — у складзе 86-й брыгады сувязі, дзе неўзабаве прыступяць да службы.

Быць вайскоўцамі хацелі з дзяцінства

Алег і Вольга з першага курса вучыліся ў адным узводзе — асвойвалі ваенную навуку на факультэце сувязі і аўтаматызаваных сістэм кіравання. Як той казаў, нічога не прадвяшчала... Вольга — выдатніца, любы прадмет даваўся з лёгкасцю. Ён жа найлепшыя поспехі паказваў у спорце. Алег — кандыдат у майстры спорту па таэквандо, прызёр чэмпіянатаў СНД і Узброеных Сіл па стральбе. З пісталетам Макарава і аўтаматам Калашнікава малады чалавек сапраўды на «ты». Галоўнае, што Вольгу і Алега зблізіла, — гэта любоў да будучай прафесіі, мара стаць афіцэрам.

Вольга родам з Кобрына. У сям'і дзяўчыны афіцэрскія пагоны ніхто не насіў. Таму адкуль у яе, яшчэ школьніцы, з'явілася жаданне атрымаць зусім не жаночую на першы погляд прафесію, яна сама дакладна не ведае. Аднак усведамленне таго, што яна хоча насіць афіцэрскія пагоны, прыйшло рана — невыпадкова Вольга паступіла ў Брэсцкае кадэцкае вучылішча, дзе вучылася чатыры гады. У апошніх класах у яе нават думкі не ўзнікала, што яна выбера грамадзянскі інстытут.

— Па-першае, быць вайскоўцам — гэта прыгожа, — перакананая Вольга Суна. — І я не толькі пра форму: да таго, што на мяне звяртаюць увагу, я прызвычаілася яшчэ ў вучылішчы. Я хутчэй пра грамадзянскі абавязак, гонар і афіцэрскую годнасць.

Алег нарадзіўся і вырас у Бабруйску. Да прафесіі ваеннаслужачага прыгледзеўся таксама ў дзяцінстве. Яшчэ хлопчыкам ён любіў глядзець ваенныя кінастужкі, серыялы пра кадэтаў. Хоць і прыклад быў побач. Бацька Алега — афіцэр міліцыі, служыць у падраздзяленні МУС і сёння. Сімвалічна, што падчас тэрміновай воінскай службы ён таксама быў сувязістам.

Разам не страшна

Бацькі рашэнне сваіх дзяцей стварыць сям'ю падтрымалі. Тыя заспакоеныя, што і падчас вучобы ў акадэміі, і службы, якая ўжо не за гарамі, у любой складанай сітуацыі ім будзе на каго абаперціся. У акадэміі, дарэчы, мала хто ведаў, што маладыя людзі пажаніліся. Хоць людзі яны ваенныя, але вяселле ў іх было як ва ўсіх — з гасцямі, музыкай.

— Падчас вучобы Алег мне дапамагаў з фізкультурай, я яму — з вучобай, — расказвае Вольга. — Неаднойчы прышывала яму шаўроны. Кашулі ж ён прасуе сам — афіцэры рэдка давяраюць гэтую справу жанчынам. Хутка мы будзем жыць асобнай сям'ёй, мяне крыху палохае змена абстаноўкі: да распарадку ў акадэміі за гэтыя гады мы ўжо прызвычаіліся, а тут трэба ўсё пачынаць спачатку. Аднак з Алегам мне не страшна: я з ім як за каменнай сцяной.

Алег — па натуры лідар. Падчас вучобы ён быў старшыной курса — такую адказную місію давераць не кожнаму курсанту. Як прызналіся выкладчыкі Ваеннай акадэміі, у будучыні яны спадзяюцца ўбачыць Алега адным з кіраўнікоў ва Узброеных Сілах, таму чакаюць маладога чалавека на факультэце Генеральнага штаба.

Ну што ж, у добры шлях, лейтэнанты!

Вераніка КАНЮТА

Фота Яна ХВЕДЧЫНА

Загаловак у газеце: На шляху да мары

Выбар рэдакцыі

Эканоміка

Змены ў падатковы кодэкс. Хто заплаціць падатак на кватэру, а хто не?

Змены ў падатковы кодэкс. Хто заплаціць падатак на кватэру, а хто не?

З пачатку года ўступілі ў сілу змены ў Падатковы кодэкс.

Культура

Біблія на беларускай мове: «Галоўнае — абапірацца не на прыдуманыя ўяўленні, а на тысячагадовы вопыт набожных папярэднікаў»

Біблія на беларускай мове: «Галоўнае — абапірацца не на прыдуманыя ўяўленні, а на тысячагадовы вопыт набожных папярэднікаў»

 У 2019 годзе прэміяй «За духоўнае адраджэнне» былі адзначаны перакладчыкі Бібліі на беларускую мову.

Палітыка

Алег Іваноў: Наша супрацоўніцтва — вуліца з двухбаковым рухам

Алег Іваноў: Наша супрацоўніцтва — вуліца з двухбаковым рухам

У бягучым годзе стартуе рэалізацыя 28 інтэграцыйных праграм Саюзнай дзяржавы.

Грамадства

Чым прыцягвае гісторыя ваеннай авіяцыі бераставіцкіх аматараў тэхнічнай творчасці

Чым прыцягвае гісторыя ваеннай авіяцыі бераставіцкіх аматараў тэхнічнай творчасці

Ідэя стварыць гурток авіямадэлістаў у нейкім сэнсе звязана і з размяшчэннем побач з райцэнтрам былога ваеннага аэрадрома.