Усіх ахвотных запрашае новы спартыўны аб'ект у Міханавічах

У аграгарадку Міханавічы Мінскага раёна адкрылі сучасны шматфункцыянальны фізкультурна-аздараўленчы комплекс «Кіт».

Гэта добры падарунак жыхарам пасёлка, дзе налічваецца больш як 10 тысяч чалавек. На тэрыторыі сельсавета размешчаны 15 населеных пунктаў, у тым ліку два аграгарадкі, больш як 100 устаноў, прадпрыемстваў і арганізацый розных формаў уласнасці, школы, дзіцячыя садкі, аддзяленне дзённага пражывання для інвалідаў і грамадзян пажылога ўзросту. Яны таксама змогуць наведваць ФАК, дзе будуць праходзіць рэабілітацыю. У комплексе створана безбар'ернае асяроддзе для людзей з абмежаванымі магчымасцямі.

— Гэты знакавы аб'ект мы пабудавалі разам з адкрытым акцыянерным таварыствам «Газпрам трансгаз Беларусь». І я ўдзячны яго генеральнаму дырэктару Уладзіміру Маёраву за супрацоўніцтва, — адзначыў падчас урачыстай цырымоніі адкрыцця старшыня Мінаблвыканкама Аляксандр Турчын. — У аграгарадку жыве шмат газавікоў, абслуговага персаналу, якія працуюць на гэтым прадпрыемстве. Цяпер у іх з'явілася магчымасць пасля напружанай работы добра адпачыць. Комплекс у Міханавічах — пачатак рэалізацыі такіх сумесных праектаў у вобласці. Сёння падпісана пагадненне з Крупскім раёнам. Мяркую, сёлета зробім праектаванне, магчыма, пачнём там будаўніцтва спартыўнага аб'екта і завершым яго ўзвядзенне ў 2023-м.

У наступныя гады, па словах Аляксандра Турчына плануецца значную ўвагу ўдзяляць развіццю сацыяльна-транспартнай інфраструктуры ў Мінскім раёне. Тут размешчаны буйныя населеныя пункты: Бараўляны, Калодзішчы, Мачулішчы, Гатава, Лугавая Слабада і іншыя. Аднак інфраструктура не адпавядае патрабаванням, якія аб'ектыўна выказваюць людзі. Для паляпшэння якасці дарог у Мінскім раёне прадугледжаны дадатковыя фінансавыя рэсурсы з абласнога бюджэту. Вядома, навядзенне парадку патрабуе значных затрат. Тым не менш, як бы складана ні было, вобласць, рэгіёны будуць укладваць сродкі ў аб'екты, якія паляпшаюць якасць жыцця людзей, уплываюць на іх здароўе, настрой.

Вядома, за папярэднія гады ў раёне зроблена нямала, з'явіліся новыя дзіцячыя садкі, школы, установы аховы здароўя, будаўніцтва якіх працягнецца і ў далейшым. Сёлета яны таксама будуць уводзіцца ў дзеянне. У планах на 2022-гі — больш маштабна падысці да Мачулішчаў, дзе яшчэ шмат праблем. У прыватнасці, неабходна ўладкаваць там дваровыя тэрыторыі, дарогі.

Фізкультурна-аздараўленчы комплекс у Міханавічах узведзены дастаткова аператыўна. У сакавіку 2020-га пачалі будаўніцтва, у снежні 2021-га аб'ект быў здадзены. Тут прадугледжаны 25-метровы басейн на 4 дарожкі і басейн, дзе будуць навучаць плаванню дзяцей, усіх ахвотных. У будучым з'явіцца аддзяленне воднага пола. Акрамя таго, у комплексе ёсць фітнес-зала, трэнажорная зала, цэнтр развіцця, турэцкая лазня і саўна, кафэ, фітабар. Побач з ФАКам уладкаваны адкрытыя футбольная, валейбольная, тэнісная пляцоўкі, аўтастаянка.

— Я думаю, што комплекс стане месцам прыцягнення не толькі жыхароў Міханавіч, але і суседніх аграгарадкоў, у цэлым Мінскага раёна. Таму што мы размешчаны на самай галоўнай артэрыі — трасе М1. Можна сказаць, што ўсе дарогі вядуць да нас. І мы будзем рады ўсім, — адзначыла старшыня Міханавіцкага сельвыканкама Святлана Давальцова. — Спадзяёмся, што ў нас будуць яшчэ новыя цікавыя аб'екты — аддзяленне рэабілітацыі са змяшанай паліклінікай, гандлёвы цэнтр, дзе можна будзе не толькі зрабіць пакупкі, але і адпачыць усёй сям'ёй. Зямельныя ўчасткі для гэтага ёсць.

Асноўнае прызначэнне комплекса — падрыхтоўка спартыўнага рэзерву па плаванні. Але аздаравіцца тут могуць усе ахвотныя. Жыхары Міханавіч і іншых населеных пунктаў могуць набыць абанемент на паслугі або наведаць ФАК аднаразова ў той час, калі тут не будзе трэніровак юных плыўцоў. У комплексе будуць створаны групы па навучанні плаванню, прадугледжаны такія паслугі як аквастэп, аквааэробіка. Таксама тут будуць праводзіцца спартыўныя мерапрыемствы.

Спартыўны аб'ект стаў сапраўдным падарункам, які з нецярпеннем чакалі мясцовыя жыхары. Да гэтага ім даводзілася ездзіць у Мінск, каб паплаваць. Цяпер жа ўсё неабходнае для заняткаў спортам, аздараўлення — побач, пад бокам, што дасць магчымасць сэканоміць час. Да комплексу зручна дабірацца з любога пункта пасёлка, паколькі ён пабудаваны практычна ў цэнтры аграгарадка.

На наваселле, як правіла, дораць падарункі. І гэтым разам кіраўнік цэнтральнага рэгіёна ўручыў дырэктару дзіцяча-юнацкай спартыўнай школы Алене Даніловіч сертыфікат на 30 тысяч рублёў для набыцця неабходнага інвентару. Менавіта на баланс гэтай установы перададзены ФАК.

Таццяна ЛАЗОЎСКАЯ