Рэспубліканскі конкурс працоўных дынастый прайшоў у Мінску

У Мінску прайшоў рэспубліканскі конкурс працоўных дынастый. За званне «Найлепшая працоўная дынастыя — 2022» на сцэне Палаца культуры Мінскага трактарнага завода змагаліся 11 сем'яў з розных прамысловых прадпрыемстваў Беларусі.

Фотакалажы, творчыя нумары, віктарыны... Кожная дынастыя дэманстравала на сцэне відэапрэзентацыю, а таксама прадстаўляла сябе ў вольнай форме. Сярод выпрабаванняў, за якія сем'і атрымлівалі балы — квіз, які складаўся з пытанняў, прысвечаных Году гістарычнай памяці і гісторыі роднага завода.

Ініцыятарам конкурсу ўжо другі год запар выступае аб'яднаная арганізацыя прадпрыемстваў Міністэрства прамысловасці ГА «Беларускі саюз жанчын».

— Сёлета мы атрымалі шмат заявак з усіх рэгіёнаў Беларусі, — адзначыла Наталля Медзвядзіцкава, намеснік старшыні ГА «БСЖ» Міністэрства прамысловасці. — Для ўдзелу ў фінале адабралі па адной дынастыі з кожнага холдынга. Сярэдні працоўны стаж такіх дынастый на адным прадпрыемстве — каля 170 гадоў!

Паводле слоў старшыні галіновага прафсаюза «БЕЛПРАФМАШ» Валерыя Курсевіча, утварэнне працоўных дынастый — добры паказчык стабільнасці прадпрыемства, дзе вопыт і навыкі перадаюцца з пакалення ў пакаленне, ад бацькоў да дзяцей. Бо працоўная пераемнасць з'яўляецца ў тых сем'ях, у якіх старэйшыя пакаленні любяць сваю прафесію, прадпрыемства, дзе займаюцца сваёй справай з задавальненнем і адданасцю. Сям'я — самае блізкае і дарагое асяроддзе чалавека. Калі гэта не проста сям'я, а працоўная дынастыя, дзе прадстаўнікі некалькіх пакаленняў выбралі адно і тое ж месца працы — гэта ўжо сапраўдная сямейная традыцыя.

Першае месца па выніках конкурсу заняла працоўная дынастыя Мінскага трактарнага завода Рабашэнка-Чумак, сукупны агульны стаж работы на прадпрыемстве якой 251 год. На другім — сям'я Філановіч-Літаш, якая прадстаўляла Беларускі металургічны завод. Трэцяе месца атрымала дынастыя Міхейчык з Беларускага аўтамабільнага завода. Пры вызначэнні пераможцаў ацэньваліся прэзентацыі сваёй сям'і і прадпрыемства, і, вядома ж, значнасць іх працоўнага ўкладу ў поспехі роднага завода.

Усе ўдзельнікі конкурсу атрымалі вымпелы, грашовыя сертыфікаты і торты. Пераможцы ж запрошаны на святочны канцэрт, прысвечаны прафесійнаму святу — Дню машынабудаўніка, які адбудзецца 23 верасня ў Палацы культуры «Гомсельмаш». Менавіта там ім ва ўрачыстай атмасферы ўручаць каштоўныя падарункі — тэлевізары.

Надзея ДРЫНДРОЖЫК