Цяжка ў вучэнні — лёгка ў паветры

У Віцебскай асобнай гвардзейскай паветрана-дэсантнай брыгадзе ўжо каторы раз прайшлі заняткі па паветрана-дэсантнай падрыхтоўцы. Вайскоўцы легендарнага воінскага злучэння правялі наземную адпрацоўку элементаў скачка з парашутам у поўным баявым рыштунку, дзеянні пры сыходжанні і правільнае прызямленне на розныя аб’екты: дамы, дрэвы, лініі электраперадачы, азёры і гэтак далей. Кожны рух павінен быць даведзены да аўтаматызму — у небе не будзе афіцэра, які падкажа, як усё правільна зрабіць. Спойлер: нашы гвардзейцы-дэсантнікі на «выдатна» справіліся з пастаўленай вучэбнай задачай.

Вайскоўцы адпрацавалі скачкі з парашутнага трампліна, макета верталёта «МІ-8», луналі над зямлёй у падвеснай сістэме на стапелях падвесных сістэм. Асаблівую ўвагу надалі дэсантаванню з вышыннага комплекснага трэнажора — макета сапраўды гіганцкага самалёта «ІЛ-76». Мужчынам падрабязна распавялі пра размяшчэнне ў самалёце і верталёце, дзеянні па камандах «Прыгатавацца!», «Пайшоў!», «Адставіць!», пра аддзяленне ад верталёта і самалёта, адлік часу, выдзіранне звяна ручнога раскрыцця.

Сучасныя парашутна-дэсантныя сістэмы гарантуюць бяспечнае зніжэнне парашутыста-дэсантніка, але шчасны зыход скачка з парашутам забяспечваецца граматнай эксплуатацыяй гэтых сістэм, уменнем парашутыста-дэсантніка валодаць імі ў асаблівых выпадках і бездакорным выкананнем усіх правілаў здзяйснення скачка.

Скачкі з парашутам — адзін з самых складаных і адказных этапаў паветрана-дэсантнай падрыхтоўкі. Добрая фізічная падрыхтаванасць, смеласць, уменне хутка арыентавацца і дзейнічаць у любой складанай абстаноўцы пры выкананні скачка з парашутам дасягаюцца пры старанна прадуманай і ўсебаковай наземнай падрыхтоўцы, адпрацоўцы розных практыкаванняў, якія ўлічваюць умовы абстаноўкі выканання баявой задачы, без якіх нельга дапускаць парашутыстаў-дэсантнікаў да практычных скачкоў з парашутам. Заняткі па наземнай адпрацоўцы элементаў скачка з парашутам праводзяцца на спецыяльна абсталяваным паветрана-дэсантным комплексе. 

У брыгадзе ніколі не забываюць пра важнасць выканання правілаў тэхнікі бяспекі. На кожнай вучэбнай кропцы ў абавязковым парадку прысутнічалі вопытныя кіраўнікі заняткаў, за плячыма якіх — дзясяткі скачкоў.

Для вайскоўца другой парашутна-дэсантнай роты гвардыі яфрэйтара Андрэя АСЕКАВА з горада Орша Віцебскай вобласці заняткі па паветрана-дэсантнай падрыхтоўцы — самыя любімыя. За плячыма маладога чалавека — ужо больш за адзін год службы і два дасканалыя скачкі.

«Першы свой скачок здзейсніў з самалёта „АН-2“, другі — з „ІЛ-76“, — расказвае ваеннаслужачы. — Перад гэтай сапраўды важнай у жыцці кожнага дэсантніка падзеяй — сотні гадзін падрыхтоўкі. Гэта невымоўныя адчуванні, калі ляціш высока-высока ў небе, на вышыні 800 метраў пры найвелізарнай хуткасці самалёта. Аж дух захоплівае!»

Першы раз, прызнаецца суразмоўца, скакаць было страшнавата. «Галоўнае — сабраць усю сваю волю ў кулак і зрабіць гэта, — заўважае Андрэй. —Праўду ж кажуць — «Ніхто, акрамя нас!», «Цяжка ў вучэнні — лёгка ў паветры». Другі свой скачок малады дэсантнік здзейсніў ужо без страху, але ўсё роўна з хваляваннем. Суразмоўца ўпэўнены, што ўсё прыйдзе з вопытам.

Да прызыву на тэрміновую ваенную службу Андрэй на працягу шасці гадоў займаўся вольнай барацьбой. Першапачаткова, па словах гвардзейца, яго хацелі размеркаваць у спортроту, але з-за праблемы з каленам трапіць туды не ўдалося. А вайсковец і не хвалюецца — хутчэй наадварот, рады, што трапіў менавіта ў парашутна-дэсантную роту, бо заўсёды марыў скакаць з парашутам. Акрамя таго, адзначае гвардыі яфрэйтар, у яго падраздзяленні найлепшыя камандзіры, афіцэры і зладжаны калектыў.

Андрэй Асекаў — старэйшы кіроўца. На працягу трох месяцаў вайсковец праходзіў навучанне па праграме падрыхтоўкі механікаў-вадзіцеляў БТР-70 у 72-м гвардзейскім аб’яднаным навучальным цэнтры, дзе паспяхова здаў экзамены па ваджэнні. У далейшым малады чалавек плануе вярнуцца ў Оршу, дзе яго з нецярпеннем чакаюць родныя і блізкія.

Данііл ХМЯЛЬНІЦКІ, ваеннаслужачы Віцебскай асобнай гвардзейскай паветрана-дэсантнай брыгады

Фота аўтара

г. Віцебск.