На пазачарговай сесіі Віцебскага абласнога Савета дэпутатаў сярод іншага зацвердзілі рэгіянальны комплекс мерапрыемстваў па рэалізацыі Дзяржаўнай праграмы «Беларусь гасцінная» на 2021—2025 гады.
Начальнік упраўлення спорту і турызму Віцебскага аблвыканкама Васіль Захарэвіч растлумачыў, што праграма скіравана на фарміраванне і развіццё сучаснага канкурэнтаздольнага турыстычнага комплексу, павелічэнне ўкладу турызму ў нацыянальную эканоміку. У якасці прыярытэтаў вызначаны: развіццё ўязнога і ўнутранага турызму, павышэнне канкурэнтаздольнасці адпаведных паслуг і прасоўванне нацыянальных турыстычных брэндаў на сусветным рынку.
У складзе праграмы — тры падпраграмы: «Кадравае і вучэбна-метадычнае забеспячэнне ў сферы турызму», «Маркетынг турыстычных паслуг», «Развіццё аб'ектаў турыстычнай індустрыі». Таксама прадугледжаны распрацоўка і абнаўленне экскурсій і тураў, у тым ліку віртуальных, аўдыягідаў, трансгранічных турыстычных маршрутаў. Не забудуць і пра маршруты для людзей з абмежаванымі магчымасцямі. Тым больш што колькасць вандроўнікаў штогод павялічваецца.
У Віцебскай вобласці нямала мясцін, якія абавязкова раяць наведаць. Нават цяжка адразу назваць найбольш цікавыя. У абласным цэнтры ёсць шмат цікавых месцаў, звязаных з імем сусветна вядомага мастака Марка Шагала: дом, арт-цэнтр, дзе прадстаўлена яго графіка; будынак, дзе ён працаваў разам з такімі знакамітасцямі, як Казімір Малевіч, Эль Лісіцкі, Вера Ермалаева, Давід Якерсон і іншымі... А недалёка ад Віцебска — вядомы музей-сядзіба «Здраўнёва», дзе жыў з сям'ёй вялікі рускі жывапісец Ілья Рэпін. Там ён стварыў шмат вядомых палотнаў... Сафійскі сабор у Полацку — адна з архітэктурных жамчужын Беларусі, помнік дойлідства XІ—XVІІІ стагоддзяў, старажытнае культавае каменнае збудаванне, створанае ў візантыйскім стылі. Безумоўна, яго трэба ўбачыць.
Шмат духоўна-гістарычных і архітэктурных адметнасцяў у старажытнай Оршы. Гэта комплекс езуіцкага калегіума, помнік архітэктуры XVІІ стагоддзя ў стылі барока і Куцеінскі манастыр, вядомы як адзін з найбуйнейшых цэнтраў кнігадрукавання. Менавіта ў друкарні гэтага манастыра беларускім друкаром і асветнікам Спірыдонам Собалем у 1631 годзе быў выдадзены першы «Буквар»... Словам, у кожным раёне вобласці ёсць нешта вартае ўвагі. Турызм на любы густ прапануецца патэнцыйным гасцям Прыдзвіння: паломніцкі, аздараўленчы, экалагічны, паляўнічы, адукацыйны, гастранамічны і іншыя віды.
Ёсць магчымасць і зарабляць на турызме. На сайце Віцебскага абласнога выканаўчага камітэта можна ўбачыць пералік зямельных участкаў, прапанаваных для рэалізацыі інвестыцыйных праектаў у дадзенай сферы — даволі, між іншым, прыбытковай, калі знайсці ўласную «фішку».
У прыватнасці, у зоне адпачынку на возеры Сосна ў вёсцы Доўжа Віцебскага раёна, дзе вельмі любяць адпачываць віцябляне, прапануецца аказваць турыстычныя паслугі для кемпераў і караванінгаў. Дарэчы, такія «дамы на колах» усё больш у трэндзе, таму і чакаецца вялікая зацікаўленасць з боку інвестараў у развіцці інфраструктуры. Наконт кемперных стаянак — запатрабаваныя яны ў Шумілінскім, Ушацкім, Пастаўскім і іншых раёнах. На сёння ж такіх аб'ектаў у вобласці ўсяго некалькі: два — ва Ушацкім раёне, адзін — у Віцебскім.
У Гарадоцкім раёне, недалёка ад граніцы з Расіяй, ёсць магчымасць стаць гаспадаром недабудаванага санаторыя больш чым на 230 месцаў. У ім трохпавярховы спальны і лячэбна-дыягнастычны карпусы, сховішча для гародніны. Тут прадугледжана стварэнне базы адпачынку з арганізацыяй паляўнічых тураў, дома адпачынку і ажыццяўленне іншых варыянтаў вытворчай, турыстычна-аздараўленчай дзейнасці.
А недалёка ад возера Лосвіда мясцовая ўлада гатовая дапамагчы ў будаўніцтве гольф-клуба з дамамі для адпачынку і пражывання да двухсот чалавек, гасцініцы на пяцьдзясят нумароў. А пляцоўка для навучання дзяцей гульні ў гольф, безумоўна, стане нагодай для цікавага сямейнага тура.
Ахвотным распачаць сваю справу ў галіне сельскага турызму ўлада можа дапамагчы і грашыма. Маецца на ўвазе фінансавая падтрымка ў выглядзе выдзялення субсідый, якая аказваецца беспрацоўным. Ёсць і спецыяльная банкаўская праграма крэдытавання ўладальнікаў сядзіб. Ужо больш за 600 такіх турыстычных пунктаў гасцінна прымае турыстаў з розных краін.
Аляксандр ПУКШАНСКІ
6 кастрычніка архівісты адзначылі сваё прафесійнае свята.
У поўным аб’ёме задаволена патрэба краіны ў калійных і каменных солях, торфе, сапрапелі, будаўнічым камені, падземных водах.
Цэны на ліквіднае жыллё ў сталіцы выраслі на 5 працэнтаў.
