Вы тут

Абноўленае паштовае аддзяленне адкрылася ў Мінску


Жыхары сталічнага мікрараёна Усход-1 атрымалі да навагодніх і калядных свят добры падарунак. Сёння ўрачыста адкрылася абноўленае аддзяленне паштовай сувязі Мінск-114. Працавала яно з 1978 года ў адным са знакамітых дамоў з пано, якія месцяцца насупраць Нацыянальнай бібліятэкі. За 40 з лішнім год наспеў час «перазапуску» аддзялення. Ды і сам жылы дом, у якім яно месціцца, знакавы. Ён з’яўляецца гісторыка-культурнай каштоўнасцю.


Зараз да паслуг наведвальнікаў у аддзяленні — пяць аперацыйных вокнаў. Але зусім не заўжды абавязкова выбіваць асобны талон у сістэме электроннай чаргі, каб зрабіць пэўнае дзеянне. У плацежна-даведачным тэрмінале можна здзейсніць усе неабходныя плацяжы без камісіі. Таксама тут працуе спецыяльны тэрмінал SmartPost. Ён прызначаны для адпраўкі заказной пісьмовай карэспандэнцыі вагой да 2 кілаграмаў па ўсёй тэрыторыі Беларусі. Трафік у аддзяленні чакаецца даволі істотны. У ім абслугоўваецца каля 30 тысяч людзей, якія жывуць у суседніх дамах, і каля 400 арганізацый. У месяц у сярэднім прымаецца каля 8 тысяч экзэмпляраў пісьмовай карэспандэнцыі, 550 пасылак і 230 адпраўленняў паскоранай пошты.

— Зараз па краіне працуюць больш за 3 тысячы паштовых аддзяленняў. На долю Мінска прыходзіцца крыху больш за 140. Наша мэта — пакрысе абнавіць усе нашы аддзяленні ў Беларусі, — адзначыла генеральны дырэктар РУП «Белпошта» Святлана ЮРКЕВІЧ. — Натуральна, што адразу гэта не атрымаецца. Штогод плануем асучасніваць каля 70 аддзяленняў. Сёння, напрыклад, у адзін дзень з Мінскам урачыстыя адкрыцці адбыліся таксама ў Віцебску і ў Мазыры. Пры рамонце ж гэтага аддзялення мы пастараліся стварыць безбар’ернае асяроддзе. Паклалі тактыльную плітку, зрабілі зручныя дзверы, а таксама ўсталявалі кнопку выкліку персаналу, які дапаможа пры неабходнасці патрапіць у памяшканне.

Таксама тут размясціўся спецыялізаваны дзіцячы куток. Калі бацькі афармляюць каля аперацыйнага акна нейкія дакументы ці проста стаяць у чарзе, то дзеці могуць правесці час з карысцю для сябе — размалёўваючы спецыяльныя карцінкі на паштовую тэму.

Начальнік аддзялення сувязі Мінск-114 Вольга РЭУТ адзначыла, што цяпер можна запісацца ў электронную чаргу. Гэты функцыянал рэалізаваны пры дапамозе сайта «Белпошты». 

Ацанілі абноўленае аддзяленне і мясцовыя жыхары.

— Усё зрабілі літаральна за два месяцы, — кажа адна з наведвальніц, Людміла Пятроўна, якая прыйшла атрымаць ліст да запатрабавання. — Вельмі падабаецца ўсё. Я жыву ў гэтым жа доме з моманту яго засялення, і ніколі не думала, што такое хараство прыйдзе і да нас. Канешне, стары знешні выгляд быў, пэўна, актуальны для той эпохі, калі будаваўся дом, але з таго часу шмат жа чаго ўжо змянілася. Ды і чэргаў, пэўна, стане меней.

Валяр’ян ШКЛЕННІК

Фота аўтара

Выбар рэдакцыі

Грамадства

Дыета ад хандры. Што жаваць, каб не перажываць

Дыета ад хандры. Што жаваць, каб не перажываць

«Сумныя» прадукты — прэч з халадзільніка!

Грамадства

«Сталінскі праспект мы называлі брадвеем». Як і чым жылі беларускія стылягі

«Сталінскі праспект мы называлі брадвеем». Як і чым жылі беларускія стылягі

Пасля смерці Сталіна «жалезная заслона», якая аддзяляла Савецкі Саюз ад навакольнага свету, прыадчынілася.

Калейдаскоп

Усходні гараскоп на наступны тыдзень

Усходні гараскоп на наступны тыдзень

АВЕН. Неабходна будзе сканцэнтраваць намаганні на рабоце.

Палітыка

Аляксандр Лукашэнка: Беларусы былі і будуць адным народам

Аляксандр Лукашэнка: Беларусы былі і будуць адным народам

Прэзідэнцкі прыём праходзіць у Нацыянальным выставачным цэнтры «БелЭкспа».