Вы тут

«Юбілейны» значыць эфектыўны


Даты правядзення X (юбілейнага) Форуму рэгіёнаў Беларусі і Расіі ўжо вядомыя: мерапрыемства адбудзецца з 26 да 28 чэрвеня ва Уфе.


У Савеце Рэспублікі на чале са старшынёй Наталляй Качанавай адбылося пасяджэнне арганізацыйнага камітэта па падрыхцтоўцы і правядзенні Форуму рэгіёнаў, падчас якога ўдзельнікі абмеркавалі кірункі далейшай работы і стратэгіі падрыхтоўкі.

Як адзначыла Наталля Качанава, дадзенае мерапрыемства — вельмі важны складнік ва ўзаемадзеянні Беларусі і Расіі:

— Гэта эфектыўная форма супрацоўніцтва, мы не раз аб тым казалі. Мы павінны адпрацаваць усё дакладна, зладжана, каб не было ніякіх збояў пры правядзенні гэтага важнага мерапрыемства. Плануцца, што ў сакавіку пасяджэнне арганізацыйнага камітэта пройдзе ва Уфе, дзе будзе дэталёва паказана, у якіх месцах будуць працаваць нашы секцыі, дзе будзе праходзіць пленарнае пасяджэнне, якія пытанні будуць разгледжаны.

Старшыня аргкамітэта па падрыхтоўцы і правядзенні Х Форуму рэгіёнаў Беларусі і Расіі ад беларускага боку, старшыня Пастаяннай камісіі Савета Рэспублікі па рэгіянальнай палітыцы і мясцовым самакіраванні Міхаіл Русы распавёў аб этапах падрыхтоўкі да форуму.

— У рамках форуму запланаваны пасяджэнні секцый — іх сёлета па прапанове расійскага боку будзе дзесяць. Мадэратарамі з беларускага боку будуць старшыні пастаянных камісій, іх намеснікі і члены Савета Рэспублікі. Таксама мы прыцягваем цэлы спіс асоб, якія стануць экспертамі, дакладчыкамі на гэтых секцыях. Акрамя таго, у рамках форуму плануецца правесці чарговае пасяджэнне Міжпарламенцкай камісіі Савета Рэспублікі і Савета Федэрацыі па міжрэгіянальным супрацоўніцтве.

Міхаіл Русы падкрэсліў, што адной з галоўных падзей Форуму рэгіёнаў стане сустрэча Старшыні Савета Рэспублікі Наталлі Качанавай і Старшыні Савета Федэрацыі Валянціны Матвіенкі з кіраўнікамі рэгіёнаў, органаў улады і дзяржкіравання Рэспублікі Беларусь і суб'ектаў Расійскай Федэрацыі.

— Традыцыйна сустрэча будзе выкарыстана для прамых кантактаў паміж прадстаўнікамі рэгіёнаў Беларусі і Расіі, цікавасць вельмі высокая. І самае галоўнае — пленарнае пасяджэнне. Нам неабходна будзе абмеркаваць вынікі дзесяці форумаў і перспектывы супрацоўніцтва. На палях форуму таксама пройдзе сумеснае мерапрыемства Маладзёжнага савета (парламента) пры Нацыянальным сходзе Беларусі і Палаты маладых заканадаўцаў пры Савеце Федэрацыі Федэральнага сходу Расіі. Акрамя таго, плануецца сумеснае мерапрыемства гандлёва-прамысловых палат. Нам неабходна прапрацаваць пытанне аб правядзенні ва Уфе выставы буйнагабарытнай тэхнікі і ў цэлым дасягненняў народнай гаспадаркі Беларусі. Мы ўдакладнім аб'ём, якія плошчы нам гатовыя выдзеліць, каб Беларусь дастойна выглядала на выставе.

Міхаіл Русы дадаў, што традыцыйна ў рамках форуму плануецца падпісанне пагадненняў і кантрактаў:

— У нас ёсць магчымасці зрабіць усё так, каб форум стаў сапраўды юбілейным, стаў набыткам Рэспублікі Беларусь і Расійскай Федэрацыі, чарговым крокам у нашых інтэграцыйных сувязях, — рэзюмаваў Міхаіл Русы.

Падводзячы вынікі пасяджэння, Наталля Качанава адзначыла, што Расійская Федэрацыя па-ранейшаму застаецца нашым стратэгічным партнёрам:

— Тыя пытанні, якія сёння даводзіцца вырашаць Расіі і Беларусі, — сугучныя. У рамках санкцыйнага ціску нашы краіны сталі бліжэйшыя ў супрацоўніцтве. Прынятае дзесяць гадоў таму рашэнне аб правядзенні Форуму рэгіёнаў паказвае сваю эфектыўнасць і сёння. Кіраўнік нашай дзяржавы дакладна абазначыў, што галоўнае пытанне ў інтэграцыі — гэта эканоміка. І, несумненна, асноўным складнікам у правядзенні нашага мерапрыемства з'яўляецца падпісанне кантрактаў і пагадненняў. Летась было падпісана кантрактаў і пагадненняў на 65 млрд расійскіх рублёў, або 2,5 млрд беларускіх. Мы разлічваем, што сёлета будзе падпісана не менш. Яшчэ раз хачу адзначыць, што правядзенне Форуму рэгіёнаў — вяршыня той работы, якая праходзіць на працягу ўсяго года.

Старшыня Савета Рэспублікі падкрэсліла, што сёлета пашырыцца колькасць тэматычных пляцовак форуму:

— Летась было шэсць секцый, на якіх разглядаліся актуальныя пытанні нашага супрацоўніцтва, сёлета плануецца дзесяць. На мой погляд, вельмі цікавая тэматыка выбрана ў рабоце секцый. Будуць агучаны пытанні, якія сёння актуальныя: гэта стварэнне сумесных прадпрыемстваў і вытворчасцяў, выпуск імпартазамяшчальнай прадукцыіі. Наша супрацоўніцтва пашыраецца абсалютна па ўсіх напрамках, — рэзюмавала Наталля Качанава.

Арына КАРПОВІЧ

Прэв’ю: БелТА

Выбар рэдакцыі

Энергетыка

Беларусь у лідарах па энергаэфектыўнасці

Беларусь у лідарах па энергаэфектыўнасці

А сярод краін ЕАЭС — на першым месцы.

Моладзь

Аліна Чыжык: Музыка павінна выхоўваць

Аліна Чыжык: Музыка павінна выхоўваць

Фіналістка праекта «Акадэмія талентаў» на АНТ — пра творчасць і жыццё.

Грамадства

24 красавіка пачаў работу УНС у новым статусе

24 красавіка пачаў работу УНС у новым статусе

Амаль тысяча дзвесце чалавек сабраліся, каб вырашаць найважнейшыя пытанні развіцця краіны. 

Грамадства

Курс маладога байца для дэпутата

Курс маладога байца для дэпутата

Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.