Кітай заклікаў ЗША і Японію не правакаваць раскол пад выглядам супрацоўніцтва

Кітай настойліва заклікаў ЗША і Японію не палітызаваць і не ператвараць у зброю гандлёва-эканамічныя і навукова-тэхнічныя пытанні, не выкарыстоўваць іх для празмерна шырокай трактоўкі паняцця бяспекі, а таксама не накіроўваць сваю дзейнасць супраць трэціх бакоў і не падрываць іх інтарэсы, тым больш не правакаваць раскол і канфрантацыю пад выглядам супрацоўніцтва і дыялогу. Афіцыйны прадстаўнік МЗС КНР Чжаа Ліцзянь зрабіў такую заяву сёння падчас чарговага брыфінгу для журналістаў, перадае «Жэньмінь жыбаа» анлайн».

Як вядома, 29 ліпеня дзяржаўны сакратар ЗША Энтані Блінкен, міністр гандлю Джына Райманда і іх калегі з Японіі — міністр замежных спраў Есімаса Хаясі і міністр эканомікі, гандлю і прамысловасці Каіці Хагіуда — правялі першую міністэрскую сустрэчу амерыкана-японскай кансультатыўнай камісіі па пытаннях эканамічнай палітыкі ў фармаце «2+2». Блінкен сказаў, што бакі абмяркоўвалі Кітай і яго «палітыку эканамічнага прымусу», якая, на іх думку, супярэчыць адкрытай, інклюзіўнай, заснаванай на правілах міжнароднай эканамічнай сістэме.

Чжаа Ліцзянь у адказ заявіў, што Кітай заўсёды прытрымліваецца прынцыпаў адкрытасці, інклюзіўнасці, узаемнай выгады і агульнага выйгрышу, садзейнічае пабудове сусветнай эканомікі адкрытага тыпу і дзеліцца магчымасцямі развіцця з іншымі краінамі. «Кітай ніколі не ўмешваецца ў чужыя справы, не развязвае гандлёвых войнаў, не прымушае і не прыгнятае замежныя кампаніі», — адзначыў дыпламат.«Аднак ёсць мноства прыкладаў эканамічнага прымусу з боку ЗША. Эканамічныя санкцыі, тэхналагічная блакада, прыгнёт замежных прадпрыемстваў і гэтак далей — Злучаныя Штаты не грэбуюць ніякімі з пералічаных сродкаў. Іх мэта — захаваць уласную эканамічную гегемонію. Гэта не толькі супярэчыць асноўным законам рынку , але і парушае правілы міжнароднага гандлю», — падкрэсліў Чжаа Ліцзянь.

Па іроніі лёсу, сама Японія з’яўляецца ахвярай эканамічнага прымусу з боку ЗША, зазначыў ён. З 1980-х гадоў ЗША неаднаразова ўводзілі эканамічныя санкцыі супраць Японіі, рознымі спосабамі душылі канкурэнтаздольныя галіны японскай прамысловасці і нават спрабавалі правесці «хірургічную аперацыю» на эканамічнай структуры Японіі, што з’яўляецца хрэстаматыйнымі прыкладамі эканамічнага прымусу, заўважыў Чжаа Ліцзянь. «Чаму японскі бок пакутуе на выбарчую амнезію і слепа падпарадкоўваецца ЗША? Гэта выклікае здзіўленне», — дадаў афіцыйны прадстаўнік МЗС КНР.