Вы тут

Міністр энергетыкі расказаў пра вынікі і планы спажывання электраэнергіі ў краіне


Штодня Беларуская АЭС (у складзе двух энергаблокаў) выпрацоўвае звыш 55 млн кВт•г электраэнергіі і ўжо выпрацавала 21,8 млрд кВт•г, дзякуючы чаму краіна зэканоміла 5,8 млрд м3 прыроднага газу. Прагназуецца, што да канца года краіна спажыве 41 млрд кВт•г электраэнергіі, да 28% якой будзе забяспечана атамнай станцыяй. А ў бліжэйшае пяцігоддзе плануецца збудаваць каля 2 млн м2 электражылля.


Мільярды кілават, тысячы кіламетраў

Попыт на электраэнергію ў краіне з боку рэальнага сектара эканомікі і насельніцтва павялічваецца. За 11 месяцаў агульны аб’ём яе спажывання падрос на 2,3 млрд кВт•г (на 6,6% да леташняга аналагічнага перыяду) і склаў 37,1 млрд кВт•г электрычнасці, расказаў міністр энергетыкі Віктар Каранкевіч:

— Пры гэтым па асобных кірунках, дзе былі прынятыя стымулюючыя меры, рост электраспажывання вышэйшы, чым па рэспубліцы. У рэальным сектары эканомікі спажыванне павялічылася на 8,5%, на аказанне паслуг па зарадцы электратранспарту — на 23%, на патрэбы гарачага водазабеспячэння і ацяплення насельніцтва — на 38,4%.

16 снежня на першым энергаблоку завершаны другі планава-папераджальны рамонт, падчас якога частка адпрацаванага ядзернага паліва (заменена 42 са 163 цеплавыдзяляльных зборак з палівам) была заменена і змешчана ў басейн вытрымкі. Свежае паліва загрузілі ў рэактар, паведаміў міністр:

— Праведзена рэвізія абсталявання рэактарнай устаноўкі, турбагенератара, галоўных цыркуляцыйных помпаў і іншага абсталявання і тэхналагічных сістэм. Зроблены кантроль металу і дыягностыка зварных злучэнняў абсталявання.

Сёлета ў краіне ўжо пабудавана і мадэрнізавана звыш 2,1 тысячы кіламетраў ліній электраперадачы, а па выніках года лічба будзе яшчэ большай. Мадэрнізавана і ўзведзена больш за 20 падстанцый, найбольш значныя з якіх «Паўночна-Заходняя», «Атлант», «Жабінка», «Камвольны камбінат», «Дубрава», «Аэрадромная», «Чаркасы».

— Большасць з гэтых праектаў рэалізаваны з прымяненнем найноўшых тэхналогій па лічбавізацыі, ва ўсіх падстанцыях выкарыстаны сістэмы аўтаматызацыі тэхналагічных працэсаў, што істотна павышае надзейнасць энергазабеспячэння спажыўцоў, — адзначыў кіраўнік энергетычнага ведамства.

На ацяпленне і гарачую ваду

Электраэнергія, якую выпрацоўвае БелАЭС, таксама шырока выкарыстоўваецца для электрыфікацыі жылля, і гэтыя работы вядуцца у некалькіх кірунках. Будаўніцтва новых шматкватэрных і індывідуальных электрадамоў, дзе адразу закладзена выкарыстанне электрычнасці для ацяплення і падагрэву вады. З 2021-га да цяперашняга часу было пабудавана звыш 1 млн м2 электражылля.

Перавод шматкватэрнага жылфонду з пячнога ацяплення на электраэнергію. У графікі гэтых работ на пяцігоддзе ўключана каля сотні такіх дамоў у розных рэгіёнах краіны. Ужо мадэрнізаваны знешнія сеткі для пераводу 19 дамоў на выкарыстанне электрычнасці для ацяплення і падагрэву вады.

Перавод індывідуальнага жылля на электрычнае ацяпленне і гарачае водазабеспячэнне. За гэты год у энергазабяспечваючыя арганізацыі паступіла 22,9 тысячы зваротаў грамадзян на атрыманне тэхнічных умоў, з якіх 94,6% (21,7 тысячы зваротаў) было задаволена.

— У 5,4%, якія засталіся незадаволенымі, трапілі грамадзяне, якія пражываюць у населеных пунктах, дзе ўжо праведзена мадэрнізацыя электрасетак, але людзі паўторна не звярнуліся за атрыманнем тэхнічных умоў, хаця энергазабяспечваючыя арганізацыі ім пра гэта паведамілі; грамадзяне, якія жывуць у мястэчках, якія газіфікаваны (дзе ёсць вулічныя газаправоды) і дзяржавай ужо створаны ўмовы для больш камфортнага спажывання прыроднага газа для ацяплення.

Адпаведна, з перспектыўнымі планамі і інвестыцыйнымі праграмамі, якія распрацоўваюцца кожны год, прадугледжваецца мадэрнізацыя і рэканструкцыя сетак у тых населеных пунктах, дзе звароты грамадзян не змаглі задаволіць. На 2021-2025 гады сфарміраваны (па ўзгадненні з аблвыканкамамі) перспектыўныя планы мадэрнізацыі электрасетак, якія ахопліваюць больш за 5,7 тысячы кіламетраў электрасетак і звыш 1500 населеных пунктаў, дзе будзе магчыма наладзіць выкарыстанне электрычнасці для падагрэву вады і ацяплення, удакладніў Віктар Каранкевіч:

— Мы падрыхтавалі адпаведныя прапановы адносна магчымасці выкарыстання электраэнергіі для падагрэву вады і ацяплення ў населеных пунктах, якія газіфікаваны. Ёсць пэўныя сітуацыі, дзе, магчыма, трэба выпрацоўваць у тым ліку і нестандартныя прапановы і падыходы. Яны сфарміраваны і ўнесены ў Савет міністраў у выглядзе адпаведнага праекта пастанаўлення. У найбліжэйшы час па дакуменце, спадзяюся, будзе прынятае адпаведнае рашэнне. 

І там будуць адказы на абазначанае пытанне.

Газ для нас, торф — на экспарт

Разам з электрыфікацыяй жылля праводзіцца і яго газіфікацыя. Па ўзроўні газазабеспячэння Беларусь у лідарах сярод краін СНД. Сёння газіфікаваны ўсе абласныя і раённыя цэнтры, гарады і пасёлкі гарадскога тыпу, а таксама больш як 3,6 тысячы сельскіх населеных пунктаў, падзяліўся лічбамі міністр:

— У эксплуатацыю сёлета ўведзена 818 кіламетраў газаправодаў розных катэгорый, газіфікавана звыш 13,2 тысячы кватэр і домаўладанняў. За апошнія 20 гадоў агульная працягласць газавых сетак у краіне вырасла больш як у тры разы і цяпер складае амаль 68 тысяч кіламетраў.

На пяцігоддзе запланавана рэканструкцыя электрасетак у 1,5 тысячы населеных пунктаў, а праекты па газіфікацыі будуць разгорнутыя ў 30-х. Такім чынам будзе ахоплена найбольшая колькасць мястэчак для стварэння ў іх больш камфортных умоў жыцця.

Важнае месца ва ўмацаванні энергабяспекі краіны займае тарфяная галіна, прадукцыя якой пастаўляецца прадпрыемствам ЖКГ, цэментным арганізацыям, насельніцтву; яна запатрабавана і ў сельскай гаспадарцы, нагадаў міністр:

— Штогод у краіне здабываецца каля 2 млн тон торфу, з якога вырабляецца каля 1,2 млн тон торфапрадукцыі (каля мільёна тон мае паліўнае прызначэнне). Гэта дазваляе штогод замяшчаць больш як 450 млн м3 газу.

Унутраныя патрэбы Беларусі ў тарфяным энергарэсурсе забяспечваюцца цалкам, застаецца і на экспарт (сёлета ў 21 краіну бліжняга і дальняга замежжа пастаўлена 141 тысяча тон торфапрадукцыі, з іх 1,9 тысячы тон — у Кітай). У снежні падпісаны мемарандум, якім прадугледжаны вопытныя пастаўкі тарфяных субстратаў у В’етнам, абмяркоўваюцца пытанні пашырэння супрацоўніцтва з расійскімі кампаніямі.

Сёлета торфазаводы вырабілі 888 тысяч тон сушонкі і торфабрыкетаў, з якіх 528 тысяч тон накіравана на патрэбы прадпрыемстваў, а 258 тон забяспечыла попыт насельніцтва.

Ірына СІДАРОК

Фота аўтара

Выбар рэдакцыі

Жыллё

Па якіх крытэрыях дамы ўваходзяць у праграму па капрамонце?

Па якіх крытэрыях дамы ўваходзяць у праграму па капрамонце?

Пра ўсе тонкасці правядзення капітальнага рамонту расказалі спецыялісты.

Рэгіёны

Самы працяглы ўрок гістарычнай праўды і сяброўства

Самы працяглы ўрок гістарычнай праўды і сяброўства

Удзельнікі «Цягніка Памяці» папярэдніх гадоў дзеляцца сваімі ўражаннямі ад праекта.

Экалогія

Якія прагнозы на лета робяць метэаролагі?

Якія прагнозы на лета робяць метэаролагі?

Тры месяцы суцэльнай спякоты нам не абяцаюць

Гараскоп

Усходні гараскоп на наступны тыдзень

Усходні гараскоп на наступны тыдзень

У пачатку тыдня да Ракаў могуць падступна падкрасціся трывогі і сумневы.