Вы тут

Пахудзець без страты здароўя, або Як абнавіць свае смакавыя рэцэптары


Людзі жадаюць быць прыгожымі незалежна ад пары года, але ў многіх летам з'яўляецца спакуса пахудзець хуценька і пажадана да свайго адпачынку. У інтэрнэце можна знайсці дзясяткі парад, як гэтага дамагчыся. Тут табе і грэчневая дыета, разгрузачныя дні на яблыках, грэйпфрутах, кефіры, а некаторыя ўвогуле адмаўляюцца ад ежы і спрабуюць метады ітэрвальнага, лячэбнага галадання. Але наколькі бяспечны такія экстрэмальныя метады? Аб тым, як скінуць вагу і абзавесціся карыснымі звычкамі ў харчаванні, расказала ўрач-дыетолаг Надзея ЛІТВІНАВА-ГРАЗІЁН.


Ці рэальна скінуць вагу за месяц?

На самай справе ўсё залежыць ад таго, колькі кілаграмаў хацелася б скінуць. Дыетолаг лічыць, што худзець няцяжка, складаней трымаць жаданую вагу.

«Многае залежыць ад фактараў, такіх як узрост, стан здароўя, вага, — тлумачыць дыетолаг. — Напрыклад, чым большая вага, тым хутчэй сыходзяць першыя кілаграмы. Адбываецца гэта за кошт страты вадкасці. Для таго каб страціць хоць бы дзесяць кілаграмаў, дастаткова двух месяцаў. Калі ж вага першапачаткова нязначна перавышае норму, то і кілаграмы сыходзяць павольней. А калі казаць пра бяспечнае пахудзенне, то зніжэнне вагі не павінна перавышаць 3-4 кілаграмы ў месяц».

Важна харчавацца збалансавана і разнастайна. Прадукты лепей ужываць максімальна простыя і старацца выконваць элементарныя правілы «здаровай талеркі»: палова талеркі — розныя салаты ці гародніна халоднай апрацоўкі, прыкладна чвэрць — асноўны прадукт, такі як рыба, птушка або мяса, а астатнюю чвэрць запаўняйце гарнірам, такім як рыс, бульба, грэчка, макарона.

«Важна наладзіць пітны рэжым і звярнуць увагу на ўмеранасць порцый, — раскрывае сакрэт здаровай дыеты Надзея Літвінава-Гразіён. — Старайцеся харчавацца як мага прасцей, нескладанымі стравамі альбо проста аднакампанентнымі. Напрыклад, той жа абед можа складацца з бялку — кавалачка мяса ці рыбы, вугляводаў у выглядзе круп альбо бульбы ці клятчаткі — гародніны».

Хтосьці лічыць, што трэба есці часта і дробнымі порцыямі, а некаторыя ядуць толькі два разы на дзень: раніцай і ўвечары. Спецыяліст лічыць, што ў гэтым пытанні трэба падыходзіць індывідуальна, бо шмат залежыць ад рэжыму дня, фізічнай актыўнасці і стану здароўя ў цэлым. Калі казаць аб кратнасці, то цалкам дастаткова трох поўных прыёмаў ежы: сняданка, абеду і вячэры. Калі адчуваеце неабходнасць, то можна зрабіць 1-2 лёгкія перакусы.

Здаровым перакусам лічацца прадукты з высокім утрыманнем бялку і складаных вугляводаў. Каларыйнасць іх адносна невысокая, тым не менш яны даюць доўгатэрміновае энергетычнае падсілкаванне, паляпшаюць страваванне, спрыяюць росту мышачнай тканкі. Гэта могуць быць арэхі, садавіна, ягады, гародніна, зерневыя булачкі.

Асаблівую ўвагу трэба звярнуць і на пітны рэжым. Ёсць меркаванне, што неабходна выпіваць два літры вады. Аднак, на думку спецыяліста, гэта зусім неабавязкова.

«Справа ў тым, што ёсць пэўныя супрацьпаказанні да павышанага пітнага рэжыму, — тлумачыць дыетолаг. — Варта ўлічваць, што, акрамя пітной вады, маюцца і іншыя крыніцы вадкасцяў, такія як садавіна, гародніна, супы. Важна ўлічваць і пару года.

У сярэднім аднаго літра дастаткова ў асенне-зімовы перыяд і паўтара — у вясенне-летні».

Чым больш гарачае і сухое паветра і актыўней фізічныя нагрузкі, тым больш вадкасці расходуе арганізм. Галоўнае — не грэбаваць пачуццём смагі. Захацелася зрабіць глыток вады — абавязкова зрабіце. Але правіла «ўсё добра ў меру» працуе і тут. Залішняе спажыванне вады — гэта празмерная нагрузка на арганізм.

Наталля ТАЛІВІНСКАЯ.


Універсальныя правілы для тых, хто хоча развіць карысныя звычкі ў харчаванні і нармалізаваць сваю вагу.

Самае галоўнае правіла — адмовіцца ад так званай «смеццевай» ежы: вэнджаніна, маянэз, газіроўка, чыпсы і ўсё тое, што мае насычаны і доўгі склад.

«Лепей выбіраць прадукты з максімальна кароткім складам, — гаворыць дыетолаг. — І памятайце, што на першым месцы ў складзе заўсёды пазначаны прадукт, які змяшчаецца ў найбольшай колькасці».

А вось падлік калорый як метад пахудзення, на думку спецыяліста, сыходзіць на другі план. Большую ўвагу лепш аддаваць якасці харчавання, а не колькасці. Хоць у некаторых выпадках, такіх як харчаванне спартсменаў пры падрыхтоўцы да спаборніцтваў, падлік калорый — рэч патрэбная.

Другім універсальным правілам спецыяліст лічыць разнастайнае харчаванне: «Калі адмовіцца ад вялікай колькасці салодкага, мучнога і салёнага, то рэцэптары ачышчаюцца, і чалавек пачынае адчуваць больш смакаў і атрымлівае большае задавальненне ад ежы. І, вядома, не грэбуйце зваротам да спецыяліста, калі сапраўды прынялі для сябе рашэнне зменшыць сваю вагу. Ён дапаможа правільна скласці адпаведны план харчавання і ўкараніць карысныя звычкі ў жыццё».

Выбар рэдакцыі

Калейдаскоп

«Ураджайны» тэст

«Ураджайны» тэст

Надыходзіць жнівень — самы ўраджайны, працоўны, смачны час. І наш чарговы тэст менавіта пра ўраджай і ўсё, што з ім звязана.

Грамадства

Лета выходзіць на фінішную прамую! Чаго чакаць ад надвор'я ў жніўні? Прагноз ад Дзмітрыя Рабава

Лета выходзіць на фінішную прамую! Чаго чакаць ад надвор'я ў жніўні? Прагноз ад Дзмітрыя Рабава

У жніўні цяпла будзе ўдосталь, але без дажджу і маланкі не абыдзецца.

Калейдаскоп

Усходні гараскоп на наступны тыдзень

Усходні гараскоп на наступны тыдзень

КАЗЯРОГ. На гэтым тыдні будзе карыснае ўменне аналізаваць сітуацыю і паводзіны людзей і рабіць правільныя высновы. Паспрабуйце быць гранічна сумленнымі з самімі сабой, зніміце ружовыя акуляры. Цяпер пажадана не эпаціраваць навакольных экстравагантнасцю і рэзкімі развагамі. 

Грамадства

Адзін дзень у Вязынцы: вандруем разам са «Звяздой» па Беларусі

Адзін дзень у Вязынцы: вандруем разам са «Звяздой» па Беларусі

У летні час так хочацца на мора, ці, хоць бы ў падарожжа...