Пленэр беларускіх масткоў прайшоў у Башкартастане

У апошні час складваюцца даволі шырокія стасункі паміж Рэспублікай Беларусь і Рэспублікай Башкартастан (Расійская Федэрацыя) у галіне культуры. Гэтаму паспрыяў і беларуска-расійскі форум, які прайшоў ва Уфе — сталіцы Башкартастана.

Адным з адметных творчых праектаў стаў і мастацкі пленэр беларускіх і расійскіх мастакоў у Башкартастане. Расказвае адзін з яго ўдзельнікаў беларускі жывапісец Віктар Барабанцаў:

Каля месяца мы працавалі ў розных ваколіцах Уфы. Я з вялікай цікавасцю адкрываў для сябе башкірскія краявіды. Ды і не толькі краявіды. З прыемнасцю пазнаёміўся з многімі яркімі асобамі ў башкірскім нацыянальным жывапісе. Здавалася б, выяўленчае мастацтва носіць выключна інтэрнацыянальны характар, а вось пэўныя драбнічкі сведчаць, што ў працах башкірскіх мастакоў ёсць свае адметнасці, свой, як кажуць, твар. Башкартастану па выніках пленэра я пакінуў партрэт башкіркі. Цэлы шэраг напрацовак прывёз дахаты, у Беларусь. Лічу, што час не змарнаваў... І Башкартастан, яго людзі надоўга застануцца ў маёй творчай і проста чалавечай памяці.

У пленэры ў Башкартастане прынялі ўдзел і іншыя творцы з Беларусі — старшыня Беларускага Саюза мастакоў Глеб Отчык, жывапісец Леанід Гоманаў, іншыя мастакі.

Дарэчы, сёлета было падпісана Пагадненне аб супрацоўніцтве паміж двума пісьменніцкімі арганізацыямі — Беларусі і Башкартастана. Мяркуецца, што ў бліжэйшы час пабачаць зборнікі твораў пісьменнікаў Беларусі — ва Уфе, у перакладзе на башкірскую мову, а ў Мінску — анталогія башкірскай літаратуры ў перакладзе на беларускую мову.

Выдатна было б, каб такую інтэграцыйную працу ў галіне культуры прадоўжылі і іншыя творчыя аб’яднанні Беларусі і Башкартастана, што, безумоўна, паспрыяе яднанню нашых народаў, развіццю ўяўленняў пра беларускую культуру ў Башкартастане, пра башкірскую нацыянальную культуру — у Беларусі.

Раман СЭРВАЧ