Прэзідэнт: Беларусь разлічвае на развіццё кантактаў з Саветам Еўропы

Аб гэтым заявіў кіраўнік дзяржавы на сустрэчы са старшынёй Кангрэса мясцовых і рэгіянальных уладаў Савета Еўропы Андэрсам Кнапэ.

Беларускі лідар адзначыў, што яму прыемна ў чарговы раз (раней гэтая тэма агаворвалася з папярэднікам цяперашняга старшыні) абмеркаваць пытанні развіцця мясцовага самакіравання і перш за ўсё — вопыт Еўропы ў гэтым напрамку.

«Ды ў вас, я паглядзеў, і асабісты вопыт мясцовага самакіравання вельмі салідны», — звярнуў увагу Прэзідэнт.

Ён дадаў, што ў Беларусі ёсць сваё бачанне развіцця мясцовага самакіравання і наша краіна будзе рухацца ў кірунку большай самастойнасці мясцовага самакіравання.

«Я не скажу, што мы ўражаныя той формай развіцця і існавання мясцовага самакіравання, рэгіянальнага самакіравання ў Еўрапейскім саюзе, але шмат добрага — тое, што створана ў вас, — падлягае запазычанню ў Беларусі, — падкрэсліў беларускі лідар. — Думаю, добрай дапамогай у рэалізацыі сказанага мною былі б больш цесныя кантакты органаў мясцовага самакіравання адпаведнымі структурамі Еўрапейскага саюза».

На думку кіраўніка дзяржавы, візіт старшыні Кангрэса мясцовых і рэгіянальных улад Савета Еўропы ў Беларусь надасць новы імпульс двухбаковаму супрацоўніцтву з еўрапейскім рэгіёнам у плане развіцця мясцовага і рэгіянальнага самакіравання.

У адказ Андэрс Кнапэ адзначыў, што Кангрэсу мясцовых і рэгіянальных уладаў Савета Еўропы вельмі прыемна бачыць прыхільнасць Беларусі і ўладаў, якую яны праяўляюць да пытанняў мясцовага самакіравання.

Ён таксама распавёў, што гэта яго першы візіт у нашу краіну. "Беларусь заўсёды ўяўляла і ўяўляе цікавасць для Савета Еўропы і нашага кангрэса ў плане супрацоўніцтва. За гэтыя два дні [візіту —"Звязда"] я ўжо атрымаў добрыя ўражанні і ад абстаноўкі, і ад тых абмеркаванняў, якія адбыліся ў нас з прадстаўнікамі ўрада, мясцовых і рэгіянальных уладаў, бізнесу«, — дадаў старшыня Кангрэсу.

Візіт Андэрса Кнапэ пачаўся 27 красавіка і працягнецца да 1 мая. Ён ужо пабываў у Жодзіна, дзе сустрэўся з кіраўніцтвам мясцовага гарвыканкама і гарадскога Савета дэпутатаў, наведаў ААТ «БелАЗ». Акрамя таго, у яго адбыліся перамовы са старшынёй Савета Рэспублікі Міхаілам Мясніковічам.

Запланавана сустрэча ў Мінскім гарадскім Савеце дэпутатаў, удзел у круглым стале па актуальных пытаннях мясцовага самакіравання ў рамках работы Савета па ўзаемадзеянні органаў мясцовага самакіравання пры Савеце Рэспублікі. Акрамя таго, плануецца, што Андэрс Кнапэ прыме ўдзел у пасяджэнні Савета па ўзаемадзеянні органаў мясцовага самакіравання пры Савеце Рэспублікі з удзелам членаў Кангрэса мясцовых і рэгіянальных улад.

Па выніках сустрэчы з Прэзідэнтам старшыня Кангрэса мясцовых і рэгіянальных уладаў Савета Еўропы Андэрс Кнапэ пагутарыў з журналістамі.

Ён адзначыў, што ўражаны Мінскам, яго зелянінай і чысцінёй. Акрамя таго, старшыня Кангрэса пабываў і за межамі сталіцы - па яго словах, там ён убачыў добры настрой уладаў, накіраваны на развіццё невялікіх гарадоў.

Андэрс Кнапэ назваў сустрэчу з кіраўніком дзяржавы вельмі плённай, паколькі на ёй была гранічна ясна пазначана важнасць паглыблення супрацоўніцтва паміж Кангрэсам мясцовых і рэгіянальных уладаў Савета Еўропы і беларускімі ўладамі. Таксама на сустрэчы Аляксандр Лукашэнка адзначыў, што думае аб змяненні заканадаўства ў гэтай сферы. Па словах Андэрса Кнапэ, гэта звязана з тым, што Беларусь актыўна цікавіцца еўрапейскімі стандартамі, вывучае вопыт Еўропы ў гэтай сферы.

Ён таксама звярнуў увагу, што развіццё і паглыбленне дыялогу - гэта не хуткі працэс, аднак бакі могуць даць пэўныя веды адзін аднаму. У завяршэнні Андэрс Кнапэ заявіў, што, па яго перакананні, добрае грамадства будуецца на моцнай мясцовай уладзе. «Гэта краевугольны камень добрага грамадства», - сказаў ён.

Уладзіслаў ЛУКАШЭВІЧ

Фота БЕЛТА