Вы тут

Надвор'е: На працягу тыдня пацяплее да 17 градусаў


Кастрычнік быў не занадта «мяккі», гэта пасля анамальна цёплага верасня. А цяпер надвор’е «згадала», што ў нас пацяпленне, і зноў уключыла цяпло.


Фота: pixabay.com

А ў мінулыя выхадныя пераважала пахмурнае і халоднае надвор’е. Паводле апошніх звестак, сярэднясутачная тэмпература паветра па краіне яшчэ ўчора з раніцы знаходзілася ў межах ад мінус 1 градуса да плюс 8, што ў асноўным на 1–5 градусаў ніжэй за кліматычную норму. Але ўжо ў панядзелак на тэрыторыю нашай краіны пачынае паступаць цёплая паветраная маса з паўднёвага захаду Еўропы. Тэмпературны фон павышаецца і ў апошні дзень кастрычніка будзе некалькі вышэйшым за кліматычную норму. Як паведамляюць спецыялісты Рэспубліканскага цэнтра па гідраметэаралогіі, кантролі радыеактыўнага забруджвання і маніторынгу навакольнага асяроддзя Мінпрыроды, лістапад прымае эстафету кастрычніка з цёплага, але дажджлівага надвор’я.

А ў аўторак ноччу будзе пераважна без ападкаў. Раніцай і днём у многіх раёнах пройдуць невялікія дажджы. Ноччу і раніцай месцамі чакаецца туман. Тэмпература паветра ўначы складзе плюс 5–11 градусаў, удзень — 11–17 градусаў, на паўднёвым захадзе да 19 цяпла.

У чацвер і пятніцу за надвор’е ў Беларусі пачне адказваць вобласць павышанага атмасфернага ціску, таму абыдзецца пераважна без ападкаў, толькі ў ноч на чацвер з адыходзячым франтальным раздзелам па ўсходзе краіны месцамі пройдуць кароткачасовыя дажджы. Уначы і раніцай у асобных раёнах краіны будзе слабы туман, на дарогах месцамі галалёдзіца. Тэмпература паветра ўначы ад мінус 2 да плюс 5 градусаў, удзень — ад плюс 5 па паўночным усходзе да плюс 13 градусаў па паўднёвым захадзе краіны.

У пятніцу таксама будзе пераважна без ападкаў. Ноччу і раніцай у асобных раёнах чакаецца слабы туман, на дарогах месцамі будзе галалёдзіца. Тэмпература паветра ўначы складзе 1–7 градусаў вышэй за нуль, па ўсходзе пры праясненнях — да мінус 2 градусаў. Днём слупок тэрмометра па паўночным усходзе краіны падымецца да плюс 5, па паўднёвым захадзе — 13 цяпла.

Згодна з папярэднім прагнозам, у гэтыя выхадныя ўлада над надвор’ем зноў пяройдзе да атмасферных франтоў. Павялічыцца і ўшчыльніцца воблачнасць, і кароткачасовыя дажджы будуць адзначацца ў многіх раёнах краіны. Разам з тым, шчыльная франтальная воблачнасць будзе перашкаджаць начным замаразкам. Уплыў франтальнага раздзелу, які ссоўваецца праз тэрыторыю нашай краіны, будзе адбівацца і ў нядзелю.

А 4 лістапада, у суботу, на большай частцы тэрыторыі краіны пройдуць кароткачасовыя дажджы. Тэмпература паветра ўначы складзе ад плюс 1 градусаў па паўночным усходзе да плюс 12 градусаў па паўднёвым захадзе нашай краіны, днём — ад 7 градусаў цяпла ў паўночных раёнах да плюс 15 градусаў у паўднёвых.

У нядзелю на большай частцы тэрыторыі краіны пройдуць кароткачасовыя дажджы. Уначы і раніцай у асобных раёнах чакаецца слабы туман. Тэмпература паветра ўначы складзе 5–11 цяпла, удзень — 9–15 градусаў, на поўдні — да плюс 17.

Там амаль бабіна лета. Амаль. І ненадоўга.

Сяргей КУРКАЧ

Выбар рэдакцыі

Сям'я і дэмаграфія

Святлана Клачкова: Чым больш дзяцей, тым больш любові

Святлана Клачкова: Чым больш дзяцей, тым больш любові

Як жа шматдзетная сям’я спраўляецца з хатнімі клопатамі? 

Культура

Сёлета музей Янкі Купалы адзначае юбілей

Сёлета музей Янкі Купалы адзначае юбілей

«Пласт роднай зямлі — п’едэстал для паэта...» 

Грамадства

Ці забяспечваецца ахова грамадскага парадку на Мінскім моры?

Ці забяспечваецца ахова грамадскага парадку на Мінскім моры?

Пра гэта даведаліся карэспандэнты «Звязды».

Гандаль

Кандытарскія вырабы — брэнд беларускай харчовай прамысловасці

Кандытарскія вырабы — брэнд беларускай харчовай прамысловасці

Напярэдадні Міжнароднага сімпозіума кандытараў эксперты расказалі аб планах і перспектывах кандытарскай галіны.