Сёння, 20 мая, у Савеце Рэспублікі прайшла сустрэча з актыўнай і ініцыятыўнай моладдзю — студэнтамі розных курсаў Полацкага дзяржуніверсітэта.
Трэба сказаць, што такія стасункі ў фармаце жывога і адкрытага дыялогу сталі свайго роду традыцыйнымі ў сценах верхняй палаты парламента. Такія сустрэчы дазваляюць моладзі лепш дазнацца аб сутнасці дзейнасці сенатараў, структуры беларускага парламенту і актуальных пытаннях з жыцця грамадства, якія трансфармуюцца ў заканадаўчых актах.
Сённяшнюю сустрэчу ініцыявалі самі студэнты, якія з гонарам адзначалі, што іх рэктар — Алег Раманаў — таксама з’яўляецца членам Савета Рэспублікі. Для маладых людзей правялі пазнавальную экскурсію, падчас якой яны дазналіся аб тым, як дзейнічае заканадаўчы механізм, над чым зараз працуюць законатворцы і як функцыянуе палата тэрытарыяльнага прадстаўніцтва.
Асабліва цёплай сустрэча выдалася і таму, што студэнты прыехалі з роднага горада старшыні Савета Рэспублікі, дзе яна нарадзілася, вырасла і правяла большую частку свайго жыцця. Спікер верхняй палаты парламента шчыра павітала сваіх землякоў і прыгадала той перыяд, калі яна была студэнткай гэтай навучальнай установы (на той час політэхнічнага інстытута).
Аліна Паненка задала актуальнае пытанне наконт статусу маладога спецыяліста і размеркавання выпускніка пазабюджэтнай формы адукацыі. Дзяўчына падкрэсліла, маўляў, вучымся аднолькава, грамадскай дзейнасцю займаемся, але пры размеркаванні бюджэтніка ён атрымлівае пэўныя ільготы: кампенсацыю па найме жылля, штомесячныя даплаты і гэтак далей. А такі ж выпускнік-платнік, які знайшоў сабе першае месца працы, такіх прэферэнцый не атрымлівае.
Наталля Качанава пагадзілася, што пытанне зараз актуальнае: размеркаванне выпускнікоў павінна заставацца ў тым ліку для платнікаў, якія жадаюць працаўладкавацца. Яна расказала, што днямі гэтае пытанне ўзнімалася на вышэйшым узроўні і разглядаецца змена суадносінаў набору з памяншеннем набору на пазабюджэтную форму навучання ў бок павелічэння колькасці бюджэтнікаў і студэнтаў з мэтавым накіраваннем. Гаворка аб тым, каб абітурыенты не толькі з невялікіх гарадоў (дзе колькасць насельніцтва не перавышае 20 тысяч чалавек), але і большых гарадоў мелі магчымасць атрымаць мэтавае накіраванне і трапіць на бюджэтнае месца. Наталля Качанава падкрэсліла, прапорцыя будзе змяняцца нейкі час. І гэтае актуальнае пытанне неабходна прапрацаваць у самы бліжэйшы з зацікаўленымі міністэрствамі: адукацыі і фінансаў.
Тэму адукацыі працягнуў адзін са студэнтаў юрыдычнага факультэта, які пацікавіўся лёсам зменаў у Кодэкс аб адукацыі і, у прыватнасці, наданні заканадаўчага статусу такой форме навучання як дыстанцыйнае. Існуе вялікая катэгорыя людзей, якія маюць патрэбу ў атрыманні адукацыі на аддаленні.
Наталля Качанава цалкам пагадзілася з неабходнасцю ўнясення змен, якія прадыктаваныя самім жыццём. Дакумент ужо прыняты ў першым чытанні ў Палаце прадстаўнікоў. Спікер верхняй палаты парламента падкрэсліла важнасць унясення гэтай навацыі ў заканадаўчыя акты.
Яўген Моніч, таксама студэнт юрыдычнага факультэта пацікавіўся перспектывамі новага інстытута, які з’явіўся ў крымінальным працэсе — медыяцыі (днямі сенатары ўхвалілі змены ў Крымінальны кодэкс — заўв. аўт.) Хлопец выказаў сумніў, што ў крымінальным працэсе гэта не самы дзейсны механізм.
Спікер верхняй палаты парламента адзначыла, што інстытут медыяцыі — не новае ў заканадаўстве, у грамадзянскім праве ўжо эфектыўна дзейнічае. Як прыжывецца ў Крымінальным працэсе гэтая навацыя, пакажа час, пераканана спікер верхняй палаты парламента.
У той жа час, Наталля Качанава звярнула ўвагу на тое, што юрыдычна падкаваным неабходна быць не толькі спецыялістам у гэтай галіне, але і ўсім прадстаўнікам грамадства, каб разумець, да чаго могуць прыводзіць розныя дзеянні, якія не стасуюцца з дзеючым заканадаўствам.
Падчас адкрытай гутаркі студэнцкі актыў задаваў таксама пытанні адносна стасункаў удзельнікаў Саюзнай дзяржавы і перспектыў гэтага палітычнага саюза, пераразмеркавання сродкаў дарожнага збору паміж рэгіёнамі, неабходнасцю стварэння адмысловага заканадаўства аб хатнім гвалце, аплаце за студэнцкі інтэрнат, ільгот на праезд для студэнцкай моладзі і гэтак далей.
Па многіх пытаннях, якія прагучалі падчас двухгадзіннай сустрэчы з моладдзю, Наталля Качанава падкрэсліла — актуальныя і злабадзённыя, некаторыя з іх патрабуюць большай прапрацоўкі на заканадаўчым узроўні. Адпаведныя даручэнні будуць дадзены профільным міністэрствам і пастаянным камісіям Савета Рэспублікі для больш грунтоўнага вывучэння.
Вольга АНУФРЫЕВА, фота БелТА
Методыка аказалася запатрабаванай у нашай краіне і за яе межамі.
Лёс другога зборніка ў літаратарскай кар’еры — самы складаны.
На пытанні «Звязды» адказвае галоўны рэдактар расійскага літаратурнага часопіса «Москва».
Ужо традыцыя з нагоды Дня роднай мовы прапаноўваць чытачам праверыць свае веды.
