Вы тут

Камунальнікі да зімы гатовыя. А людзі грэюцца і... скардзяцца


Халодны і дажджлівы верасень ізноў вымусіў прымаць рашэнне аб падключэнні цяпла ў садках, школах ды кватэрах беларусаў раней за звычайны тэрмін. Амаль па ўсёй краіне сацыяльныя і жылыя аб'екты ацяпляюцца. У Мінску, напрыклад, абаграваюцца ужо 2,5 тысячы дамоў, а ў Мінскай вобласці прынялі рашэнне абаграваць сваіх жыхароў 11 райвыканкамаў. Да зімы ў Беларусі нарыхтавана, напрыклад, 1,5 млн шчыльных м3 драўнянага паліва і 177,5 тысячы тон саляна-пясчанай сумесі. Адрамантавана 285 тысяч пагонных метраў стыкаў сценавых панэляў і 752 тысячы м2 даху. Тым не менш пашпарты гатоўнасці да зімы цеплакрыніцы, якія абслугоўваюцца камунальнай гаспадаркай, могуць атрымліваць да 30 верасня, і на некаторых аб'ектах пакуль вядуцца работы. Як камунальнікі гатовыя да халадоў, расказалі эксперты.


«Зімовыя» пашпарты і перасовачныя кацельныя

— Работы па цеплавой гаспадарцы і жыллёвым фондзе ў цэлым ужо завершаны, — расказала Святлана ЦІМОШКІНА, намеснік начальніка ўпраўлення камунальнай гаспадаркі і энергетыкі Міністэрства жыллёва-камунальнай гаспадаркі. — 3435 кацельных атрымалі пашпарты гатоўнасці, выдадзены пашпарты і 240 спажыўцам цеплаэнергіі (маецца на ўвазе жылфонд, які абслугоўвае ЖКГ, і камунальныя кацельныя). Заменена 383 кіламетры цепласетак, прафілактычна адрамантаваны сістэмы ацяплення ў 41,5 тысячы дамоў, 37,2 тысячы цеплапунктаў у дамах апрэсаваны. Напагатове 15 перасовачных модульных кацельных і 607 аўтаматычных перасовачных крыніц электразабеспячэння. На беларускіх вуліцах гатовы працаваць 3749 адзінак снегаўборачнай тэхнікі. Для папярэджання магчымых аварый у краіне сфарміравана 719 аварыйна-аднаўленчых брыгад (3400 чалавек).

Ліквідацыя і ўлік аварый і настройка градуса

Важна не толькі аператыўна ўстараніць аварыі, але і не дапусціць іх у будучыні, таму міністэрства сёлета распрацавала метадычныя рэкамендацыі аб парадку збору і перадачы інфармацыі пры ліквідацыі аварый і пашкоджанняў на аб'ектах ЖКГ, засяродзіла ўвагу Святлана Цімошкіна, патлумачыўшы, што ў гэтым дакуменце прапісаны дакладны алгарытм рэагавання на пазаштатныя сітуацыі.

Летась аварый у жыллёвым фондзе падчас падключэння ацяплення не фіксавалася. Былі здарэнні на цеплавых сетках. Па іх выніках распрацаваны сёлетнія планы па замене цепласетак. Мінсккамунцепласеткі, напрыклад, планавалі замяніць 54,5 кіламетра (90 % задачы ўжо выканана), расказала Валянціна ГРЫДЗЮШКА, в. а. намесніка генеральнга дырэктара Мінскай гарадской жыллёвай гаспадаркі.

— Калі адбываецца парыў батарэі ў адной кватэры, адключаецца адна гэта кватэра або ўвесь стаяк у доме. Рамонт у гэтым выпадку праводзіцца за мінімальны час (на працягу некалькіх гадзін). А вось калі рвецца цепласетка, то на час рамонту адключыцца ўжо весь квартал, які сілкуецца ад яе. Усе дамы, якія мы падключаем да ацяплення, стараемся разпаветрываць у той жа дзень. Пасля адразу рэгулююцца сістэмы ацяплення.

Многія батарэі на пачатку пуску цяпла могуць быць занадта гарачыя, а некаторыя — здавацца і нібыта халоднымі. Аднак і тыя, і тыя апальваюцца, запэўнілі спецыялісты. Проста адбываецца працэс рэгуліроўкі цепланосьбіту адпаведна з тэмпературай за акном.

— Паслуга цеплазабеспячэння заключаецца ў падтрымліванні пэўнай тэмпературы ў памяшканні. І чалавек плаціць за тэмпературу не ў батарэі, а за тэмпературу ў памяшканні, што з дапамогай гэтай батарэі ствараецца. Якая пры гэтым тэмпература радыятара — не агаворваецца, — патлумачыў Андрэй ШУЛЬГА, намеснік генеральнага дырэктара жыллёва-камунальнай гаспадаркі Мінскай вобласці ў адказ на звароты карыстальнікаў, якія за два дні ўжо паспелі паскардзіцца, што батарэі і занадта гарачыя, і занадта халодныя.

Мінск гатовы на 100 %, Міншчына даганяе

Аб'ём запланаваных перадзімовых работ у сталіцы цалкам выкананы, а пашпарты гатоўнасці атрымалі 100 % жыллёва-эксплуатацыйных арганізацый. Падчас падключэння ацяплення ў Мінску працуе 82 брыгады (больш за 1000 чалавек), гатовыя аператыўна адрэагаваць на любую аварыйную сітуацыю. А на шыльдах аб'яў сталічных пад'ездаў, дарэчы, вывешаны нумары тэлефонаў дыспетчарскіх службаў ЖЭСаў, каб жыхары маглі ў выпадку чаго дазваніцца да спецыяліста хутчэй і адначасова разгрузіць службу 115, запэўніла Валянціна ГРЫДЗЮШКА.

На Міншчыне пашпарты гатоўнасці па цеплаэнергіі і па цеплакрыніцах атрымалі 90 % аб'ектаў, а работы па падрыхтоўцы да зімы выкананы на 100 %, падзялілася інфармацыяй Таццяна МУЗОК, начальнік аддзела энергетыкі і паліва ўпраўлення жыллёва-камунальнай гаспадаркі, энергетыкі і паліва Мінаблвыканкама:

— Вобласць працягвае нарыхтоўваць запасы паліва на зіму: паліўнага мазуту назапашана 99 %, дроў — 90 %. Да 1 кастрычніка будуць створаны ўсе запланаваныя аб'ёмы.

На балансе ЖКГ Мінскай вобласці знаходзіцца 862 цеплакрыніцы, якія ўсе цалкам гатовыя да нагрузкі ў ацяпляльны перыяд, і 2897 кіламетраў цепласетак, якія выпрабаваны і таксама гатовы да зімы. 960 з 1052 аб'ектаў сацыяльнай сферы Міншчыны ўжо падключаны да цяпла, як і 1215 з 6236 жылых дамоў, што абслугоўваюцца ЖКГ. З 947 дамоў, дзе арганізаваны таварыствы ўласнікаў і іншыя формы кіравання, абаграваецца 91 жылы будынак, распавёў Андрэй Шульга:

— 6236 жылых дамоў Міншчыны ў гэты сезон атрымалі свой аб'ём работ. Адрамантаваны 342 балконы, каля 14,5 тысячы пагонных метраў стыкаў сценавых панэляў, 40 тысяч м2 даху. Нарыхтавана 25 800 тон пясчана-саляной сумесі для апрацоўкі дарог 480 адзінкамі тэхнікі. Створана 119 аварыйна-аднаўленчых брыгад (650 чалавек). Гатовы да работы тры блочна-модульныя кацельныя ў Мінскім, Маладзечанскім і Дзяржынскім раёнах. У прадпрыемстваў ёсць 104 перасовачныя энергакрыніцы.

Ірына СІДАРОК

Фота аўтара

Выбар рэдакцыі

Грамадства

Добраўпарадкаванне. У гарадах, на сельгаспрадпрыемствах, могілках, уздоўж трас і ў дварах

Добраўпарадкаванне. У гарадах, на сельгаспрадпрыемствах, могілках, уздоўж трас і ў дварах

Да канца года ў краіне павінны ліквідаваць усе міні-палігоны для адходаў.

Грамадства

Арктычнае ўварванне на змену цёпламу паветру. Калі чакаць першы снег? Прагноз ад Дзмітрыя Рабава

Арктычнае ўварванне на змену цёпламу паветру. Калі чакаць першы снег? Прагноз ад Дзмітрыя Рабава

З чым звязана такая восеньская зменлівасць надвор’я і калі чакаць першы снег.