Віктар Шніп, які працуе галоўным рэдактарам выдавецтва «Мастацкая літаратура» і адначасова — галоўным рэдактарам штомесячнага літаратурна-мастацкага часопіса «Полымя», не перастае ўражваць новымі мастацкімі знаходкамі. Паэт, празаік, перакладчык, ён толькі што выдаў у выдавецтве «Чатыры чвэрці» кнігу вершаў «Партрэты». Зборнік пабачыў свет у серыі «Бібліятэка лаўрэатаў Нацыянальнай літаратурнай прэміі Беларусі», якая заснавана ў згаданым выдавецтве яшчэ ў 2018 годзе.
«з белых бялюткіх снягоў/ як з пены тутэйшага мора/ сонца ўзышло над Полацкам/ і раптам чарнець пачало/ як вугаль/ як чорная кропка/ пры канцы сказа/ як пры канцы свету/ свету дзе цябе не было/ і ты нарадзіўся/ і сонца зноў засвяцілася/ як шлях у Заўтра/ і стала светла/ і ў Полацку/ і ў Вялікім Княстве...» («Сонца Францішка Скарыны (каля 1490 — 1551)»).
«Невымоўнае Вінцэнта Дуніна-Марцінкевіча (4.02. 1808 — 17.12. 1884)», «Душа Францішка Багушэвіча (21.03. 1840 — 28.04. 1900)», «Зямля Фердынанда Рушчыца (10.12. 1870 — 30.10. 1936)», «Ліпень Янкі Купалы (7.07. 1882 — 28.06. 1942)», «Лістапад Якуба Коласа (3.11. 1882 — 13.08. 1956)»... Разам са сваімі героямі паэт падарожнічае па розных стагоддзях, сваім паэтычным пранікненнем у сутнасць іх жыццяў як вялікіх, адметных для Беларусі з’яў асэнсоўвае нашу гісторыю, нашу культуру, нашу літаратуру...
На старонках кнігі «Партрэты» чытача чакаюць сустрэчы з Янкам Маўрам, Максімам Гарэцкім, Кузьмою Чорным, Васілём Віткам, Максімам Танкам, Янкам Брылём, Піменам Панчанкам, Іванам Мележам, Леанідам Шчамялёвым...
Бог
ствараючы Свет
браў гліну
у тваім Глінішшчы
а ты браў святло з песень
што маці спявала
прадучы кудзелю
якая рабілася ніткаю
яднаючы мінулае з будучым
і ты браў словы
што бацька казаў
робячы гонты дзежы ў хатах
і ў наваколлі
дзе ты хлапчуком пасвіў авечак
цялят кароў коней
і слухаў казкі травы
і балады камянёў
каб потым чуць подых навальніцы
блізкі і далёкі
і занатаваць для вечнасці
(«Святло Івана Мележа (8.02. 1921 — 9.08. 1976)»
«Партрэты» прыцягваюць, прымушаюць разважаць над многімі рэчамі, з’явамі, якія існуюць і ў літаратуры, і, зразумела, у самім жыцці. «...і ты малюеш партрэты/ нібы пакідаеш на сваёй сцяжыне/ пазнакі/ па якіх можна вярнуцца/ дамоў/ не толькі табе/ але і тваім родным/ каханым і кумірам/ і ўсім/ хто выйшаў з дому/ каб пазнаць белы свет...» Ідэя спасціжэння, новых адкрыццяў, ідэя руху наперад, заснаваная на веданні ранейшага жыцця, традыцый, — у гэтым і закладзены сакрэт новай кнігі Віктара Шніпа «Партрэты», які ў чарговы раз выяўляе сябе пісьменнікам-мысляром, чуйным да прасторы і часу.
Набыць кнігу «Партрэты» можна ў кнігарні «Акадэмкніга» па адрасе: Мінск, праспект Незалежнасці, 72.
Сяргей ШЫЧКО
З мастацтвам па жыцці.
Баявое ўзаемадзеянне найвышэйшага ўзроўню.
«Дзесяцігоддзі школьнае харчаванне нашых дзяцей будавалася на аснове зборніка рэцэптур».