Вы тут

Як рыхтуюцца да Новага года ў арміі


Да доўгачаканага свята — Новага 2024 года — застаецца няшмат. Па добрай традыцыі да яго пачынаюць рыхтавацца загадзя. Мільёны навагодніх ёлак, гірлянд і бліскучых агеньчыкаў ўпрыгожваюць дамы і вуліцы ўсёй краіны, надаючы навакольным настрой навагодняй казкі. 103-я Віцебская асобная гвардзейская паветрана-дэсантная брыгада не стала выключэннем. Вайскоўцы славутага падраздзялення не толькі з годнасцю выконваюць свой абавязак, але і старанна рыхтуюцца да гэтай урачыстасці. Пераканаемся ў гэтым на прыкладзе вайскоўцаў зенітнай ракетна-артылерыйскай батарэі.


Навагодняя ноч для вайскоўцаў — той рэдкі выпадак, калі адбой не ў дзесяць гадзін вечара, а далёка за поўнач. Зварот Прэзідэнта па тэлебачанні, смачны стол і салют — усё амаль як дома. Для салдат гэтая ноч таксама важная, як і для тых, хто сустракае свята сярод сям’і. Так, сваякі і сябры далёка, але побач таксама не чужыя — за час службы баявыя таварышы становяцца амаль роднымі. І нават жаданні ў іх падобныя: мір на Зямлі і ў кожным доме.

У дні, якія папярэднічаюць святу, пах пораху змяняецца пахам мандарынаў. Салдацкія казармы ператвараюцца ва ўтульныя пакоі, на тварах байцоў з’яўляюцца ўсмешкі, і нават на палігонах усё ў прадчуванні свята.

Ну які ж Новы год без ёлкі? Традыцыя ставіць ёлку, упрыгожваць казармы, клубы і тэрыторыю жыве ў легендарнай 103-й брыгадзе і сёння. Таму салдаты пачалі загадзя актыўна ўпрыгожваць памяшканні, наводзіць у іх парадак, падрыхтоўваць святочную праграму з жартамі, конкурсамі і выступленнямі. І, нарэшце, упрыгожваць навагоднюю прыгажуню. Мішура, гірлянды, шарыкі, сняжынкі, рознакаляровыя агеньчыкі — усё гэта, як прызнаюцца вайскоўцы, міжволі стварае святочны настрой. Тым больш, калі ўсю гэтую прыгажосць маладыя людзі навялі ўласнаручна. Зенітчыкі 103-й гвардзейскай брыгады адзначаюць, што ў навагодняй абстаноўцы нават у страі адчуваецца набліжэнне свята. Святочна ўпрыгожаную казарму салдаты тэрміновай службы запомняць надоўга.

Вайсковец зенітнай ракетна-артылерыйскай батарэі гвардыі радавы Даніла Ляўчук з горада Слаўгарад Магілёўскай вобласці прыняў актыўны ўдзел ва ўпрыгожванні роднай казармы. Да прызыву на тэрміновую ваенную службу малады чалавек скончыў Магілёўскі дзяржаўны эканамічны прафесійна-тэхнічны каледж. Па спецыяльнасці ён — мастак-афарміцель дызайнерскіх работ. Прыбыўшы на тэрміновую службу два месяцы таму, гвардыі радавы Ляўчук не пажадаў заставацца ў баку, праявіў ініцыятыву арганізаваць упрыгожванне казармы да Новага года і святочна аформіць інтэр’ер. Акрамя ўсталявання навагодняй ёлкі, афармлення памяшканняў казармы, вайсковец, будучы мастаком, намаляваў шаўрон легендарнай 103-й брыгады і грознага дракона.

Бо, нагадваем, па ўсходнім календары 2024-ы — год Зялёнага Драўлянага Дракона. У кітайскай культуры міфічная жывёла сімвалізуе ўладу, высакароднасць, гонар і поспех.

«Мне падабаецца служыць у войску. Прызнацца шчыра, я хацеў трапіць менавіта ў 103-ю Віцебскую асобную гвардзейскую паветрана-дэсантную брыгаду, — распавёў гвардыі радавы Ляўчук. — Па-першае, чуў пра подзвігі гэтага легендарнага падраздзялення, а па-другое — заўсёды марыў здзяйсняць скачкі з парашутам».

Старанна ўпрыгожыўшы казарму, гвардыі радавы Ляўчук падарыў святочны настрой не толькі сабе, але і  сваім таварышам і камандзірам. Акрамя таго, суразмоўца падзяліўся ўражаннямі аб надыходзячым свяце: «Хоць я і ўпершыню буду праводзіць Новы год не дома, у коле родных і блізкіх, а ў не зусім яшчэ звыклай абстаноўцы, навагодні настрой усё ж прысутнічае. Чаканні ад такога Новага года колеру хакі самыя яркія і маляўнічыя. Плануем арганізаваць святочны стол і ў асяроддзі таварышаў правесці казачную навагоднюю ноч. Акрамя таго, будзем ладзіць навагоднія сцэнкі, і я з нецярпеннем чакаю, калі наступіць гэты час».

Малады чалавек расказаў, што па заканчэнні паўгода мае намер звязаць сваё жыццё з Узброенымі Сіламі ўжо на кантрактнай аснове. Гвардыі радавы Ляўчук марыць застацца ў зенітнай батарэі, бо тут — зладжаны калектыў, спагадлівыя афіцэры і сапраўды камфортная абстаноўка, якая прысутнічае не толькі па святах, але і звычайныя буднія дні.

«У нас, у зенітнай ракетна-артылерыйскай батарэі 31 снежня запланавана мноства розных мерапрыемстваў і конкурсаў, — адзначыў намеснік камандзіра батарэі па ідэалагічнай рабоце гвардыі старшы лейтэнант Іван Прыпутнеў. — Акрамя святочнага стала, для салдат будуць праведзены займальныя конкурсы і мерапрыемствы для ўзняцця святочнага настрою. Да святкавання Новага года вайскоўцы якасна падрыхтавалі размяшчэнне, упрыгожылі навагоднюю ёлку. Для нас важна, каб абсалютна кожны салдат мог адчуць святочную і хатнюю абстаноўку».

Данііл ХМЯЛЬНІЦКІ, ваеннаслужачы 103-й Віцебскай асобнай гвардзейскай паветрана-дэсантнай брыгады.

Фота аўтара

г. Віцебск

Выбар рэдакцыі

Рэлігія

200 гадоў пад заступніцтвам Пятра і Паўла

200 гадоў пад заступніцтвам Пятра і Паўла

Гомельскі кафедральны Свята-Петра-Паўласкі сабор — адзін з самых велічных праваслаўных храмаў Беларусі, адзін з нямногіх помнікаў архітэктуры зрэлага класіцызму, які захаваўся да нашых дзён.

Здароўе

Як мыць садавіну, гародніну і зеляніну, каб не атруціцца?

Як мыць садавіну, гародніну і зеляніну, каб не атруціцца?

«Апрацоўваць гародніну і садавіну сродкам для мыцця посуду нельга».

Спорт

Які наш спорт сёння?

Які наш спорт сёння?

«З кожным днём сітуацыя ў свеце мяняецца так, што ў вялікай ступені гэта закранае і спорт».