Гігін: Нягледзячы на рэгіянальныя адрозненні, мы сапраўды Беларусь адзіная

Пра гэта эксперт заявіў падчас чарговага рэгіянальнага форуму «Беларусь адзіная», які сабраў лідараў грамадскай думкі ў Гомелі.

Удзельнікі сустрэчы — эксперты з Мінска, кіраўніцтва аблвыканкама і актыў рэгіёна— сустрэліся ў канферэнц-зале Гомельскага абласнога грамадска-культурнага цэнтра. Каб паслухаць выступленні спікераў, падзяліцца сваім бачаннем актуальных пытанняў развіцця краіны, у Гомель прыехалі і дэлегацыі ўсіх раёнаў вобласці. Рэгіён на форуме прадставілі кіраўнікі структур і ведамстваў, работнікі сацыяльнай сферы, арганізацый і прадпрыемстваў, дэпутаты, члены грамадскіх аб’яднанняў, журналісты, а таксама актывісты маладзёжнага руху. Абавязковая ўмова — жывы дыялог удзельнікаў. Спікерамі былі вядомыя беларускія палітолагі — Вадзім Гігін, Аляксей Аўдонін, Аляксей Дзермант, Аляксандр Шпакоўскі і Анастасія Баброва.

Эксперты пасля першых сустрэч форумнага марафону адзначылі: падобныя мерапрыемствы дазваляюць плённа абмяркоўваць усе хвалюючыя пытанні. Для рэгіёнаў гэта магчымасць і заявіць пра сябе. Пра важнасць правядзення падобных «мазгавых штурмаў» у абласцях краіны казаў дэкан факультэта філасофіі і сацыяльных навук БДУ Вадзім Гігін. Ён заўважыў, што ідэя належыць менавіта рэгіёнам.

— Да нас звярнуліся з такім пасылам, што свята 17 верасня будзем адзначаць упершыню ў Год народнага адзінства, таму неабходна правесці нейкія акцыі ва ўсіх рэгіёнах краіны. Мы сталі думаць, што арганізаваць, і тут зноў жа самі людзі падказалі — а давайце проста прыедзем і пагаворым. Тыя эксперты, якія выступаюць на тэлеэкранах, на нашых каналах, у нашых сродках масавай інфармацыі, расійскіх, замежных, проста прыедуць і пагутараць з людзьмі. Не было і няма ніякага сцэнарыя, ніякай зададзенай тэмы. Мы вырашылі задаць тыя напрамкі, у якіх кампетэнтныя, — адзначыў дэкан. 

Ён падкрэсліў, што каштоўная сама форма выказвання меркаванняў — гутарка выбудоўваецца такім чынам, што атрымліваецца не лекцыя, а менавіта дыялог. Эксперты хочуць пачуць і данесці ў Мінск (і для сябе зразумець), што думаюць на месцах па актуальных пытаннях нашага грамадска-палітычнага жыцця.

У цэнтры ўвагі рэгіянальных форумаў — палітыка, ідэалогія, геапалітыка, работа сродкаў масавай інфармацыі, эканоміка, сацыяльная сфера. На абмеркаванне выносяцца і такія тэмы, як партыйнае будаўніцтва, канстытуцыйная рэформа, эканамічная мадэрнізацыя. Спікеры выказваюць свае меркаванні, зыходзячы з ацэнак падзей мінулага года.

— Нашы апаненты часта кідаюць папрок, што мы хочам вярнуцца да 9 жніўня. Ды не! Наадварот, бо ўсе гэтыя ўзрушэнні, якія маглі быць навязаныя разам з «каляровай» рэвалюцыяй, усіх нас прымусілі па-новаму паглядзець на сябе, на сваю краіну, — падкрэсліў Вадзім Гігін. — Зарадзілася вельмі шмат пазітыўнага ў гэты перыяд. І мы бачым, што, нягледзячы на рэгіянальныя адрозненні, мы сапраўды Беларусь адзіная! І адказы, якія даюць людзі, выказваюць свае спадзяванні, перажыванні пэўныя, праблемы, якія яны падымаюць, — часта вельмі падобныя. І мы бачым, гэта можна вырашыць толькі ўсім разам.

Паказальна, што дыялогавая форма рэгіянальных сустрэч вельмі запатрабаваная. Спікераў запрашаюць выступіць у розных гарадах, кіраўнікі прадпрыемстваў просяць выступіць перад калектывамі. 

— Мы часта гаворым пра камунікацыі, маючы на ўвазе новыя сродкі адносін, але не трэба грэбаваць жывымі стасункамі. Яны самыя даверныя, — матывуе Вадзім Гігін. 
Спікер перакананы: марафон, які крочыць па краіне напярэдадні Дня народнага адзінства будзем мець працяг. Таму што ёсць такая патрэба ў людзей — выгаварыцца, растлумачыць сваю пазіцыю, пачуць меркаванне іншых, паглядзець на суседнія рэгіёны, і гэта вельмі важна, лічыць ён.

Цікавымі для абмеркавання ў Гомелі сталі выступленні аб перспектывах эканамічнага росту краіны, у тым ліку ў рэгіянальным аспекце. Разгледзелі ўплыў санкцый і ўзаемадзеянне з замежнымі партнёрамі, абмеркавалі перспектывы палітычнай трансфармацыі, статус Усебеларускага народнага сходу, узаемаадносіны з Расійскай Федэрацыяй і будаўніцтва Саюзнай дзяржавы. 

Нагадаем, усяго запланавана правесці 10 рэгіянальных форумаў. Завершыцца работа дыялогавых пляцовак напярэдадні Дня народнага адзінства. 

Наталля КАПРЫЛЕНКА

Фота аўтара