Беларускаму саюзу мастакоў — 85

На мінулым тыдні камерная зала Вялікага тэатра Беларусі поўнілася шматлікімі гасцямі. Нагода не была звязана са светам музыкі. Пляцоўка выбрана для ўрачыстага мерапрыемства — святкавання 85-годдзя Беларускага саюза мастакоў. Гучалі словы падзякі, уручылі ўзнагароды творцам, якія плённа працавалі на карысць развіцця айчыннага мастацтва. Хоць без музыкі і спеваў не абышлося — віншавалі мастакоў артысты Вялікага тэатра: народная артыстка Анастасія Масквіна, брас-квінтэт A.M.A.D.I.S.Brass, спевакі Аляксандр Гелах, Аляксандр Міхнюк, Дар’я Гаражанка і Андрэй Мацюшонак. 

Спачатку мастакоўскую супольнасць павіншаваў са святам першы намеснік міністра культуры Валерый Грамада. Ён нагадаў пра значную ролю арганізацыі ў культурным жыцці краіны і пажадаў членам Беларускага саюза мастакоў бясконцага творчага натхнення. «Саюз аб’ядноўвае больш за тысячу чалавек. Сярод іх — народныя мастакі Беларусі, заслужаныя дзеячы мастацтваў, лаўрэаты Дзяржаўнай прэміі, прэміі Прэзідэнта Рэспублікі Беларусь. І, безумоўна, саюз — адна з самых буйных, самых уплывовых творчых арганізацый нашай краіны. А вынік яго працы — гэта маштабныя міжнародныя і рэспубліканскія конкурсы, пленэры, гэта творы, якія сёння ўпрыгожваюць нашы гарады, інтэр’еры грамадскіх будынкаў, выставачныя залы нашых музеяў», — адзначыў Валерый Іванавіч. Асаблівая ўдзячнасць ад Міністэрства культуры — найлепшым аўтарам. Валерый Грамада ўручыў узнагароды Івану Міско, Уладзіміру Уроднічу, Мікалаю Апіёку, Віктару Барабанцаву, Ларысе Журавовіч і Аляксандру Дранцу. 

Першы намеснік міністра таксама зачытаў віншавальны ліст ад старшыні Савета Рэспублікі Наталлі Качанавай. «Увесь гэты час саюз выконвае важную місію па стварэнні і захаванні нацыянальных мастацкіх каштоўнасцей, пошуку і падтрымцы маладых талентаў, садзейнічае развіццю, прапагандзе і рэалізацыі ўсіх відаў і жанраў беларускага выяўленчага мастацтва. Дзякуючы намаганням многіх пакаленняў удзельнікаў аб’яднання на свет з’явілася шмат цудоўных твораў, якія перадаюць непаўторную прыгажосць Беларусі, яе гістарычную і духоўную спадчыну. Саюз аб’ядноўвае пад сваім крылом таленавітых і неабыякавых людзей, усім сэрцам адданых роднай зямлі», — адзначыла ў віншаванні Наталля Качанава.

Прагучала таксама віншаванне ад Веніяміна, Мітрапаліта Мінскага і Заслаўскага, Патрыяршага Экзарха ўсяе Беларусі. Цёплыя словы ў адрас кіраўніцтва і творцаў Беларускага саюза мастакоў прагучалі ад прадстаўнікоў Беларускага прафесійнага саюза работнікаў культуры, інфармацыі, спорту і турызму і ўпраўлення культуры Мінскага гарадскога выканаўчага камітэта. Саветнік па культуры Пасольства Кітайскай Народнай Рэспублікі ў Рэспубліцы Беларусь спадар Ся Гуань Юань адзначыў уклад творчай суполкі ў развіццё культурнага супрацоўніцтва паміж краінамі: «За 85 гадоў Саюз мастакоў ніколі не перарываў сувязь з кітайскай культурай. Асабліва апошнія гады кантакты становяцца больш цеснымі». 

Напрыканцы ўрачыстай цырымоніі слова ўзяў старшыня БСМ Глеб Отчык: 

— Сёння мы падводзім вынікі нашай дзейнасці, якая абапіраецца на магутны падмурак — нашых народных мастакоў. І мы працягваем рабіць сур’ёзныя крокі наперад. За чатыры гады Беларускі саюз мастакоў павялічыў выставачную дзейнасць у тры разы, нягледзячы на пандэмію. У нас падпісана 12 пагадненняў аб супрацоўніцтве з Кітайскай Народнай Рэспублікай, плануюцца выезды ў Башкартастан і Татарстан, шырока ахопліваем тэрыторыю ад Ніжняга Ноўгарада да глыбінак. Праектаў вельмі шмат! 

Дарэчы, у фае Вялікага тэатра прадстаўлена святочная выстаўка «85 гадоў разам». Дэманструецца жывапіс мастакоў — сяброў творчага саюза розных гадоў стварэння з фондаў БСМ. Пейзажы, нацюрморты належаць пэндзлям Мацвея Беляніцкага, Вячаслава Кубарава, Юрыя Зайцава, Аляксандра Кішчанкі, Івана Пушкова, Святланы Катковай ды іншых творцаў. 

Яўгенія ШЫЦЬКА

Фота з сайта sb.by