Нягледзячы ні на што, Алімпійскія гульні застаюцца ў першую чаргу спартыўнай падзеяй. А спаборніцтвы такога ўзроўню – гэта заўсёды гучныя рэкорды. А рэкорды, усталяваныя на Алімпіядах, у разы каштоўней. Быць лепшым сярод лепшых, увайсці ў гісторыю, калі кожны дзень побач ствараюцца сенсацыі - вялікае дасягненне.
Жаночая зборная Германіі па велатрэку ўсталявала сусветны і алімпійскі рэкорд у каманднай гонцы. У кваліфікацыі яны паказалі вынік у 4 хвілін 3,307 секунд. Папярэдні рэкорд – 4 хвіліны 10,236 секунд – належыць прадстаўніцам Вялікабрытаніі, яны ўсталявалі яго на Алімпіядзе 2016 году ў Рыа-дэ-Жанэйра.
Нарвежац Карстэн Вархольм перамог у бегу на 400 метраў з бар’ерамі з сусветным рэкордам – 45,94 секунд. Папярэдняе сусветнае дасягненне таксама належыць яму. 1 ліпеня 2021 году ён прабег гэту дыстанцыю за 46,70 секунд. Таксама Карстэн – пеершы спартсмен, хто выбег з 46 секунд на 400 метрах з бар’ерамі.
Прадстаўніца Аўстраліі 27-гадовая плаўчыха Эмма Маккеон на гэтай Алімпіядзе сабрала 4 залатых і 3 бронзавых медалі на розных дыстанцыях. І тым самым усталявала некалькі рэкордаў. Першы – сем медалёў – лепшае выступленне жанчын за ўсю гісторыю Алімпійскіх гульняў. Гэты рэкорд трымаўся з 1952 году, калі савецкая гімнастка Марыя Гарохаўская заваявала таксама сем узнагарод, але толькі дзве з іх былі залатымі. Другі рэкорд Эммы Маккеон, цяпер яна стала пяціразовай алімпійскай чэмпіёнкай (у 2016 годзе ў яе было два “золата”, две “серабра” і “бронза”). 11 алімпійскіх медалёў у аднаго спартсмена – рэкорд Аўстраліі. Праўда, да рэкорду Майкла Фэлпса ёй пакуль плыць і плыць. У легендарнага амерыканца 23 залатых алімпійскіх медаля, а ўсяго – 28. Сярод жанчын рэкардсменка па колькасці алімпійскіх медалёў – савецкая гімнастка Ларыса Латыніна, у яе іх 18, дзевяць з якіх – вышэйшай годнасці.
Новы рэкорд у скачках у даўжыню сярод жанчын. Юлімар Рохас з Венесуэлы праляцела 15 метраў 67 сантыметраў і пераскочыла дасягненне ўкраінкі Інэсы Кравец – 15 м 50 см, які трымаўся з 1995 году.
Кубінскі барэц Міхан Лопэс Нуньес, які выступае ў вагавай катэгорыі 130 кілаграмаў, у Токіа заваяваў чацвёртае алімпійскае “золата” ў кар’еры і тым самым усталяваў новы рэкорд. У легендарных алімпійскіх чэмпіёнаў Карла Вестэргрэна, Івара Юхансана, Аляксандра Мядзведзя і Аляксандра Карэліна па тры залатых медалі. Пры гэтым, 38-гадовы барэц кар’еру заканчваць не збіраецца.
Грузінскі цяжкаатлет Лаша Талахадзе перамог у катэгорыі звыш 109 кілаграмаў з трыма алімпійскімі рэкордамі. Яго агульны вынік склаў 488 кілаграмаў: 223 у рыўку і 265 у штуршку, што таксама рэкорды. Такім чынам спартсмен пабіў свой жа рэкорд, усталяваны на чэмпіянаце Еўропы 2021 году.
Валерыя СЦЯЦКО
«Дзесяцігоддзі школьнае харчаванне нашых дзяцей будавалася на аснове зборніка рэцэптур».
Што за таемнымі дзвярыма?