Вы тут

Качанава: У пытаннях дыспансерызацыі не павінна быць фармалізму


Старшыня Савета Рэспублікі Наталля Качанава прыняла ўдзел у пасяджэнні Лепельскага райвыканкама Віцебскай вобласці. Падчас сустрэчы з актывам раёна былі ўзняты пытанні рэалізацыі Дзяржаўнай праграмы «Здароўе народа і дэмаграфічная бяспека Рэспублікі Беларусь на 2021-2025 гады» і падведзены вынікі работы назіральных камісій за 2022 год.


Лепельшчына — маляўнічы куток нашай краіны, наскрозь працяты воднымі артэрыямі. Тут размяшчаюцца беларускія здраўніцы: ваенны санаторый, дзіцячы рэабілітацыйна-аздараўленчы цэнтр «Жамчужына», горад мае выгаднае геаграфічнае становішча, адным словам, усе фактары садзейнічаюць не толькі замацаванню кадраў, але і паляпшэнню дэмаграфічнай сітуацыі ў раёне. Галоўная задача кіраўніцтва — забяспечыць маладых спецыялістаў жыллём і добрай зарабатнай платай, стварыць камфортныя ўмовы працы. 

Аб тым, што замацаванне ўрачоў у Лепельскім раёне знаходзіцца на высокім узроўні — паказчык складае 100 працэнтаў — на пасяджэнні райвыканкама далажыў галоўны ўрач Лепельскай цэнтральнай раённай бальніцы Аляксей Пракоф’еў. Ён таксама адзначыў, што гэты ж паказчык сярод астатняга медперсаналу значна ніжэйшы — прыкладна 70 працэнтаў, — што абумоўлена міграцыяй кадраў у іншыя ўстановы медыцынскага абслугоўвання Лепельшчыны, аднак усе медработнікі застаюцца ў межах раёна. З мэтай падтрымкі маладых спецыялістаў кіраўніцтва прадастаўляе арэнднае жыллё, так у мінулым годзе ўрачы засяліліся ў чатыры новыя арэндныя кватэры, усяго за апошніх два гады медработнікам было прадастаўлена 26 кватэр і месцаў у інтэрнаце. 

Наталля Качанава адзначыла важнасць правядзення рэальнай работы па дыспансерызацыі насельніцтва без бюракратызму і пацікавілася, якая работа з насельніцтвам праводзіцца па гэтым пытанні. «Абавязковая штогадовая дыспансерызацыя насельніцтва — ідэя выдатная, заканадаўча замацаваная. Важна на месцах прадумаць стратэгію яе эфектыўнай рэалізацыі. Вы маеце права самастойна абраць найбольш прыдатную для раёна схему працы, каб было зручна і людзям, і лекарам, і галоўнае — дзейсна», — падкрэсліла Наталля Іванаўна. 

Пакуль у Лепельскай раённай бальніцы складаюць аптымальную сістэму працы з насельніцтвам, магчыма, яўка на дыспансерызацыю для грамадзян будзе абрана месяцам нараджэння.

Старшыня Савета Рэспублікі абазначыла праблемы ў сферы аховы здароўя раёна, на якія варта звярнуць увагу: дэмаграфічная сітуацыя, павышэнне смяротнасці грамадзян па прычыне сардэчна-сасудзістых захворванняў, высокі працэнт людзей, якія злоўжываюць алкаголем. «Да вырашэння апошняга пытання павінны падключыцца не толькі ўрачы, а ўсе арганізацыі і службы. Мы не маем права адкідаць каго-небудзь, гэта ўсе нашы людзі».

Людзі, якія пакутуюць ад алкагольнай залежнасці, міжволі зніжаюць паказчык не толькі сферы аховы здароўя, але і бяспекі. Так, у 2022 годзе ад знешніх прычын у Лепельскім раёне загінулі 19 чалавек, 12 з якіх знаходзіліся ў стане ап’янення. З 36 пажараў 25 адбыліся па прычыне невыканання правілаў бяспекі жыццядзейнасці катэгарыраванымі грамадзянамі. З мэтай зніжэння колькасці дарожна-транспартных здарэнняў, на якіх летась загінулі 4 чалавекі, было ўстаноўлена шэсць штучных няроўнасцяў і абсталявана пяць пешаходных дарожак. Траса М3, якая з’яўляецца галоўнай транспартнай артэрыяй Лепеля, адначасова з’яўляецца і месцам павышанай небяспекі: недастатковае асвятленне, дзікія звяры, якія выходзяць на дарогу. «Сёлета пачнуцца рамонтныя работы на лепельскай трасе, ужо з бюджэту выдзелены сродкі», — адзначыла Наталля Качанава.

Падводзячы вынік сустрэчы з актывам раёна, старшыня верхняй палаты парламента яшчэ раз звярнула ўвагу на адказнасць кожнага кіраўніка на месцах за фарміраванне ўстойлівай эканомікі і пазітыўнага іміджу рэгіёна. «Калі ўсе пачнуць займацца агульнай справай, гэта абавязкова дасць добры вынік».

Аляксандра ГВОЗДЗЕВА

Аб іншых адрасах паездкі Наталлі Качанавай на Лепельшчыну — у бліжэйшым выпуску «Мясцовага самакіравання»

Фота: ТГ-канал Савета Рэспублікі 

Выбар рэдакцыі

Калейдаскоп

Усходні гараскоп на наступны тыдзень

Усходні гараскоп на наступны тыдзень

Казярогам важна на гэтым тыдні скончыць неадкладную справу, якая ўжо даўно не дае спакою.

Здароўе

Як вясной алергікам аблегчыць сваё жыццё?

Як вясной алергікам аблегчыць сваё жыццё?

Некалькі парад ад урача-інфекцыяніста.