Сёння прайшло пасяджэнне Салігорскага райвыканкама з удзелам кіраўніка Адміністрацыі Прэзідэнта Ігара Сергеенкі і старшыні Мінскага аблвыканкама Аляксандра Турчына, перадае БелТА.
На пасяджэнні былі падрабязна разгледжаны існуючыя тэндэнцыі ў пытанні траўміравання і гібелі людзей, якія прымаюцца па розных напрамках меры, накіраваныя на змяншэнне колькасці такіх фактаў. Размова ў тым ліку ідзе аб прафілактыцы ДТЗ і гібелі людзей, вытворчага траўматызму, гібелі пры пажарах, у вадаёмах, ад супрацьпраўных дзеянняў, у выніку атручванняў і злоўжывання наркатычнымі рэчывамі і алкаголем.
Ігар Сергеенка адзначыў, што яго наведванне гэтага пасяджэння было спланавана яшчэ ў студзені, і ён не бачыць чагосьці надзвычайнага ў абстаноўцы, якая складваецца ў раёне.
Аляксандр Турчын, у прыватнасці, закрануў тэму гібелі людзей на вадзе. Паводле яго слоў, месцы адпачынку грамадзян дадаткова абсталёўваюцца выратавальнымі пастамі. І хаця гэта цягне за сабой дадатковыя выдаткі, ён упэўнены, што гэта неабходна. «Мы павінны людзям стварыць цывілізаваныя месцы для адпачынку», — сказаў ён.
Разам з тым губернатар заўважыў, што шмат патанулых у стане алкагольнага ап’янення і яшчэ больш такіх грамадзян выратаваны. «А колькі мы выратавалі! Дарослыя людзі, адэкватныя», — адзначыў Аляксандр Турчын.
«Гэта ж усе грошы. Калі чалавек свядома, напіўшыся, лезе ў ваду, можам прад’явіць яму сумы за нашу работу. Гэта ўсё не бясплатна», — прапанаваў ён.
На пасяджэнні было падкрэслена, што, зразумела, работу па выратаванні, абароне жыцця і здароўя грамадзян дзяржаву і ў далейшым будзе забяспечваць, але людзі павінны і самі разумець меру сваёй сацыяльнай адказнасці.
Тое ж самае тычыцца і гібелі пры пажарах. «Прынцыповая пазіцыя: дзяржава павінна абараняць тых, хто не можа па нейкіх прычынах сам сябе абараніць, — дзеці, якія самотна жывуць. Якія дзеянні прымаць у адносінах да людзей працаздольнага ўзросту, якія маюць звычку выпіць і пакурыць у ложку..., — заўважыў старшыня аблвыканкама — У гэтай працы трэба выразна разумець, дзе роля дзяржавы і дзе роля самога чалавека, бацькоў, якія павінны за гэтым глядзець».
Аляксандр Турчын прапанаваў сканцэнтравацца на тым, чаго не хапае, што яшчэ неабходна зрабіць на ўзроўні дзяржавы, каб максімальна знізіць колькасць няшчасных выпадкаў.
У сваю чаргу Ігар Сергеенка звярнуў увагу, што ў абноўленай Канстытуцыі прадугледжаны меры сацыяльнай адказнасці. «Не толькі гарантыі, але і меры сацыяльнай адказнасці», — падкрэсліў ён.
Кіраўнік Адміністрацыі Прэзідэнта адзначыў, што ў рамках работы над заканадаўствам у развіццё Канстытуцыі трэба «па канкрэтных пазіцыях падумаць, дзе і як гэта адлюстраваць».
Становішча няпростае, але не крытычнае. Аб гэтым заявіў журналістам кіраўнік Адміністрацыі Прэзідэнта Ігар Сергеенка, каменціруючы сітуацыю ў калійнай галіне, па выніках пасяджэння Салігорскага райвыканкама, у якім ён прыняў удзел, перадае БелТА.
«Абстаноўка няпростая, але не крытычная. Ідзе пошук рашэнняў. Прадпрыемства працуе», — падкрэсліў Ігар Сергеенка.
Ён адзначыў, што Салігорскі раён сёння — гэта, па сутнасці, трэць прамысловага патэнцыялу Мінскай вобласці: «Салігорск — гэта „Беларуськалій“. Гэта 16,5 тыс. працуючых на гэтым прадпрыемстве. Так, ва ўмовах санкцый, штучна створаных нам праблем з транспарціроўкай прадукцыі па вядомых каналах праз парты Балтыі (апошнім часам парушана транспарціроўка і праз Украіну) даводзіцца перабудоўваць лагістыку, працаваць з іншымі партнёрамі. Працаваць з Кітаем, больш актыўна працаваць з Расіяй».
Разам з тым прадпрыемства дынамічна развіваецца, абстаноўка ў калектыве стабільная. «Так, ёсць пэўныя цяжкасці. Але хацеў бы адзначыць, што працуе ў гэтым плане не толькі кіраўніцтва прадпрыемства, але і ўрад нашай краіны. Прымаюцца меры, разглядаюцца на пасяджэнні аператыўнага штаба, каб пераарыентаваць тую прадукцыю», — сказаў кіраўнік Адміністрацыі.
Ён звярнуў увагу, што беларускія калійныя ўгнаенні неабходны ў іншых краінах. «Тыя палітыкі, якія ўводзілі санкцыі адносна Беларусі, не думалі аб сваім народзе. Санкцыі б’юць не толькі па тых, супраць каго ўводзяцца, але і па тых, хто ўводзіць. Гэта яскравы прыклад — угнаенні. Тым больш напярэдадні пасяўных работ», — падкрэсліў Ігар Сергеенка.
Па словах кіраўніка Адміністрацыі на паседжанні ў цэлым абмяркоўваліся пытанні захавання дысцыпліны ў шырокім сэнсе слова. «Таму што сёння ад дысцыпліны, арганізаванасці на ўсіх узроўнях (і кіраўнікоў, і працоўных калектываў, кожнага на сваім працоўным месцы) залежыць развіццё нашай дзяржавы. Ва ўмовах санкцый, выклікаў і новых пагроз, інфармацыйнай вайны ад дысцыпліны, згуртаванасці залежыць сур’ёзны складнік любога выніку», — падкрэсліў Ігар Сергеенка.
«Сёння актуальна стаіць пытанне аб тым, што ж павінны прадпрымаць самі грамадзяне — аб мерах сацыяльнай адказнасці. Дарэчы, гэтая норма знайшла адлюстраванне ў абноўленай Канстытуцыі. Таму ў законапраектах, якія рушаць услед за Канстытуцыяй, трэба будзе таксама прапісаць і адказнасць нашых грамадзян за выкананне тых ці іншых канкрэтных норм, якія ўплываюць і на дысцыпліну, і на бяспеку», — адзначыў Ігар Сергеенка.
Фота: БелТА
Сумесныя праекты ядзерных тэхналогій.
