У выхадныя і ў першыя дні наступнага тыдня — мокры снег з дажджом

З надвор'ем не адгадаеш. Здавалася б, прайшла ўжо цэлая палова другога месяца вясны, а ўстойлівага цяпла мы яшчэ не бачылі. З самых першых дзён месяца ў нашай краіне пераважае паніжаны тэмпературны фон, дадаткам да якога становяцца ападкі ў выглядзе дажджу, мокрага снегу, а таксама парывісты вецер.

Толькі асобныя дні нагадваюць, што за вокнамі ўжо сярэдзіна вясны. Яшчэ ў апошні працоўны дзень тыдня тэрыторыя Беларусі будзе пад абаронай вобласці павышанага атмасфернага ціску і цёплых паветраных мас з Заходняй Еўропы, але... Паветраныя патокі зноў зменяць свой кірунак, і ў нашу краіну пачне паступаць халоднае паветра паўночных шырот, тэмпературны фон панізіцца, і ў выхадныя будзе ўжо ніжэй за кліматычную норму, паведамляюць спецыялісты Рэспубліканскага цэнтра па гідраметэаралогіі, кантролі радыеактыўнага забруджвання і маніторынгу навакольнага асяроддзя Мінпрыроды.

А таму, у пятніцу ўначы па паўночным захадзе краіны, а ўдзень на большай частцы тэрыторыі пройдуць дажджы. Да вечара ў паўночных раёнах магчымы мокры снег, удзень — навальніцы. Вецер чакаецца паўднёва-заходні, удзень з пераходам на паўночна-заходні 4–9 м/с. Тэмпература паветра ўначы складзе плюс 2–8 градусаў, па паўднёвым усходзе месцамі ад 0 да 1 цяпла. Удзень чакаецца 8–14 градусаў вышэй за нуль, па паўднёва — ўсходняй палове краіны — плюс 15–19 градусаў.

Нядобрыя сюрпрызы ад надвор’я пачнуцца ўжо ў суботу. У гэты дзень часам пройдуць мокры снег і дождж. Удзень месцамі па краіне будзе ўзмацненне ветру парывамі да 15–20 м/с. Тэмпература паветра ўначы складзе ад 0 градусаў па паўночным захадзе да плюс 8 па паўднёвым усходзе краіны, удзень — 3–10 цяпла.

Адкрыта холадна стане ў нядзелю. У апошні дзень тыдня над большай частцы краіны чакаюцца кароткачасовыя ападкі ў выглядзе мокрага снегу і дажджу. Тэмпература паветра ўначы будзе ад мінус 3 градусаў да 3 цяпла. Удзень паветра прагрэецца да 2–8 градусаў вышэй за нуль, па паўднёвым захадзе — да 10 цяпла.

Паводле папярэдніх прагнозаў айчынных сіноптыкаў, «гідкае» для красавіка надвор’е захаваецца і ў першыя дні наступнага тыдня. У панядзелак, уначы месцамі, а ўдзень на большай частцы краіны пройдуць кароткачасовыя ападкі ў выглядзе мокрага снегу і дажджу. Тэмпература паветра ўначы складзе ад мінус 3 градусаў да плюс 4 градусаў, удзень чакаецца 2–8 цяпла, месцамі да 10 градусаў вышэй за нуль.

У аўторак у многіх раёнах краіны будуць дажджы, удзень месцамі моцныя, а ўначы па паўднёвым захадзе магчымы мокры снег. Уначы тэмпература складзе ад нуля да 5 цяпла, удзень — ад плюс 4 градусаў да 12 цяпла. Па ўсходзе краіны ўначы 6–8 цяпла, удзень — плюс 13–15 градусаў.

Сяргей КУРКАЧ

Фота Маргарыты ПАЛЮХОВІЧ