Ідэя фэсту ўзнікла пасля наведвання Прэзідэнтам мясцовай пякарні ў чэрвені пазамінулага года. Аляксандр Лукашэнка высока ацаніў смак свіслацкага хлеба, асабліва — здобнай пляцёнкі. Гэта стала свайго роду пасылам для раскруткі булкі, якая ў хуткім часе атрымала афіцыйную назву «Бацькава булка». Летась у гонар славутай здобы ў Свіслачы зладзілі рэспубліканскі фэст. Сёлета свята пройдзе другі раз.
Падрыхтоўку вядзе спецыяльна створаны аргкамітэт пры Гродзенскім абласным упраўленні культуры. Асноўная праграма распрацавана Свіслацкім цэнтрам культуры і народнай творчасці. Кожны наведвальнік зможа адчуць сябе не толькі гледачом, але і паўнавартасным удзельнікам вясёлага і забаўляльнага шоу.
— Свята становіцца вельмі папулярным, бо яго тэма блізкая кожнаму, — зазначае намеснік дырэктара раённага цэнтра культуры Святлана Дзянісава. — Важнасць гэтага прадукту відавочная, а восем назваў хлебабулачных вырабаў увайшлі ў склад нематэрыяльнай культурнай спадчыны Беларусі. Усе яны будуць прадстаўлены на каравай-фэсце ў Свіслачы. Таксама падрыхтавана нямала пякарскіх конкурсаў як для аматараў, так і для прафесіяналаў гэтай справы.
На выстаўцы-конкурсе «Бацькаўшчына», напрыклад, прафесійныя пекары прадставяць у выпечцы гістарычныя аб'екты Беларусі. Летась тут знайшлі адлюстраванне і Белавежская пушча, і гродзенскія замкі, і старажытныя сядзібы.
Адным з самых цікавых абяцае стаць конкурс «Матулін каравай». Прыняць удзел у ім змогуць усе ахвотныя, у тым ліку пекары-аматары і хатнія гаспадыні. На свята пададзена 23 заяўкі. Сваё майстэрства ў кулінарным спаборніцтве можна будзе прадэманстраваць у дзвюх намінацыях: «Традыцыйны каравай» і «Сучасны каравай».
Кожны ўдзельнік павінен прадставіць адзін выраб вагой не менш за кілаграм. Калі гэта «Традыцыйны каравай», то ў хатніх умовах па традыцыйным рэцэпце гатуецца пірог, каравай ці булка. Вітаецца наяўнасць сямейнай гісторыі, якая звязана з вырабам.
У намінацыі «Сучасны каравай» прапануецца прадставіць кандытарскія вырабы на тэму «Вяселле». Гэта можа быць пірог ці торт, які гатуецца без выпечкі з ужо гатовых інгрэдыентаў, напрыклад, пернікавы ці зефірны. Тут кожны можа прыкласці ўсю фантазію і здольнасці. Прадстаўлены на конкурс выраб павінен мець арыгінальную назву. Але мала толькі прыгатаваць. Яшчэ трэба яго цікава прэзентаваць, расказаць пра тэхналогію, рэцэптуру, гісторыю, чаму менавіта такі выраб стаў у сям'і традыцыйным, у чым яго адметнасць.
Пераможцы будуць вызначаны ў спецыяльных намінацыях. Гэта «Кулінарная спадчына», «Смак дзяцінства», «Самы вялікі каравай», «Арыгінальная прэзентацыя», «Незвычайнае спалучэнне інгрэдыентаў», «Арыгінальнае афармленне». Па выніках конкурсу найлепшыя работы атрымаюць узнагароды — дыпломы і грашовыя прэміі.
Асобны конкурс адбудзецца для прафесійных пекараў і кандытараў. Яны прадставяць вялікі асартымент вырабаў, якія трапляюць да спажыўцоў не толькі вобласці, але і краіны. Вядома, не абыдзецца без дэгустацыі.
Падчас фэсту будзе працаваць шэраг цікавых лакацый. Напрыклад, лаўнж-зона для адпачынку, дзе булка-гадалка ў жартоўнай форме прадкажа лёс.
Экскурсія з майстар-класам паведаміць аб шляху зерня да хлеба. Тут адбудзецца дэманстрацыя старажытных сельскагаспадарчых прылад. А на старых млынарных колах можна нават памалоць зерне. Экскурсійны майстар-клас завершыцца прыгатаваннем «Бацькавай булкі». Госці фестывалю змогуць пакаштаваць духмяную хлебную выпечку, а таксама прыняць удзел у конкурсе па пляценні «Бацькавай булкі», якая будзе ўручацца пераможцу.
Усе конкурсы так ці іначай звязаны з «хлебнай» тэмай. Напрыклад, у эстафеце «Бацькава міля» каманды будуць перавозіць мяхі з зернем. У конкурсе «Каравай, каравай, каго хочаш — выбірай» кожная пара ўдзельнікаў з завязанымі вачыма адной рукой павінна будзе ўпакаваць булку. Арганізатары спадзяюцца, што ўсіх наведвальнікаў свята зацікавіць праграма пад назвай «Булка-байкер-шоу», у склад якой уваходзіць манеўраванне і фігурнае катанне на матацыклах.
Не абыдзецца без захапляльнага спартыўнага спаборніцтва. На баскетбольную пляцоўку выйдуць каманды старшыні Гродзенскага аблвыканкама і Свіслацкага райвыканкама. Дарэчы, гульня пройдзе на пляцоўцы, адкрыццё якой адбудзецца напярэдадні матча. Такі падарунак гораду падчас свята ладзіцца ўпершыню.
У праграме — выступленні артыстаў беларускай і расійскай эстрады, марафон песень аматарскіх калектываў Гродзенскай і Брэсцкай абласцей, фольк-гуртоў і музычных тэатраў.
Напачатку свята ладзілася як мясцовае, але хутка перарасло ў рэспубліканскае.
Трэба сказаць, што беларусы славіліся сваёй выпечкай, старадаўнія рэцэпты якой адноўлены і ўвайшлі ў спіс нематэрыяльнай культурнай спадчыны краіны. Захавальнікі традыцый прадставяць гэтыя вырабы на каравай-фэсце. У іх ліку — свіслацкая банкуха. Майстэрства прыгатавання гэтага торта-ёлачкі захавалася ў пасёлку Поразава. Таксама будзе прадстаўлены ржаны хлеб з Адэльска Гродзенскага раёна. Са Слоніма прывязуць знакаміты «паўлаўскі каравай» ад удзельніц народнага аб'яднання «чараўніцы-каравайніцы» з Навасёлкаўскага цэнтра культуры. На Слонімшчыне фестываль караваяў стаў брэндавым святам. А самы прыгожы трохпавярховы каравай паўлаўскія каравайніцы двойчы ўручалі Прэзідэнту краіны.
Маргарыта УШКЕВІЧ
Фіналістка праекта «Акадэмія талентаў» на АНТ — пра творчасць і жыццё.
На гэтым тыдні Цяльцы будуць проста незаменныя ўсюды, дзе іх ведаюць.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.