Па выніках сустрэчы с Прэзідэнтам дэпутат Еўрапейскага парламента Раландас Паксас падзяліўся падрабязнасцямі з журналістамі.
Яшчэ ў час размовы з кіраўніком дзяржавы ён адзначыў, што прыехаў у Беларусь за марай. Паводле слоў дэпутата, яна даволі сур’ёзная і яе рэалізацыя можа працягнуцца даўжэй чалавечага жыцця.
«Аснова — дэмілітарызаваць Калінінград і Літву, вось гэты рэгіён. Мяне турбуе сітуацыя ў гэтым рэгіёне, я бачу, што ваенныя ястрабы — не важна, з якога боку — хацелі б пачаць вайну паміж ЗША і Расіяй менавіта ў гэтым рэгіёне. Я выступаю канкрэтна з іншага пункту гледжання: трэба пачаць будаваць адносіны зусім па-іншаму, супрацоўнічаць у культурнай сферы, эканамічнай, паміж універсітэтамі», — сказаў Раландас Паксас.
Такім чынам, дэпутат хоча, каб бяспека дадзенага рэгіёну была гарантаваная дыпламатычнай сілай, а не ваеннай. На яго думку, заступніцтва над рэгіёнам маглі б узяць і Папа Рымскі, і Рускі Патрыярх, каб краіны, якія знаходзяцца вакол гэтай тэрыторыі, прыйшлі да згоды.
Гэта ўжо другая сустрэча Раландаса Паксаса з кіраўнікамі дзяржаў — раней ён ўздымаў гэтую тэму на перамовах з прэзідэнтам Расіі Уладзімірам Пуціным і вышэйшым кіраўніцтвам гэтай краіны. Паводле яго слоў, расійскаму лідару такая ідэя спадабалася. «Я рады, што гэтую ідэю пачуў і Прэзідэнт Лукашэнка. Яму таксама яна спадабалася», — сказаў ён.
Экс-прэзідэнт Літвы праінфармаваў, што у яго запланаваныя сустрэчы з кіраўнікамі Германіі, ЗША і іншых краін. Ён дадаў, што калі кіраўнікі дзяржаў і людзі падтрымаюць такую задумку, то тады можна будзе казаць аб рэалізацыі дэкларацыі або мемарандума.
Іншая прычына візіту дэпутата Еўрапейскага парламента — Беларуская АЭС. Роландас Паксас прызнаў, што пэўныя сілы ў Літве — і не толькі Літве — выкарыстоўваюць будаўніцтва атамнай станцыі для дасягнення палітычных мэтаў.
«Я не думаю, што беларусы будавалі б сабе небяспечную электрастанцыю», — адзначыў экс-прэзідэнт Літвы.
Сябе ён назваў прыхільнікам атамнай энергетыкі і распавёў, як у бытнасць прэм’ер-міністрам Літвы яму давялося прымаць цяжкае рашэнне — зачыніць першы блок атамнай станцыі. Такое жорсткае патрабаванне было агучана Еўрапейскім саюзам.
«Сюды я прыехаў, каб таксама паспрабаваць спыніць недавер — бяспечная гэтая станцыя або небяспечная. Я прапанаваў Прэзідэнту Лукашэнку стварыць самую магутную міжнародную экспертную групу з усіх краін, якія маюць вопыт (па гэтай тэме — „Звязда“), можа быць, мелі і няшчасце», — распавёў Раландас Паксас.
Такая група, упэўнены дэпутат, дапаможа пераканаць людзей у бяспецы гэтага праекта. Ён таксама прызнаў, што станцыя будзе пабудавана і будзе працаваць. «Трэба ўсім зараз жа ісці насустрач, быць вельмі празрыстымі, каб як мага больш ўкласці ў бяспеку гэтай станцыі», — дадаў экс-прэзідэнт Літвы.
Раландас Паксас нагадаў, што пэўны час таму Літва мела тры прыярытэту замежнай палітыкі — стаць членам НАТА, стаць членам ЕС, а таксама мець добрыя адносіны з суседзямі.
«На жаль, з трэцім прыярытэтам не вельмі атрымалася. З-за многіх прычын, можа, з-за кіраўніцтва. Гэта трэба папраўляць», — падкрэсліў дэпутат.
Ён таксама адзначыў, што калі бог дае суседа, з ім трэба жыць у міры і згодзе. Ёсць і іншы пункт гледжання: добрымі суседзямі робіць высокі плот паміж імі. Але дэпутат кіруецца менавіта першым прынцыпам.
Уладзіслаў ЛУКАШЭВІЧ
Фота БЕЛТА
Фіналістка праекта «Акадэмія талентаў» на АНТ — пра творчасць і жыццё.
На гэтым тыдні Цяльцы будуць проста незаменныя ўсюды, дзе іх ведаюць.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.
