Што цікавіць жыхароў Маладзечанскага раёна?

У чарговую грамадскую прыёмную, якую правёў старшыня Маладзечанскага райкама прафсаюза работнікаў аграпрамысловага комплексу Уладзімір Саланенка, звярнулася некалькі жыхароў горада і раёна.

Першы зайшоў Аляксандр Пагуда. Гэта даволі вядомы і паважаны ў акрузе чалавек. Аляксандр Мар'янавіч працаваў у адной з гаспадарак раёна, цяпер займае пасаду загадчыка гаража. Яго агульны стаж 30 гадоў, такі ж і ў яго жонкі. Тыя, хто адпрацаваў у сельгасарганізацыі дзесяць і больш гадоў, маюць права выкупляць жылплошчу, якая будавалася па праграме адраджэння і развіцця сяла і належыць сельгасарганізацыі. У 2017 годзе сям'я прыватызавала жыллё на законных падставах у растэрміноўку на дваццаць гадоў. Цяпер штомесяц яны плацяць калгасу 400 рублёў. Для іх гэта дарагавата, паколькі агульны бюджэт сям'і складае крыху больш як тысячу рублёў. А яшчэ трэба нешта есці, адзявацца, шмат грошай ідзе таксама на набыццё лекаў.

Аляксандр Пагуда прапанаваў, калі гэта не супярэчыць заканадаўству, уключыць норму, якая прадугледжвала б льготы па ўнясенні аплаты за прыватызацыю жылля ў калектыўныя дагаворы. У прыватнасці, калі чалавек адпрацаваў у сельгасарганізацыі больш чым 30 гадоў, устанавіць яе ў памеры 50 %, а калі агульны стаж мужа і жонкі складае 60 гадоў, то перадаваць жылплошчу бясплатна.

Міхаіл Змітровіч хадайнічаў не толькі за сябе, але і за сваіх суседзяў. Міхаіл Міхайлавіч жыве ў прыватным сектары. У раёне забудовы няма цэнтралізаванай каналізацыі. Тым больш што жыхары згодныя прыняць долевы ўдзел з бюджэтам у фінансаванні камунікацый. Уладзімір Саланенка звязаўся з аддзелам жыллёва-камунальнай гаспадаркі райвыканкама.

— Мы ведаем аб гэтай праблеме, — адказалі Уладзіміру Генадзевічу. — Але справа зацягнулася з прычыны пандэміі каранавіруса.

Заяўніка запэўнілі: як толькі сітуацыя стабілізуецца, спецыялісты наведаюцца ў кожны дом, пагутараць з кожным уладальнікам. І, калі атрымаюць ад усіх станоўчы адказ на долевы ўдзел у фінансаванні, падбяруць падрадную арганізацыю для выканання работ.

У Маладзечанскім раёне прайшло дзевяць грамадскіх прыёмных па зборы прапаноў па актуальных пытаннях развіцця краіны і рэгіёна. На кожным з іх прысутнічала старшыня раённага аб'яднання арганізацый прафсаюзаў Таццяна Яцухна.

— Пытанні, з якімі звяртаюцца жыхары нашага рэгіёна, — самыя разнастайныя. Яны датычацца жыллёва-камунальнай гаспадаркі, пенсійнага заканадаўства, грамадска-палітычнага жыцця рэгіёна ў прыватнасці і краіны ў цэлым. У асноўным па ўсіх пытаннях даюцца тлумачэнні адразу на месцы. І пытанняў, якія б мы паставілі на кантроль, цяпер няма. Калі ж яны ўзнікаюць, тыя, што патрабуюць больш глыбокага вывучэння, мы накіроўваем у службу «аднаго акна» пры Маладзечанскім райвыканкаме. У далейшым яны адра-суюцца для кантролю і выканання ў адпаведныя раённыя службы, — расказала Таццяна Пятроўна.

— Маладзечна ўваходзіць у лік гарадоў з колькасцю насельніцтва больш як 80 тысяч чалавек. Кіраўнік дзяржавы даў даручэнне па паскораным развіцці такіх гарадоў. Магчыма, жыхары выказваюць свае ідэі, думкі наконт гэтага? — пацікавілася ў Таццяны Яцухны.

— Нейкіх канкрэтных прапаноў па гэтай тэме ад грамадзян не паступала. Але быў адзін зварот ад жыхара аб скарачэнні гандлёвых аб'ектаў і больш актыўным развіцці вытворчасці, — адказала яна.

На думку Таццяны Яцухны, работа грамадскіх прыёмных дае магчымасць больш аператыўна вырашаць пытанні, якія хвалююць жыхароў, паколькі тут прысутнічаюць спецыялісты розных службаў і падраздзяленняў, што могуць даць тлумачэнні адразу ж на месцы.

А калі параўнаць тэматыку пытанняў, якія паступілі ў грамадскую прыёмную і на асабісты прыём грамадзян, то яны істотна адрозніваюцца. Аналіз зместу зваротаў падчас прыёмаў грамадзян у Маладзечанскім раённым аб'яднанні прафсаюзаў паказаў, што часцей за ўсё заяўнікі задаюць пытанні па рэгуляванні калектыўна-дагаворных адносін, звальненні работнікаў, прымяненні спецадзення і сродкаў індывідуальнай аховы, аховы працы. Яны складаюць 58 % ад усіх зваротаў.

У грамадскай прыёмнай на першае месца выходзяць пытанні жыллёва-камунальнай гаспадаркі (добраўпарадкаванне дваровых тэрыторый, рамонт жыллёвага фонду — 56 %). На другім месцы, але не менш значныя, пытанні пенсійнага заканадаўства — 15 %. Па пытаннях грамадска-палітычнага характару зафіксавана два звароты з 23, што склала 9 % ад агульнай колькасці.

Таццяна ЛАЗОЎСКАЯ