Цудоўная сямёрка ў Барысаве

«КRAJ» — выстаўка жывапісу пад такой кароткай, але ёмістай назвай адкрылася 14 кастрычніка ў мастацкай галерэі «З’ява» Барысаўскай цэнтральнай раённай бібліятэкі імя І. Х. Каладзеева. Падзея прымеркавана да рэспубліканскай акцыі «Барысаў — культурная сталіца Беларусі 2021 года».

Дазвольце спачатку азірнуцца назад і сказаць пра апошні знак любові да роднага горада ўраджэнца Барысава, знакамітага мастака-жывапісца Валерыя Шкарубы. Калі б год таму ён не дапамог супрацоўнікам аддзела галерэйна-выставачнай дзейнасці цэнтральнай бібліятэкі, зрабіўшы важны тэлефонны званок выкладчыку факультэта жывапісу Беларускай акадэміі мастацтваў мастаку Антону Вырву, выстаўкі «КRAJ» сёння не адбылося б. Высокае прафесійнае мастацтва — экспазіцыя з больш як 50 работ — даніна павагі і памяці Валерыю Фёдаравічу.

Светлай прасторы галерэі «З’ява» для выдатных твораў аказалася мала. Работы размясціліся і на сценах суседняй галерэі «ARTквартал».

— Групу з сямі мастакоў, якія ярка заявілі пра сябе, узначальвае Антон Вырва. Ён прапаноўваў для экспазіцыі 6 карцін. У гэтай плеядзе — паважаныя і вядомыя беларускія мастакі Васіль Пяшкун, Віталь Гуназа, Міхась Крот, Павел Хадаровіч, Раман Коршунаў, Уладзь Пятручык, — адзначыла на адкрыцці выстаўкі загадчык аддзела галерэйна-выставачнай дзейнасці Таццяна Кірылава. — Мастакі прыехалі ў Барысаў за некалькі дзён да адкрыцця праекта — з мэтай стварыць мастацкую серыю аб нашым горадзе. Папрацавалі плённа! Пры гэтым два пейзажы, што называецца, «з колаў» трапілі на цяперашнюю выстаўку — «Восеньскі дворык у Барысаве» Міхася Крата і «Восень у старым горадзе» Васіля Пешкуна. Да прэзентабельных ілюстрацый старой часткі нашага горада Васіль Пяшкун дадаў твор 2017 года «Ціхі дворык».

Калі казаць пра геаграфію работ, дэманструюцца розныя куткі Беларусі: Магілёўшчына, Гомельшчына, Міншчына... Прырода, як аднойчы сказаў Валерый Шкаруба, — невычэрпная крыніца натхнення. А значыць, кожная новая карціна — новы глыток паветра ў жанры класічнага рэалізму. Таму, напэўна, невыпадкова многія музеі і галерэі краіны стаяць у чарзе па работы цудоўнай сямёркі, сабраныя ў экспазіцыі «КRAJ». Майстэрства, глыбіня спасціжэння сутнасці беларускай прыроды, выдатны каларыт, дзівосны ўнутраны змест карцін блізкія і зразумелыя гледачу любога ўзросту.

На адкрыцці экспазіцыі майстар пленэру барысаўчанін Пётр Казявін зазначыў:

— Барысаву пашанцавала любавацца такім магутным жывапісам. Прыгажосць прыроды перададзена незвычайна, аўтары з ёй зліваюцца ў адно цэлае.

Культуролаг Галіна Глебава дадала, што кожны чалавек убачыць у гэтых творах нешта сваё, роднае, а ўвасабляецца яно ў звычайным і простым паняцці «Беларусь». Тут бачыцца вялікая любоў да роднага краю.

— Уменне шчыра паказваць прыгажосць свету вартае павагі. Слова «мастак» для гэтых майстроў не прафесія, а жыццё і лёс, — перакананы творца Уладзімір Сайко.

Пранікнёныя, глыбокія і запамінальныя вобразы роднай Беларусі тонка перадаюць дзіўнае майстэрства ўдзельнікаў экспазіцыі «КRAJ». Дарэчы, творчы лёс дваіх звязаны з Барысаўшчынай. Антон Вырва вучыўся ў Фёдара Кісялёва, роднага брата барысаўскага мастака Мікалая Кісялёва. А юны Уладзь Пятручык, які калісьці прыязджаў у вёску Чарневічы, браў урокі ў Мікалая Ісаёнка. Музыка пейзажу, увасабленне на палотнах рэальна існуючых месцаў упрыгожваюць культурную сталіцу Беларусі сёння. Заўтра яны абавязкова стануць упрыгажэннем любой іншай выстаўкі.

Алена БРЫЦКАЯ