Вы тут

Усё распісана па хвілінах. Карэспандэнт «МС» правяла адзін дзень са старшынёй сельскага Савета дэпутатаў


Чым толькі не даводзіцца займацца кіраўнікам пярвічнага звяна ўлады. І неўладкаванымі сем'ямі, у якіх дзеці знаходзяцца ў сацыяльна небяспечным становішчы, і асацыяльнымі асобамі, што злоўжываюць спіртным, і пошукам работы для тых, хто не надта імкнецца працаваць, і добраўпарадкаваннем тэрыторый, навядзеннем парадку на зямлі і г. д. і да т. п. Спіс спраў можна працягваць бясконца. Часта дзень распісаны літаральна па хвілінах.


Святлана Швед віншуе землякоў са святам вёскі.

Старшыня Рачэнскага сельскага Савета дэпутатаў Святлана Швед сустрэла мяне ў цэнтры Любані на службовай «Шкодзе», якая, па ўсім відаць, прайшла шмат тысяч кіламетраў.

— Гэта падарунак былога старшыні Мінаблвыканкама Сямёна Шапіры. Сямён Барысавіч нарадзіўся ў Рачэні, землякі яго ўспамінаюць з вялікай цеплынёй і павагай. Вядома, гэты аўтамабіль, як кажуць, быў «з прабегам», але ў параўнанні з папярэднімі дабітымі «Жыгулямі» як неба і зямля, — кажа Святлана Васілеўна.

Па дарозе да месца дыслакацыі яна расказвае пра свае ўладанні. На яе тэрыторыі знаходзяцца 42 населеныя пункты, 1267 гаспадарак, жыве 2711 чалавек. Тут размешчаны школьныя і дзіцячыя ўстановы, установы культуры, медыцыны, бібліятэкі, комплексны прыёмны пункт, філіял ашчаднага банка, 11 магазінаў. Для аказання камунальных паслуг насельніцтву ў вёсцы Атраднае створаны вытворчы ўчастак РУП «Любанская ЖКГ».

Непрыкметна за размовай пад'язджаем да невялікай вёсачкі.

— Гэта Жораўка, — знаёміць яна. — Дакладней, як называюць мясцовыя жыхары, — Старая Жораўка, а па другі бок — Новая Жораўка. Там ААТ «Забалацкі» пабудавала дамы для сваіх работнікаў. У Старой Жораўцы знаходзіцца вядомы ў раёне Дом народных традыцый. Яго загадчыца Ірына Жудрык пячэ хлеб па даўніх сямейных рэцэптах.

У вёсцы не засталося сацыяльных аб'ектаў. Сюды прыязджаюць мабільная пошта, аўтакрама. А будынак былой школы выкупіла ТАА «Пасат» з Салігорска. У вёсцы ёсць ФАП, частку плошчы з яго работнікамі дзеліць вядучы спецыяліст Рачэнскага сельвыканкама Людміла Корбут. Менавіта да яе мы і наведаліся. Некалі Людміла Іванаўна працавала сакратаром Ляхаўскага сельсавета, які пасля рэарганізацыі далучылі да Рачэнскага.

— Мы пакінулі тут спецыяліста для зручнасці людзей, бо ехаць пенсіянерам па справах у Рачэнь далёка, — удакладняе Святлана Швед.

— Наведвальнікі прыходзяць сюды па даведкі, з нейкімі просьбамі, пытаннямі. Калі трэба, разам са старшынёй сельвыканкама выязджаем на месцы, сустракаемся з людзьмі, — дадае Людміла Корбут.

Едзем далей. Каля адной з вёсак кіроўца рэзка тармозіць. На абочыне дарогі работнікі ЖКГ выгружаюць на машыну кантэйнер са смеццем. Ды вакол застаюцца пластыкавыя пакеты, папера і шмат чаго іншага.

— Хлопцы, акуратней, — просіць Святлана Васілеўна.

Мужчыны паслухмяна пачынаюць збіраць раскіданае па зямлі.

— Камунальнікі паставілі кантэйнер для ПЭТ-бутэлек. Але мясцовыя жыхары завальваюць яго розным бытавым хламам, ёмістасць часта перапаўняецца. Зразумела, вядзём прафілактычныя гутаркі. Ды не ўсе адказна ставяцца да асобнага збору адходаў, — адзначае Святлана Швед. — Атрымліваецца, кантэйнер толькі стварае лішнія клопаты. Два разы ў месяц па графіку ў кожную вёску прыходзіць спецыяльная машына, якая забірае бытавыя адходы, упакаваныя ўладальнікамі ў мяшкі, пакеты.

Такі прывабны выгляд маюць многія сядзібы сельсавета.

Старшыня сельвыканкама папрасіла намесніка начальніка ЖКГ вырашыць пытанне з прыборкай смецця або ўвогуле забраць кантэйнер.

— Нам аказваюць садзейнічанне ў добраўпарадкаванні тэрыторый сельгасарганізацыі «Рачэнь» і «Забалацкі». Летась вывезлі з іх дапамогай (даюць тэхніку, людзей) смецце з усіх 17 грамадзянскіх могілак, ліквідавалі 9 стыхійных звалак. ААТ «Рачэнь» дапамагло ва ўстаноўцы і афарбоўцы жалезабетоннай агароджы на двух грамадзянскіх могілках у вёсцы Дунцы. У добраўпарадкаванні зямлі вялікая роля старастаў вёсак. Менавіта яны ініцыююць шмат добрых спраў. Прыклад паказваюць старасты вёсак Старая Дуброва Алена Курда і Дунцы Міхаіл Андруховіч. На лета ў штат бяром двух рабочых па добраўпарадкаванні. Дзякуй ЖКГ: перадалі нам бясплатна дзве мотакасы, — тлумачыць Святлана Швед.

Ёсць важная праблема — закінутыя старыя хаты. Дакладней, іх спадчыннікі, якіх часам вельмі цяжка знайсці. Некаторыя прыязджаюць, наводзяць каля дамоў парадак. Але не ўсе. У адваротным выпадку сельвыканкам афармляе дакументы і падае іскавую заяву ў суд. Калі суд прызнае жыллё безгаспадарчым і перадае яго ва ўласнасць сельсавета, то яго можна знесці або прадаць.

Сёлета ўпершыню ў гісторыі раёна сельвыканкам прадаў такі дом. Грошы атрымалі невялікія, але затое цяпер тут ёсць гаспадар, які даглядае будынак, і ўчастак. А ў вёсцы Вобчын самі жыхары выказалі прапанову знесці пустуючы дом. Сельвыканкам ініцыятыву падтрымаў.

Сапраўды, апошнім часам многія населеныя пункты прыкметна папрыгажэлі, сталі больш утульныя і камфортныя для пражывання. За вокнамі машыны праплываюць дыхтоўныя дамы, утульныя прыдамавыя тэрыторыі з дэкаратыўнымі агароджамі, альтанкамі, разнастайнымі малымі архітэктурнымі формамі, альпінарыямі, кветнікамі.

Нашу размову перапыняе званок жыхаркі Марыі Чайко наконт выдзялення дадатковай пашы для кароў.

— Марыя Уладзіміраўна і яе муж — пенсіянеры. Пераехалі ў бацькоўскі дом з Салігорска, завялі карову. А цяпер у іх падсобнай гаспадарцы ажно чатыры рагулі, — кажа старшыня.

Яна запэўнівае жанчыну, што пагутарыла з дырэктарам ААТ «Рачэнь» па гэтым пытанні. Яно вырашана станоўча.

Дарэчы, сама Святлана Васілеўна як старшыня сельвыканкама паказвае прыклад руплівай гаспадыні, трымае свойскую птушку і парсючкоў. Яна вырасла ў вялікай сям'і, дзе гадавалася сем дзяцей, была самая малодшая. Таму да сялянскай справы звыклая і добра разумее запыты вяскоўцаў.

Таццяна ЛАЗОЎСКАЯ, Любанскі раён

Выбар рэдакцыі

Эканоміка

Хто выбраў год таму айчынную валюту, аказаўся ў выйгрышы. Куды ўкласці грошы зараз, каб атрымаць выгаду

Хто выбраў год таму айчынную валюту, аказаўся ў выйгрышы. Куды ўкласці грошы зараз, каб атрымаць выгаду

Знаёмства маладых людзей з першымі грашыма адбываецца дзіўным чынам.

Грамадства

Індыкатар жаночых праблем. Чаму ў дэкальтэ галоўнае не прыгажосць, а здароўе?

Індыкатар жаночых праблем. Чаму ў дэкальтэ галоўнае не прыгажосць, а здароўе?

Часта незразумелы «шарык» можа быць, напрыклад, фібрадэномай.

Грамадства

Калі дапамога патрэбна экстранна, яе заўсёды змогуць аказаць валанцёры Чырвонага Крыжа

Калі дапамога патрэбна экстранна, яе заўсёды змогуць аказаць валанцёры Чырвонага Крыжа

Гучны гул сірэны знянацку застаў пенсіянерку Веру Васільеўну дома.