Аляксандр Храмой прызначаны дырэктарам Нацыянальнага гістарычнага музея Рэспублікі Беларусь

Дырэктарам Нацыянальнага гістарычнага музея Беларусі прызначаны Аляксандр Храмой. Пра гэта паведамілі ў Міністэрстве культуры.

«Нацыянальны гістарычны музей сёння з’яўляецца адной з вядучых устаноў культуры краіны. Гэта навукова-метадычны цэнтр гістарычнага профілю і адзін з галоўных адукацыйных, ідэалагічных і выхаваўчых цэнтраў. Праз экспазіцыі музея, музейна-педагагічную дзейнасць і выставачныя мерапрыемствы прапагандуецца шматвекавая гісторыя Беларусі, яе багатая шматнацыянальная культурная спадчына. У музея ёсць вялікія перспектывы. На дзяржаўным узроўні сёння разглядаецца пытанне размяшчэння пастаяннай экспазіцыі музея ў спецыяльна абсталяваным будынку, а фондавыя калекцыі музея — у сучасным дэпазітарыі», — адзначыў міністр культуры Анатоль Маркевіч.

Міністр адзначыў, што на чале музея сёння павінен быць чалавек, які з’яўляецца аўтарытэтным кіраўніком, мае прынцыповы пункт гледжання, умее аргументавана адстойваць сваю пазіцыю, аналізуе дзень сённяшні і выразна бачыць перспектывы дня заўтрашняга. «Гэтыя якасці арганічна спалучаюцца ў Аляксандры Храмам, які 6 гадоў працаваў у музеі на пасадзе намесніка дырэктара і ведае ўсе тонкасці музейнай і гаспадарчай дзейнасці», — падкрэсліў ён.

«Акрамя таго, неабходна больш эфектыўна арганізоўваць працу філіялаў музея, умацоўваць матэрыяльна-тэхнічную базу, прымяняць новыя формы працы на практыцы. У снежні 2021 года Нацыянальны гістарычны музей будзе адзначаць свой 65-гадовы юбілей. І цалкам лагічна, калі да гэтага моманту будзе рэалізаваны вялікі выставачны праект, які прадэманструе яго дасягненні за апошні час», — звярнуў увагу Анатоль Маркевіч.

Аляксандр Храмой нарадзіўся ў 1976 годзе, атрымаў вышэйшую адукацыю ў Беларускім дзяржаўным педагагічным універсітэце імя М. Танка па спецыяльнасці «гісторыя і сацыяльна-палітычныя дысцыпліны». Там жа ў 2001 годзе скончыў аспірантуру па спецыяльнасці «айчынная гісторыя», а у 2018 годзе атрымаў дыплом Акадэміі кіравання пры Прэзідэнце Беларусі па спецыяльнасці «інавацыйны менеджмент». Пачынаў свой працоўны шлях з Нацыянальнага гісторыка-культурнага музея-запаведніка «Нясвіж», працуючы вучоным сакратаром з 2011 па 2013 год, у 2013-2019 гадах быў загадчыкам экспазіцыйна-выставачнага аддзела, намеснікам дырэктара Нацыянальнага гістарычнага музея. З 2019 года ў цяперашні час займаў пасаду дырэктара Дзяржаўнага літаратурна-мемарыяльнага музея Якуба Коласа.