Мальта (Рэспубліка Мальта) — астраўная дзяржава ў Міжземным моры на Мальтыйскім ахіпелагу. За 80 км на поўдзень ад Сіцыліі (Італія) і 284 км на ўсход ад Туніса, 333 км на поўнач ад Лівіі. Насельніцтва — болей за 500 тысяч чалавек. Афіцыйныя мовы ў краіне — англійская і мальтыйская. Развіваецца і мальтыйская літаратура. Вытокі яе — ажно ў XVI стагоддзі.
У апошнія два-тры гады пачынаюць складвацца стасункі паміж беларускай і мальтыйскай нацыянальнымі літаратурамі. Гэта адбываецца найперш дзякуючы намаганням паэтэсы, празаіка, публіцысткі і перакладчыка Яны Псайла. Яна падрыхтавала пераклады твораў шэрагу беларускіх паэтаў і арганізавала ў мальтыйскіх выданнях іх публікацыі. У тым ліку — і вершаў народнага песняра Беларусі Якуба Коласа «Не бядуй!» і «Родныя вобразы».
А ў Беларусі толькі што падборка твораў сямі мальційскіх паэтаў надрукавана ў газеце «Літаратура і мастацтва» у перакладзе на беларускую мову. Дзякуючы перакладчыку Рагнеду Малахоўскаму сваімі адкрыццямі з беларускім чытачом дзеляцца наступныя мастакі слова: Олівер Фрыджыеры, Луіс Брыфа, Амар Сягуна, Эйдрыен Грыма, Джордж Перэса, Чарльз Калейра, Імануэль Міфсуд.
Сяргей ШЫЧКО