Вы тут

Як правесці навагоднія святы без пашкоджанняў?


Раніцай 28 снежня мінулага года сталічным ратавальнікам пачалі паступаць тэлефонныя званкі з аднаго і таго ж пад'езда 9-павярховага дома. На лесвічнай пляцоўцы людзі заўважылі моцнае задымленне. Ратавальнікі, якія прыбылі на месца падзей, знайшлі ў кватэры дваіх малых дзяцей і 26-гадовую маці. Жанчына расказала, што калі яна зайшла ў пакой, то ўбачыла, як адкрытым полымем гарыць ёлка. Яна спрабавала самастойна справіцца з агнём, але сілы аказаліся няроўнымі. Пасля высветлілася, што пажар адбыўся з-за кароткага замыкання электрычнай гірлянды.

Як жа правесці навагоднія святы з максімальнай бяспекай для сябе? Аб гэтым карэспандэнт «Звязды» даведаўся ў начальніка рэспубліканскага цэнтра прапаганды МНС Алены Дзмітрук.


Сакрэты выбару

Набыць сабе навагоднюю прыгажуню праблем няма — па краіне арганізаваны шматлікія ёлачныя кірмашы. З проціпажарнага пункту гледжання найлепшае натуральнае дрэва — тое, якое нядаўна ссеклі. Распазнаць гэта проста — ствол навобмацак у такіх дрэў ліпкі. А хвоя павінна быць зялёнай і ні ў якім разе не ападаць ад першага ж дотыку.

Істотна распаўсюджаны і ёлкі штучныя. Яны пазбаўлены хібаў натуральных дрэў, але, на жаль, маюць і свае. Напрыклад, натуральнае дрэва згарае за 30—40 секундаў. Вільготнае дрэва супраціўляецца агню даўжэй, таму пажадана ўвільгатняць ёлку. Калі яна стаіць у кадцы з пяском, туды можна перыядычна даліваць вады. Але ж будзьце асцярожнымі з электрагірляндамі, якімі карыстаецеся пры гэтым. Штучныя прыгажуні згараюць вокамгненна — максімум за 15 секундаў. Пры гэтым ёсць вялікая рызыка выдзялення ў паветра процьмы шкодных рэчываў. Таму перад набыццём такога дрэва лепш упэўніцца, што ў прадаўца ёсць сертыфікат на яго.

— Пластмаса плавіцца, і сінтэтыка разліваецца па паверхні, таму тушыць вадой штучнае дрэва не эфектыўна. Што рабіць, калі яно загарэлася? Па-першае, адключайце гірлянды, паваліце дрэва на падлогу і накрыйце шчыльнай тканінай. Але памятайце, што калі вы не справіліся з гэтым літаральна ў першую хвіліну — пакідайце памяшканне і тэрмінова набірайце нумар 101. Сінтэтыка выдзяляе моцныя атрутныя рэчывы, магчыма ўгарэць.

З-за чаго можа загарэцца дрэва?

Крыніцай узгарання можа стаць звычайная электрычная гірлянда. Яе трэба набываць у афіцыйных пунктах продажу, дзе абавязкова будуць усе неабходныя сертыфікаты. Гірлянда мусіць быць абавязкова заводскай вытворчасці, а яе ізаляцыя — шчыльнай, гнуткай і без знешніх пашкоджанняў, лямпачкі — закрытымі. Скрынка пераключальніка рэжымаў не павінна лёгка прагінацца. Работу гірлянды трэба праверыць загадзя перад тым, як яе вешаць, звярнуўшы асаблівую ўвагу на праблемныя месцы: злучэнне дрота з адаптарам, пераключальнікам рэжымаў, з лямпачкамі. Дзецям давяраць гірлянду адназначна не варта.

Хоць гірлянда на ёлцы прыгожа зіхаціць у цёмны час сутак, катэгарычна забараняецца пакідаць яе без нагляду на ноч. Як правіла, на сертыфікаваных гірляндах у пашпарце прапісана, колькі гадзін яна можа працаваць без перапынку. Напрыклад, у той, якой карыстаецца аўтар гэтых радкоў, прапісана: пасля 6 гадзін работы павінна наступаць 18 гадзін перапынку.

Ну і, вядома, не трэба грувасціць на ёлку з уключанай электрычнай гірляндай тое, што можа загарэцца, — цацкі з лёгкіх на загаранне матэрыялаў, абкладваць яе ватай, ставіць побач падсвечнікі са свечкамі. Любы неасцярожны рух можа прывесці да пажару.

Найлепшае месца — у куце

Лясная прыгажуня можа важыць пару-тройку дзясяткаў кілаграмаў, а вось перакуліць яе вельмі лёгка як малому, так і хатняму гадаванцу. Таму для масіўных дрэў лепш або набыць спецыяльную крыжавіну, або проста паставіць яго ў вядро з пяском. Вельмі важна перад тым, як адпраўляцца на кірмаш, ведаць максімальна дапушчальныя габарыты дрэва. Галінкі і верхавіна не павінны датыкацца да столі, сцен, мэблі. Таксама не трэба ставіць ёлку ля ацяпляльных прыбораў: з-за гэтага дрэва толькі хутчэй высахне. І не забывайце вымятаць хвою, якая будзе абсыпацца з натуральнага дрэва.

— Варта перад набыццём разлічыць адлегласць і да дзіцячага ложка — уначы аб'ёмны сілуэт дрэва можа спалохаць малога, — кажа Алена Дзмітрук. — Таму самае ўдалае месца для ёлкі — гэта максімальна аддалены ад праходу куток, дзе на падлозе не ляжыць дыван. Там яна не будзе нікому перашкаджаць. Нават калі ёлку выпадкова закрануць падчас дзіцячай гульні, яна не ўпадзе і нікому не прынясе шкоды.

Як бачым, асноўныя правілы бяспекі на навагодніх святах не такія і складаныя для выканання. Галоўнае — прыкласці невялічкія намаганні, і тады доўгачаканыя дні не азмрочацца непрыемнымі сітуацыямі.

Валяр'ян ШКЛЕННІК

sсhklennіk@zvіаzdа.bу

Загаловак у газеце: Ёлка павышанай рызыкі

Выбар рэдакцыі

Калейдаскоп

Усходні гараскоп на наступны тыдзень

Усходні гараскоп на наступны тыдзень

Стральцам на гэтым тыдні не трэба пераацэньваць сваіх магчымасцяў.

Гандаль

Кандытарскія вырабы — брэнд беларускай харчовай прамысловасці

Кандытарскія вырабы — брэнд беларускай харчовай прамысловасці

Напярэдадні Міжнароднага сімпозіума кандытараў эксперты расказалі аб планах і перспектывах кандытарскай галіны.

Сям'я і дэмаграфія

Святлана Клачкова: Чым больш дзяцей, тым больш любові

Святлана Клачкова: Чым больш дзяцей, тым больш любові

Як жа шматдзетная сям’я спраўляецца з хатнімі клопатамі?