Фестываль «Славянскае адзінства-2014» змяніў фармат, але ж сяброўскія пачуцці засталіся ранейшымі
Упершыню за 45 гадоў існавання традыцыйны міжнародны фестываль «Славянскае адзінства-2014» прайшоў без прадстаўнікоў Украіны. Аб гэтым шкадавалі ўсе ўдзельнікі ад Беларусі і Расіі.
Дарэчы, большасць простых расіян увогуле не вераць, што суседзі, сябры і сваякі, якія апынуліся па іншы бок мяжы, не хочуць мець з імі стасункаў. Пра тое ж казалі і з вялікай сцэны, усталяванай у цэнтры невялічкага прымежнага гарадка Клімава Бранскай вобласці. Старшыня Гомельскага аблвыканкама Уладзімір Дворнік адзначыў, што драматычныя падзеі ва Украіне, якія вострым болем адгукаюцца ў сэрцы, не дазволілі ёй прыняць удзел у гэтай сустрэчы:
— Мы ж, беларусы і расіяне, упэўнены, што нельга адмяняць свята, якое стала сімвалам дружбы і цесных сваяцкіх сувязяў для жыхароў прыгранічных рэгіёнаў нашых краін. Упэўнены, што ва Украіне знойдуць мірнае выйсце з канфлікта, які зацягнуўся, палітычная сітуацыя стабілізуецца. І праз год мы збяромся ля манумента Дружбы ў традыцыйным складзе. Няхай агульныя вытокі славян нагадаюць пра тое, наколькі важна быць разам, жыць у міры і згодзе.
Свята пачалося з выканання гімнаў Беларусі, Украіны і Расіі. Малітва аб міры ва Украіне прагучала на літургіі ў мясцовым праваслаўным храме, дзе служылі дзевяць епіскапаў і мітрапалітаў з розных рэгіёнаў. Дарэчы, мітрапаліт Валакаламскі Іларыён, які ўзначальвае аддзел вонкавых царкоўных сувязяў Маскоўскага патрыярхата, адзначыў, што ад кожнага залежыць будучыня дзяцей і ўнукаў:
— Калі мы будзем служыць дабру, калі мы будзем любіць адно аднаго, калі мы будзем верыць у Бога і выконваць Яго запаведзі — гэта самае лепшае, што мы можам зрабіць для нашых краін, народаў, дзяцей і будучыні. Пакуты ўкраінскага народа — гэта і нашы пакуты.
У фестывалі «Славянскае адзінства-2014» прынялі ўдзел каля дзесяці тысяч чалавек, былі сярод іх і простыя ўкраінцы, але ж многія імкнуліся не афішаваць свой удзел у свяце ў расійскім гарадку. Хоць сімволіка ўсіх трох славянскіх народаў прысутнічала паўсюль.
Велізарную цікавасць выклікалі падворкі беларусаў. Наша харчовая прадукцыя ў асаблівай рэкламе ў расіян патрэбы не мае.
У чаканні беларускіх прысмакаў дзве маладыя жыхаркі Клімава — Вольга Кандэльская, з дзіцем на руках, і Ганна Пятрушына. Клімаўчанкі дзеляцца ўражаннямі ад свята ўвогуле і ад беларускіх пачастункаў у прыватнасці:
— Нам усё беларускае вельмі падабаецца. Згушчонка ў вас вельмі смачная! А яшчэ мы заўсёды імкнёмся набываць абутак беларускай вытворчасці — у яго вельмі добрая якасць.
Калі размова непазбежна заходзіць пра Украіну, з якой Клімаўскі раён мяжуе, дзяўчаты называюць сітуацыю непрыемнай і выказваюць трывогу за сваіх дзяцей.
— Тут шмат розных плётак ходзіць. Але ж мае сваякі з Луганскай вобласці зараз прывезлі да нас сюды сваіх дзяцей. І самі збіраюцца з'язджаць адтуль.
Гаспадыняй фестывалю «Славянскае адзінства» кожны год па чарзе становіцца адна з трох суседніх краін. Праз два гады прымаючым бокам павінна быць Украіна. Беларусы і расіяне шчыра спадзяюцца, што добрая традыцыя адновіцца. Усе знойдуць паразуменне і зноў разам будуць спяваць песні і гандляваць.
Ірына АСТАШКЕВІЧ, фота аўтара.
Бранская вобласць
З мастацтвам па жыцці.
Баявое ўзаемадзеянне найвышэйшага ўзроўню.
«Дзесяцігоддзі школьнае харчаванне нашых дзяцей будавалася на аснове зборніка рэцэптур».