Адлік гісторыі адкрытага акцыянернага таварыства «Амкадор» — кіруючая кампанія холдынгу» вядзецца з 1 лютага 1927 года. Стартаваў жа шлях тагачаснага завода «Ударнік» з вырабу дзіцячых цацак ды першых на тэрыторыі СССР дзесятковых шаляў. Ішоў час, і праз 25 гадоў пасля заснавання прадпрыемства было перададзена пад кіраўніцтва Міністэрства дарожнага і будаўнічага машынабудавання.
— Сёння ж наш холдынг — прызнаны лідар па вытворчасці спецыяльнай тэхнікі на тэрыторыі СНД. Ён уключаны ў Рэестр высокатэхналагічных вытворчасцяў і прадпрыемстваў, — расказвае намеснік генеральнага дырэктара — тэхнічны дырэктар кіруючай кампаніі холдынгу «Амкадор» Уладзімір Гарбелік. — У яго састаў уваходзіць 21 прадпрыемства з Беларусі, Расіі, Казахстана, Узбекістана, Літвы... Штогод з канвеераў заводаў, з якіх складаецца холдынг, сыходзіць каля пяці тысяч адзінак тэхнікі. Вытворчасць сертыфікавана па сусветных стандартах ІSO 9001-2009 і DІN EN ІSO 9001-2008.
Як жа расшыфраваць назву «Амкадор»? Справа ў тым, што ў 1991 годзе было створана аднайменнае акцыянернае таварыства, у якое ўваходзілі прадпрыемствы па выпуску дарожнай тэхнікі з чатырох гарадоў: Андропава, Мінска, Карасценя і Арла. Аднак неўзабаве Савецкі Саюз знік з карты свету, і прадпрыемствы сталі ўласнасцю трох дзяржаў — Беларусі, Расіі і Украіны. Тым не менш, назва «Амкадор» усё ж засталася за беларускім вытворцам.
Перада мной ляжыць каталог прадукцыі прадпрыемстваў холдынгу. Цяжка адшукаць тую галіну народнай гаспадаркі, дзе б не былі запатрабаваны спецыяльныя машыны пад маркай «Амкадор». І гэта не дзіўна: асартымент прадукцыі налічвае звыш 90 мадэляў і іх мадыфікацый. Разнастайныя пагрузчыкі — аднакаўшовыя франтальныя і ўніверсальныя, з бартавым паваротам і тэлескапічнай стралой, якім няма аналагаў на прасторах СНД, вілачныя... Лесанарыхтоўчыя шматаперацыйныя машыны — харвестары, форвардары, цягачы тралёвачныя, лесапагрузчыкі — здольны забяспечыць усе стадыі сучаснай тэхналогіі нарыхтоўкі і перапрацоўкі драўніны. А вось і дзясятак мадэляў шматфункцыянальных снегаўборачных машын, якія разлічаны на працу нават у самых складаных умовах надвор'я кшталту незабыўнага сакавіцкага «Хаўера». Разнастайныя машыны на базе трактароў «Беларус» — экскаватары-бульдозеры, экскаватары-пагрузчыкі, фрэзерна-ротарныя снегаачышчальнікі, якія адрозніваюцца прастатой кіравання і працяглым тэрмінам эксплуатацыі. Сем мадэляў каткоў, якія служаць для ўшчыльнення грунту, дарожных асноў і пакрыццяў і адрозніваюцца адзін ад аднаго прызначэннем і масай. Машыны для распрацоўкі тарфяных радовішчаў... Ад прапанавага асартыменту разбягаюцца вочы.
Тэхніка «Амкадора» мае еўрапейскі дызайн і пастаянна мадэрнізуецца з улікам патрабаванняў сусветнага рынку. Непасрэдна для аператараў у машынах прадугледжаны максімальныя зручнасці. Да таго ж цэны на спецыялізаваную тэхніку пад маркай «Амкадор» ніжэйшыя за расцэнкі, якія выстаўляюць канкурэнты холдынгу. І калі розніцы няма, то які сэнс плаціць за такі ж тавар больш?
Тавараправодная сетка, праз якую рэалізуецца прадукцыя «Амкадора», складаецца з 70 кампаній у Расіі, 20 арганізацый у іншых краінах СНД і 11 — у далёкім замежжы. Амаль усе яны маюць гандлёва-выставачныя плошчы тэхнікі, сэрвісныя цэнтры, мабільныя тэхнічныя брыгады і склады запасных частак. Усё гэта не толькі максімальна набліжае асартымент прадукцыі да пакупніка, але і забяспечвае надзейнае сэрвіснае абслугоўванне, у тым ліку і рамонт машын у максімальна кароткія тэрміны. Дарэчы, тэхніка маркі «Амкадор» адрозніваецца высокім узроўнем уніфікацыі. Гэта значыць, што шматлікія вузлы і дэталі выпускаемых машын цалкам сумяшчальныя з камплектуючымі вядучых сусветных вытворцаў.
Паспяхова асвойвае «Амкадор» і новыя рынкі збыту прадукцыі. У адпаведнасці з патрабаваннямі Еўрапейскага саюза, сертыфікацыю атрымалі ўніверсальны пагрузчык АМКАДОР 320 СЕ і пагрузчык з бартавым паваротам АМКАДОР 211Е. Хутка да іх далучыцца мадэль АМКАДОР 330СЕ, каток АМКАДОР 6223Е. Ужо сёлета першыя экзэмпляры гэтых машын стануць працаваць у Прыбалтыцы, Польшчы, Балгарыі, Румыніі і Сербіі. Ва ўсіх гэтых краінах адкрыюцца і дылерскія цэнтры «Амкадора». Але рынкі збыту прадукцыі мяркуецца дыверсіфікаваць яшчэ больш, у тым ліку і дзякуючы шырокаму мадэльнаму раду. Зараз упраўленні рэалізацыі ААТ «Амкадор» — кіруючая кампанія холдынгу» мэтанакіравана працуюць над прасоўваннем прадукцыі на рынках Інданезіі, краін Паўднёвай Афрыкі і Лацінскай Амерыкі. Між іншым, зусім хутка частка вытворчых магутнасцяў аб'яднання з'явіцца па той бок Атлантычнага акіяна — у Венесуэле. Там пабудаваны завод, які будзе выпускаць дарожна-будаўнічую тэхніку. Зараз на ім вядуцца пусканаладачныя работы.
— Палітыка холдынгу мае экспартны характар. На сусветным рынку з нашымі прадпрыемствамі больш за ўсіх канкурыруюць заходнія вытворцы, — працягвае Уладзімір Гарбелік. — Таму мы імкнёмся на ўсіх прадпрыемствах, што ўваходзяць у склад «Амкадора», як мага хутчэй праводзіць комплексную мадэрнізацыю, каб пакупнікі выбіралі менавіта нашу прадукцыю. Яна скіравана на кардынальнае абнаўленне асноўных фондаў і пашырэнне прамысловых магутнасцяў. Ужо зараз звыш за 60% дэталяў да нашых машын, вузлоў ды агрэгатаў выпускаюцца менавіта на прадпрыемствах «Амкадора». І гэты паказчык з цягам часу будзе толькі павялічвацца. У далейшым заводы, з якіх складаецца холдынг, будуць спецыялізавацца на выпуску пэўных відаў машын, вузлоў і агрэгатаў. У сваю чаргу, гэты крок дазволіць яшчэ больш кіраваць якасцю і сабекоштам прадукцыі.
Штогод у распрацоўцы ўпраўлення генеральнага канструктара знаходзіцца 10-12 новых мадэляў і мадыфікацый тэхнікі. Да 2020 года «Амкадор» плануе распрацаваць, вырабіць, выпрабаваць больш за 50 новых мадэляў і мадыфікацый тэхнікі і арганізаваць іх масавую вытворчасць. Іх знешні выгляд і якасць будуць цалкам адпавядаць сусветнаму ўзроўню.
Больш за тое, ужо зараз будуюцца новыя прадпрыемствы, з дапамогай якіх вытворчасць уласнай элементнай базы будзе развіта яшчэ мацней. Усяго ж агульны аб'ём інвестыцый у развіццё холдынгу «Амкадор» запланаваны ў памеры 800 мільёнаў долараў на пяцігодку! І вынікам гэтага, апроч іншага, стане істотнае скарачэнне імпартных складнікаў, знізіцца матэрыялаёмкасць і энергетычныя выдаткі. Узровень зносу актыўнай часткі асноўных вытворчых сродкаў паступова знізіцца да 35%. Дзякуючы тэхнічнаму пераўзбраенню аб'ём інавацыйнай прадукцыі сёлета ўжо даведзены амаль да 30%. А экспарт у 2015 годзе перавысіць паказчык 2010 года больш чым у два разы.
Вікторыя ЦЕЛЯШУК, Валяр'ян ШКленнік, Аляксандр ФУРСАЎ.
Фота Яўгена ПЯСЕЦКАГА і з архіваў прадпрыемства.
УНП 100135676
Фіналістка праекта «Акадэмія талентаў» на АНТ — пра творчасць і жыццё.
На гэтым тыдні Цяльцы будуць проста незаменныя ўсюды, дзе іх ведаюць.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.
