Учора Уладзімір Андрэйчанка, старшыня Палаты прадстаўнікоў Нацыянальнага сходу Рэспублікі Беларусь, падчас асабістага прыёму ў Докшыцах выслухаў больш за дзесяць грамадзян. Былі агучаны не толькі асабістыя, але і калектыўныя звароты. У прыватнасці, наконт газіфікацыі пяці вёсак і прыватызацыі камерцыйнага жылля на тэрыторыі ведамаснага санаторыя.
Спікер парламента некаторыя пытанні вырашыў адразу пасля таго, як пагаварыў з людзьмі. У прыватнасці, літаральна «на пальцах» даказаў бабулі, што мо і не трэба прыватызаваць кватэру. Бо першы ўзнос (каля 22 мільёнаў рублёў), хай і на працягу года, выплаціць за прыватызацыю пенсіянерцы і яе мужу складана. А калі іх жыллё стане арэндным, дык і невялікая розніца будзе ў аплаце за пражыванне.
Адна з грамадзянак, якая запісалася на прыём, не прыйшла. І яе візіту да апошняга чакалі спікер, старшыня райвыканкама і іншыя афіцыйныя асобы.
Пасля прыёму Уладзімір Андрэйчанка пракаментаваў журналістам яго вынікі. Падкрэсліў, што такая форма работы з грамадзянамі вельмі карысная як для іх, так і для прадстаўнікоў улады, у тым ліку і заканадаўчай.
— Калі мы, дэпутаты Палаты прадстаўнікоў, праводзім прыёмы, заўсёды арыентуемся на тое, ці ёсць нейкія вострыя сацыяльныя пытанні ў тым або іншым рэгіёне. Але гэта не значыць, што не трэба рэагаваць на другасныя. Мы разглядаем усе... Я лічу, што грамадзяне ў асноўным агучваюць абгрунтаваныя праблемы, многія з якіх прыходзіцца вырашаць органам мясцовай улады. І, дарэчы, у Докшыцкім раёне праблемы вырашаюцца на годным узроўні, — сказаў ён.
Паводле яго слоў, пацвярджэннем апошняга з'яўляецца тое, што летась зменшылася колькасць скаргаў ад жыхароў раёна ў вышэйшыя органы ўлады.
Аляксандр ПУКШАНСКІ.
Докшыцкі раён
«Дзесяцігоддзі школьнае харчаванне нашых дзяцей будавалася на аснове зборніка рэцэптур».
Што за таемнымі дзвярыма?