У кнігарні «Акадэмкніга» ў Мінску адбудзецца прэзентацыя новай кнігі Алеся Бадака

Ад «Інструкцыя па спакушэнні замужніх жанчын» — да «Адзінокага васьмікласніка...»

Паэта, празаіка, дзіцячага пісьменніка Алеся БАДАКА (нарадзіўся ў 1966 годзе на Берасцейшчыне) добра ведаюць чытачы розных узростаў. Піша ён нетаропка, а калі зрабіць агледзіны ўсяго створанага ім — збіраецца перад вачыма сапраўдная бібліятэка. Новая кніга Алеся Бадака «Ідэальны чытач» толькі што пабачыла свет у Выдавецкім доме «Звязда». І першая яе прэзентацыя адбудзецца заўтра, 26 мая, у 16.30 у сталічнай кнігарні «Акадэмкніга».

Ва ўсіх, хто прыйдзе ў гэты дзень у краму па праспекце Незалежнасці , 72, будзе магчымасць набыць новы зборнік аповесцяў і апавяданняў вядомага пісьменніка, атрымаць ад яго даравальны надпіс. Між іншым, менавіта ў «Акадэмкнізе» шырока разгорнуты гандаль кнігамі з аўтографамі. Так што нават на прэзентацыі «Ідэальнага чытача» можна набыць кнігі з аўтографамі Раісы БАРАВІКОВАЙ, Леаніда ДРАНЬКО-МАЙСЮКА, Кацярыны ХАДАСЕВІЧ-ЛІСАВОЙ, Паўла ГУШЧЫНЦА, Людмілы РУБЛЕЎСКАЙ, Надзеі ЯСМІНСКАЙ, Інэсы ПЛЕСКАЧЭЎСКАЙ... Пройдуць гады — і, будзьце ўпэўнены ў гэтым, у сённяшняга пакупніка такіх сапраўды «цёплых» кніг, надзеленых прысутнасцю аўтараў, з’явіцца магчымасць мець сапраўдную бібліятэку рарытэтаў. Дарэчы, «Акадэмкніга» аказвае і паслугі адпраўкі кніг па ўсёй краіне — праз сістэму «Кніга — поштай».

Што да зборніка Алеся Бадака «Ідэальны чытач», то ў кнігу ўвайшлі аповесці і апавяданні, пераважная большасць з якіх у розныя гады друкавалася на старонках не толькі айчынных, але і замежных перыядычных выданняў. Творы Алеся Бадака прыцягваюць да сябе ўвагу як цікавымі сюжэтамі, так і своеасаблівым аўтарскім стылем. Апошні раздзел кнігі складаюць «Запіскі на хаду» — эсэ, прысвечаныя актуальным пытанням літаратурнага жыцця, а таксама той пары, калі аўтар пачынаў свой шлях у літаратуру.

У кнізе Алеся Бадака «Ідэальны чытач» не пакінуць чытача раўнадушным аповесці «Нелюдзімы» і «Адзінокі васьмікласнік хоча пазнаёміцца», апавяданні «Душа твая светлая», «Дождж ліў як з вядра», «Інструкцыя па спакушэнні замужніх жанчын», «Уцёкі на край дажджу», «Па той бок адлюстравання», «...І мора шум у цемрадзі пакоя», «Ідэальны чытач», «Сабака, які забыў сваё імя», «Баптыстка». Вось у імя нераўнадушнай увагі да беларускага слова «Акадэмкніга» і Выдавецкі дом «Звязда» і запрашаюць у кнігарню па праспекце Незалежнасці, 72 самых розных чытачоў ды пакупнікоў кнігі.

Мікола БЕРЛЕЖ