Пытанні партнёрства дзяржавы і моладзі сталі галоўнымі падчас «Адкрытага дыялогу» ў Гомелі. Сюды з усіх раёнаў вобласці з'ехаліся маладыя людзі — лідары абласной арганізацыі БРСМ. Экспертам яны задавалі вострыя пытанні і выказвалі свае ідэі.
— На мой погляд, дыялог атрымаўся, — адзначыла старшыня Цэнтральнай кантрольнай камісіі БРСМ, кіраўнік праекта «100 ідэй для Беларусі» Алеся Віннік. — І спікеры, і моладзь сябе рэалізавалі. Моладзь задавала пытанні, якія былі пачуты.
Са жніўня на Гомельшчыне прайшло больш як 40 аналагічных сустрэч, у якіх узялі ўдзел звыш 2,5 тысячы маладых людзей. На апошняй пад назвай «Дзяржава і моладзь: у партнёрстве залог поспеху» маладыя людзі выступілі з прапановамі стварыць музей гісторыі студатрадаўскага руху, правесці сустрэчы прадстаўнікоў розных маладзёжных грамадскіх аб'яднанняў. Адной з тэм для абмеркавання на сустрэчы сталі выбары ў Палату прадстаўнікоў Нацыянальнага сходу Рэспублікі Беларусь шостага склікання.
— Поспех перадвыбарнай гонкі залежыць ад саміх кандыдатаў у дэпутаты, ад іх выразных мэт і перакананняў, — лічыць начальнік галоўнага ўпраўлення ідэалагічнай работы, культуры і па справах моладзі Гомельскага аблвыканкама Ірына Даўгала. — Важна на кожным выбарчым участку звярнуць увагу на маладых людзей, якія галасуюць упершыню. На выбарах мы аддаём свой голас за міралюбную палітыку дзяржавы, за развіццё краіны, яе рух наперад.
Юнакі і дзяўчаты цікавіліся: якімі лідарскімі якасцямі павінен валодаць сёння малады чалавек, каб стаць паспяховым у сваёй галіне, як трапіць у перспектыўны кадравы рэзерв. Былі і пытанні, нечаканыя для спікераў: з якімі складанасцямі сутыкнуўся бы сённяшні малады чалавек, калі б ён апынуўся ў 1980—1990-х гадах, што было б складана для маладога чалавека з тых часоў у сучасным свеце? Як уплываюць сацыяльныя сеткі на фарміраванне грамадства?
Таксама былі агучаны думкі, звязаныя з папулярызацыяй сямейных каштоўнасцяў і магчымасцю падтрымкі дзяржавай маладых сем'яў. Варта адзначыць, што сустрэча стала пляцоўкай абмеркавання сапраўды актуальных і цікавых для моладзі тэм.
— Такіх пляцовак павінна быць значна больш, — адзначыў першы сакратар Гомельскай абласной арганізацыі БРСМ Ігар Завалей. — Усе ініцыятывы, якія былі агучаны падчас шматлікіх «Адкрытых дыялогаў» у Гомельскай вобласці, не ўяўляюць сабою нічога складанага ў плане рэалізацыі. У хуткім часе мы іх прапрацуем з мясцовай выканаўчай уладай і рэалізуем.
Ірына АСТАШКЕВІЧ
Фіналістка праекта «Акадэмія талентаў» на АНТ — пра творчасць і жыццё.
На гэтым тыдні Цяльцы будуць проста незаменныя ўсюды, дзе іх ведаюць.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.
