9 кастрычніка парламентарыі адзінагалосна ратыфікавалі дагавор аб Еўразійскім эканамічным саюзе, Прэзідэнт падпісаў закон аб ратыфікацыі. Патрэбна сказаць, што раней аналагічныя крокі здзейснілі ў Расіі і Казахстане. Такая сітуацыя азначае, што апошнія юрыдычныя фармальнасці на шляху да еўразійскай інтэграцыі паспяхова пераадолены і ўжо з Новага года ЕАЭС стане геапалітычнай рэальнасцю, а дзяржавы — члены гэтага саюза (Беларусь, Расія, Казахстан, а таксама Арменія, якая знаходзіцца ў працэсе далучэння да ЕАЭС) будуць яшчэ бліжэй адна да адной.
Хто найбольш выйграе ад аб'яднання?
У перыядычнай прэсе, інтэрнэт-прасторы адразу пачаліся спекуляцыі на тэму таго, што еўразійская інтэграцыя з'яўляецца палітычным праектам Масквы, а зацікаўленасць саюзнікаў зводзіцца да банальнага жадання скарыстацца «імперскімі амбіцыямі» Расіі ды выцягнуць як мага больш грошай з даверлівых уладароў Крамля.
Падобнае бачанне матываў інтэграцыі не толькі не мае нічога агульнага з рэчаіснасцю, але і, калі не з'яўляецца свядомай хлуснёй ды правакацыяй, здзіўляе недасведчанасцю некаторых аўтараў у пытаннях міжнародных адносін і эканомікі.
Пра рэальную выгаду партнёраў па інтэграцыі сведчаць лічбы гандлёвай статыстыкі Расіі і краін «чацвёркі». Па выніках 2013 года ў Расіі склалася абсалютна станоўчае гандлёвае сальда з краінамі Еўразійскага саюза: з Рэспублікай Беларусь каля 6 млрд долараў, з Казахстанам каля 9 млрд, а з Арменіяй — каля 800 млн долараў. Такім чынам, далейшае эканамічнае аб'яднанне з Мінскам, Астаной і Ерэванам з'яўляецца адназначна перспектыўным для расійскіх дзелавых колаў, і нездарма нават само слова «эканамічны» ўвайшло ў назву новага інтэграцыйнага фармату, падкрэсліваючы такім чынам яго характар і жаданні заснавальнікаў.
Традыцыя інтэграцыі
Калі ж казаць аб палітычных матывацыях, то насамрэч Рэспубліка Беларусь і Казахстан маюць уласную ідэалогію, а таксама традыцыі інтэграцыі не меншыя, а, можа, нават і большыя за расійскіх саюзнікаў. Не трэба забываць, што менавіта афіцыйны Мінск з часу распаду СССР сістэматычна выступаў з інтэграцыйнымі прапановамі, што абумовіла размяшчэнне штаб-кватэры СНД у беларускай сталіцы і прывяло да стварэння ў 1999 годзе Саюзнай дзяржавы Беларусі і Расіі — інтэграцыйнага фармату, які дагэтуль не мае прэцэдэнтаў адносна глыбіні аб'яднання на ўсёй постсавецкай прасторы.
Што тычыцца Казахстана, то сама ідэя еўразійскай інтэграцыі была літаральна выпеставана яго лідарам Нурсултанам Назарбаевым, які яшчэ ў далёкім 1994 годзе, выступаючы ў Каралеўскім інстытуце міжнародных адносін Сhаthаm Hоusе (Вялікабрытанія) заявіў, што «Казахстан паслядоўна адстойвае ідэю эканамічнай інтэграцыі краін СНД».
Вядома, што зараз і Беларусь, і Казахстан маюць уласныя інтарэсы ў інтэграцыі, а беларускае кіраўніцтва слушна лічыць, што перад палітыкай павінны ісці канкрэтныя эканамічныя праекты. Галоўным фактарам любой сумеснай працы, у тым ліку палітычнай, павінна быць імкненне да павышэння дабрабыту краіны і асобнага грамадзяніна.
Крытыка ў адрас інтэграцыйных праектаў на постсавецкай прасторы мае свае падставы, аднак наўрад ці хто-небудзь (нават самы радыкальны апазіцыянер) будзе адмаўляць той факт, што дабрабыт беларусаў вырас у дзясяткі разоў, а дзяржава дасягнула значнага прагрэсу ў параўнанні з 1995 годам, калі на агульнарэспубліканскім рэферэндуме 83,3% ад прагаласаваўшых (больш за чатыры мільёны чалавек) выказалі падтрымку курсу кіраўніцтва на эканамічную інтэграцыю з Расіяй.
У нашы дні, згодна з вынікамі сацыялагічнага апытання, праведзенага ў рамках праекта «Інтэграцыйны барометр» спецыялістамі Цэнтра інтэграцыйных даследаванняў Еўразійскага банка развіцця, узровень грамадскай падтрымкі ўдзелу Беларусі ў еўразійскай інтэграцыі складае каля 65%. Улічваючы той факт, што даныя аналагічнага даследавання «Еўрабарометра», якое праводзіцца сярод жыхароў краін ЕС, сведчаць аб падтрымцы курсу еўрапейскай інтэграцыі ў сярэднім на ўзроўні каля 50%, то еўразійская інтэграцыя з'яўляецца кансэнсусным выбарам беларускага грамадства.
Контуры эфектыўнасці
Вядома, рэалізацыя кожнай ідэі мае свае недахопы і сустракае выклікі на сваім шляху. На мой погляд, галоўным фактарам рызыкі еўразійскай інтэграцыі з'яўляецца нежаданне расійскіх алігархічна-сыравінных манаполій да кардынальных змен эканамічнай культуры. Нядобрасумленная канкурэнцыя, манапалізм, карупцыйныя схемы ды так званыя «адкаты» наўрад ці сумяшчальныя з эфектыўнай стратэгіяй развіцця.
Спажывецкі, экстэнсіўны характар эканомікі Расіі, які сцвярджаўся апошнія 20 гадоў, ужо прывёў да таго, што краіны ЕАЭС зараз вырабляюць усяго каля 3% ад сусветнага ВУП (для параўнання, доля СССР была каля 14%). Расійская Федэрацыя ў значнай ступені залежыць ад замежных тэхналогій, бо аснову расійскага экспарту ў ЕС і КНР складае сыравіна, а імпарту — прамысловыя тавары.
Наіўная ілюзія некаторых расійскіх лібералаў адносна «энергетычнай імперыі» так і засталася ўтопіяй на фоне санкцый і тэхналагічнага эмбарга ЕС і ЗША. Высветлілася, што нават нафтаздабычу і распрацоўку ўласных радовішчаў сучасная Расія без заходніх тэхналогій і абсталявання не ў стане ажыццяўляць.
Таму важнай задачай для ЕАЭС з'яўляецца рэалізацыя праграм рэіндустрыялізацыі (аднаўлення прамысловасці), мадэрнізацыі і імпартазамяшчэння. Толькі расійскі імпарт зараз складае каля 500 млрд долараў, і, натуральна, шмат што з гэтай наменклатуры тавараў можа вырабляцца як у самой Расіі, так і ў саюзных дзяржавах.
У гэтых умовах бадай адзіным індустрыяльным аазісам на прасторах Еўразійскага саюза застаецца Рэспубліка Беларусь. Мала хто ведае, але наша краіна вырабляе 17% усіх камбайнаў у свеце, 6% трактароў, доля БелАЗ на сусветным рынку цяжкагрузных аўтамабіляў складае каля 30%. Вытворчасць малака ў 2,8 раза большая, чым у краінах Еўрасаюза і ў 8,4 раза — чым у свеце ў цэлым, мяса — у 1,1 і 2,2 раза, зерня — у 1,6 і 2,5 раза, адпаведна.
Менавіта гэтыя пазіцыі Беларусь экспартуе сваім партнёрам па еўразійскай інтэграцыі, і пра тое, наколькі эфектыўна можна працаваць ва ўмовах адзінай эканамічнай прасторы, сведчаць поспехі беларуска-казахстанскага гандлю. Яшчэ ў 2006 годзе гандлёвы абарот паміж краінамі быў каля 334 млн долараў, а зараз гэтая лічба блізкая да мільярда. Пры гэтым экспарт беларускага боку складае больш за 800 млн.
У адносінах з РФ была крыху іншая карціна: нягледзячы на значныя паказчыкі айчыннага экспарту (каля 17 млрд долараў), апошнія два гады адзначаўся некаторы спад, беларуская прадукцыя часам трапляла пад розныя сумніўныя абмежаванні ці замяшчалася замежнымі аналагамі, а выгаднасць падобных кантрактаў для расійскага боку не заўжды мела адназначны характар.
Апошнія дзеянні расійскага кіраўніцтва, скіраваныя на стварэнне самадастатковай эканомікі, пакідаюць пазітыўныя ўражанні і ствараюць пэўныя магчымасці для беларускага боку. Сапраўды, як выказаўся беларускі Прэзідэнт падчас нядаўняй сустрэчы ў Мінску з кіраўніком расійскага ўрада Дзмітрыем Мядзведзевым, «у новы год Беларусь і Расія ўваходзяць як ніколі добра, у двухбаковых адносінах няма нявырашаных праблем».
Ці будзе расійскае кіраўніцтва дастаткова прынцыповым, каб працягнуць лінію на адраджэнне краіны і прымусіць буйны бізнес працаваць згодна з інтарэсамі дзяржавы, ці здолеюць беларускія вытворцы скарыстацца гістарычным шанцам і нарэшце наладзіць якасны сучасны маркетынг для рэалізацыі айчыннай прадукцыі за мяжой — пакажа час. У любым выпадку, створаны Еўразійскі эканамічны саюз — гэта не панацэя і не «халява», як лічаць некаторыя, а шырокае поле для работы, дзе як ад кіраўнічай эліты, так і ад кожнага з нас залежыць супольная будучыня.
Аляксандр ШПАКОЎСКІ
Летась зафіксавана зніжэнне колькасці выпадкаў гібелі на вытворчасці.
Карэспандэнты «Звязды» пабачылі, як праходзяць рэпетыцыі.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.