Усе выхадныя ў інтэрнэце з'яўляліся розныя паведамленні пра ўкус скарпіёнам жыхара Баранавіч, перыядычна іх абвяргалі альбо падвяргалі сумненням службовыя асобы. Але ў панядзелак інфармацыя ўдакладнілася. І стала відавочна, што інцыдэнт з экзатычным насякомым меў месца ў горадзе.
У адзін з дзён на мінулым тыдні мужчына, які выбіраў бананы ў супермаркеце, адчуў боль. Тут жа яго жонка, іншыя пакупнікі заўважылі не характэрнае для нашых мясцін насякомае. Пацярпелага адразу даставілі ў бальніцу. Дзень ён правёў у рэанімацыі, потым пацыента перавялі ў тэрапеўтычнае аддзяленне. Стан мужчыны не выклікаў апасення ў медыкаў, праз дзень яго выпісалі з бальніцы.
Як паведаміў карэспандэнту газеты галоўны санітарны ўрач Баранавіцкага раёна Сяргей ПЛЕСКАЦЭВІЧ, пацвердзіць, што гэта быў менавіта скарпіён, медыкі санітарнай службы не могуць, бо ў іх няма магчымасці для такой ідэнтыфікацыі. Гаворка ідзе аб тым, што чалавек пацярпеў ад укусу насякомага, падобнага на скарпіёна. Паводле той інфармацыі, якой валодае Сяргей Сцяпанавіч, драпежнае насякомае забрала жонка пацярпелага. Калі ў адпаведных лабараторыях ветстанцыі правядуць даследаванне і афіцыйна засведчаць, што гэта скарпіён, тады і можна будзе сказаць упэўнена.
А нам застаецца быць больш пільнымі пры выбары бананаў ды іншых заморскіх фруктаў.
Святлана ЯСКЕВІЧ
Сумесныя праекты ядзерных тэхналогій.
У парадку дня — зацвярджэнне Канцэпцыі нацбяспекі і Ваеннай дактрыны.
